2018 November 14 Wednesday
യഥാര്‍ഥ സൗഹൃദത്തേക്കാള്‍ വില നല്‍കാവുന്ന ഒന്നും തന്നെ ഈ ലോകത്തിലില്ല.

ഹൂതി മിസൈലാക്രമണത്തില്‍ വിദേശികളടക്കം 26 പേര്‍ക്ക് പരുക്ക്

അബ്ദുസ്സലാം കൂടരഞ്ഞി

റിയാദ്: യമനുമായി അതിര്‍ത്തി പങ്കിടുന്ന നജ്‌റാനില്‍ മിസൈല്‍ ആക്രമണത്തില്‍ 26 പേര്‍ക്ക് പരുക്ക്. യമനിലെ വിമത വിഭാഗമായ ഹൂതികള്‍ നടത്തിയ ബാലിസ്റ്റിക് മിസൈല്‍ ആകാശത്തു വെച്ച് തകര്‍ക്കുന്നതിനിടെ അവശിഷ്ടങ്ങള്‍ പതിച്ചാണ് അപകടം. അടുത്ത ദിവസങ്ങളില്‍ നടന്ന പ്രധാനപ്പെട്ട ആക്രമണമാണിതെന്നും സഊദി വാര്‍ത്താ ഏജന്‍സി റിപ്പോര്‍ട്ട് ചെയ്തു. യമനിലെ ഹൂതി കേന്ദ്രങ്ങളില്‍ നിന്നാണ് സഊദിയെ ലക്ഷ്യമാക്കി മിസൈല്‍ വിക്ഷേപിച്ചത്. സഊദിയിലെ ഭൂപ്രദേശത്തു പഠിക്കുന്നതിനു മുന്‍പ് തന്നെ സഊദി വ്യോമ പ്രതിരോധ സേനയും അറബ് സഖ്യ സേനയും മിസൈല്‍ മിസൈല്‍ വേദ ഉപകാരങ്ങള്‍ കൊണ്ട് നിര്‍വ്വീര്യമാക്കുകയായിരുന്നു. ഇതിനിടയിലാണ് ഇതിന്റെ അവശിഷ്ടങ്ങള്‍ പതിച്ചത്.

അപകടത്തില്‍ പരുക്കേറ്റവരില്‍ സ്വദേശികളും വിദേശികളുമുണ്ട്. പരുക്കേറ്റവരില്‍ രണ്ടു പേര്‍ കുട്ടികളാണ്. ഇവരില്‍ 11 പേരെ കൂടുതല്‍ ശുശ്രൂഷകള്‍ നല്‍കാനായി ആശുപത്രിയിലേക്ക് മാറ്റിയതായും ബാക്കിയുള്ളവരെ സംഭവ സ്ഥലത്തു വെച്ചു തന്നെ ശുശ്രൂഷകള്‍ നല്‍കി വീടുകളിലേക്ക് മാറ്റിയതായും നജ്‌റാന്‍ പ്രവിശ്യ സിവില്‍ ഡിഫന്‍സ് ഡയക്ട്റ്ററേറ്റ് വക്താവ് ക്യാപ്റ്റന്‍ അബ്ദുല്‍ ഖാലിഖ് അല്‍ ഖഹ്താനി പറഞ്ഞു.

തുടര്‍ച്ചയായ മിസൈല്‍ ആക്രമണം സഊദി യമന്‍ അതിര്‍ത്തിയില്‍ കൂടുതല്‍ സംഘര്‍ഷമാക്കുകയാണ്. ഇറാന്‍ പിന്തുണയോടെ ഹൂതി മിലീഷ്യകള്‍ സഊദിക്ക് നേരെ അയച്ച മിസൈലുകളുടെ എണ്ണം 187 ആയതായി സഖ്യ സേന വക്താവ് കേണല്‍ തുര്‍ക്കി അല്‍ മാലിക്കി പറഞ്ഞു. യമനില്‍ യുദ്ധത്തിലേര്‍പ്പെടുന്നതിന്റെ പ്രതികാരമായാണ് സഊദിക്കെതിരെ ഹൂതികള്‍ പ്രതികാരമായി മിസൈല്‍ ആക്രമണം നടത്തുന്നത്. തുടര്‍ച്ചയായുള്ള മിസൈല്‍ ആക്രമങ്ങള്‍ യു എന്നിന്റെ 2216, 2231 കരാര്‍ ലംഘനമാണെന്നു സഊദി കുറ്റപ്പെടുത്തി.

അതേസമയം, യമനിലെ സംഘര്‍ഷം ഒഴിവാക്കുന്നതിന്റെ ഭാഗമായി ജനീവയില്‍ ഐക്യ രാഷ്ട സഭയുടെ നേതൃത്വത്തില്‍ സമാധാന ചര്‍ച്ചകള്‍ക്ക് പ്രാരംഭ നടപടികള്‍ക്ക് തുടക്കം കുറിച്ചു. 2015 ല്‍ യമനില്‍ യുദ്ധം തുടങ്ങിയ ശേഷം 2016 വരെ വിവിധ ഘട്ടങ്ങളില്‍ ചര്‍ച്ചകള്‍ നടന്നിരുന്നെകിലും ഏറെ ചര്‍ച്ചകളും പാളിപ്പോകുന്നുകയായിരുന്നു. തുടര്‍ന്ന് ഏറെ കാലങ്ങള്‍ക്ക് ശേഷമാണു വീണ്ടും സമാധാന ചര്‍ച്ചകള്‍ക്കായി ജനീവയില്‍ ഒരുമിക്കുന്നത്. രണ്ടു വര്‍ഷത്തെ ഇടവേളക്ക് ശേഷം നടക്കുന്ന ചര്‍ച്ചയിലെങ്കിലും സമാധാനം പുലരുമെന്ന പ്രതീക്ഷയിലാണ് ഏവരും.


കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.