2018 June 14 Thursday
ചിന്തയുടെ വെളിപാടാണ് മനുഷ്യനെ അടിമത്വത്തില്‍ നിന്ന് മോചിപ്പിച്ച് സ്വാതന്ത്ര്യത്തിലേക്ക് നയിക്കുന്നത്.
-എമേഴ്‌സണ്‍

2026 ലോകകപ്പിന് മൂന്ന് രാജ്യങ്ങള്‍ വേദിയാകും

മോസ്‌കോ: 2026ലെ ഫുട്‌ബോള്‍ ലോകകപ്പിന് അമേരിക്ക, മെക്‌സിക്കോ, കാനഡ എന്നീ രാജ്യങ്ങള്‍ വേദിയൊരുക്കും. ബുധനാഴ്ച റഷ്യയില്‍ ചേര്‍ന്ന ഫിഫ കോണ്‍ഗ്രസ് കമ്മറ്റിയിലാണ് തീരുമാനമുണ്ടായത്. മൊറോക്കോയെ പിന്തള്ളിയാണ് മൂന്ന് രാജ്യങ്ങളെ തിരഞ്ഞെടുത്തത്. മൂന്നാം തവണയാണ് ലോകകപ്പ് നടത്തുന്നതില്‍ നിന്ന് മൊറോക്കോയെ ഒഴിവാക്കുന്നത്. അമേരിക്കന്‍ രാജ്യങ്ങള്‍ക്ക് 134 വോട്ട് ലഭിച്ചപ്പോള്‍ മോറോക്കോക്ക് 65 വോട്ടുകള്‍ മാത്രമാണ് ലഭിച്ചത്. 2026 ലോകകപ്പ് 48 ടീമുകള്‍ പങ്കെടുക്കുന്ന ആദ്യത്തെ ലോകകപ്പാകും. ലോകകപ്പ് നടത്തിയാല്‍ 11 ബില്യണ്‍ ഡോളര്‍ ലാഭമുണ്ടാകുമെന്ന് അമേരിക്കല്‍ രാജ്യങ്ങള്‍ വിശദീകരിച്ചപ്പോള്‍ അഞ്ചു ബില്യണ്‍ ഡോളര്‍ ലാഭമുണ്ടാകുമെന്നായിരുന്നു മൊറോക്കോയുടെ വാദം.
ഇതാദ്യമായാണ് മൂന്ന് രാജ്യങ്ങളില്‍ ലോകകപ്പ് മത്സരങ്ങള്‍ നടക്കുന്നത്. ആകെയുള്ള 80 മത്സരങ്ങളില്‍ 10 മത്സരങ്ങള്‍ക്ക് കാനഡ വേദിയൊരുക്കും. 10 മത്സരങ്ങള്‍ക്ക് മെക്‌സിക്കോയും വേദിയാകും. ബാക്കി 60 മത്സരങ്ങള്‍ അമേരിക്കയിലാണ് നടക്കുക. ന്യൂ ജഴ്‌സിയിലെ മെറ്റ്‌ലൈഫ് സ്റ്റേഡിയത്തിലായിരിക്കും ഫൈനല്‍ മത്സരം അരങ്ങേറുക. 1994 ലോകകപ്പിന് അമേരിക്ക വേദിയായിരുന്നു. 1970, 1986 വര്‍ഷങ്ങളില്‍ മെക്‌സിക്കോയിലും ലോകകപ്പ് ഫുട്‌ബോള്‍ നടന്നിട്ടുണ്ട്.

 


കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.