2018 February 17 Saturday
എല്ലാവരും ഒരുപോലെ കഴിവുള്ളവരാകണമെന്നില്ല. എന്നാല്‍, സ്വന്തം കഴിവുകളെ വികസിപ്പിച്ചെടുക്കാനുള്ള അവസരം ഏവര്‍ക്കും ഒരുപോലെയാണ്.
എ.പി.ജെ അബ്ദുല്‍ കലാം

സൈബീരിയയില്‍ നിന്ന് മാര്‍ഷ് സാന്റ് പെപ്പര്‍ നിളാ തടത്തിലെത്തി

തൃത്താല: നാലായിരത്തിലേറെ കിലോമീറ്റര്‍ സഞ്ചരിച്ച് ദേശാടനപ്പക്ഷിയായ മാര്‍ഷ് സാന്റ് പൈപ്പര്‍ നിളാതടത്തിലെത്തി. തൃത്താല ഭാരതപ്പുഴയോട് ചേര്‍ന്ന ചതുപ്പുനിലത്തിലാണ് മാര്‍ഷ് സാന്റ് പൈപ്പര്‍ പക്ഷിയെ, പക്ഷി നിരീക്ഷകനായ ഷിനോ ജേക്കബ് കൂറ്റനാട് കണ്ടെത്തിയത്.
ചതുപ്പന്‍ കാടക്കൊക്ക് എന്ന് മലയാളത്തില്‍ പേരുള്ള മാര്‍ഷ് സാന്റ് പൈപ്പര്‍ സൈബീരിയയിലും പരിസര പ്രദേശങ്ങളിലും പ്രജനനം നടത്തുകയും തണുപ്പുകാലത്ത് ആഫ്രിക്ക, ഓസ്‌ട്രേലിയ, തെക്ക് കിഴക്കനേഷ്യ, ഇന്‍ഡ്യ എന്നിവിടങ്ങളിലേയ്ക്ക് ദേശാടനം നടത്തുകയും ചെയ്യുന്നു.

സാന്റ് പൈപ്പര്‍ കുടുംബത്തിലെ കോമ്മണ്‍ സാന്റ് പൈപ്പര്‍(നീര്‍ക്കാട), വുഡ് സാന്റ് പൈപ്പര്‍ (പുള്ളി കാടക്കൊക്ക്) ഗ്രീന്‍ ഷാങ്ക് (പച്ചക്കാലി) തുടങ്ങിയ പക്ഷികളെ ഭാരതപ്പുഴയോട് ചേര്‍ന്ന ഭാഗങ്ങളില്‍ ധാാളമായി കാണാമെങ്കിലും മാര്‍ഷ് സാന്റ് പൈപ്പറിനെ കാണുന്നത് ആദ്യമായാണ്. ഒറ്റക്കോ വളരെ കുറച്ച് അംഗങ്ങളുള്ള സംഘമായോ സഞ്ചരിക്കുന്ന മാര്‍ഷ് സാന്റ് പൈപ്പര്‍ പക്ഷികള്‍ ചതുപ്പുനിലത്തിലെ ചെറുജീവികളേയാണ് ഭക്ഷിക്കുക.
ശരീരത്തിന്റെ പുറം ഭാഗം ചാര നിറവും അടിഭാഗം വെളുപ്പുനിറത്തിലും ഉള്ള ഈ പക്ഷിയുടെ കൊക്ക് വണ്ണം കുറഞ്ഞ് നീളം കൂടിയതാണ്.
ഗ്രീന്‍ ഷാങ്ക് (പച്ചക്കാലി) എന്ന പക്ഷിയോട് വളെയേറെ രൂപസാദൃശ്യമുള്ള മാര്‍ഷ് സാന്റ് പൈപ്പര്‍, പച്ചക്കാലിയേക്കാള്‍ വലുപ്പത്തില്‍ ചെറുതാണ് എന്നതും കൊക്കിന്റെ രൂപവും നോക്കി വേര്‍തിരിച്ചറിയാം. മാര്‍ഷ് സാന്റ് പൈപ്പറിന്റെ ശരീരവലുപ്പം 25 സെന്റീ മീറ്റര്‍ വരെയാണ്.
ദേശാടനപ്പക്ഷികളെത്തുന്ന ഡിസംബര്‍ – ജനുവരി മാസങ്ങളില്‍ പാലക്കാട് ജില്ലയുടെ പടിഞ്ഞാറന്‍ ഭാഗത്ത് കൊയ്ത്തുകഴിഞ്ഞ് നെല്‍കൃഷി അവസാനിക്കുന്നതോടെ ഭാരതപ്പുഴയുടെ തീരത്തെ തൃത്താല മേഖലയിലെ ചുരുക്കം ചില തണ്ണീര്‍ത്തടങ്ങളേയാണ് ദേശാടനപ്പക്ഷികള്‍ ആശ്രയിക്കുന്നത്.


 


കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.