2019 August 18 Sunday
തെറ്റു ചെയ്യുന്നവന്‍ മനുഷ്യനാണ്; അതിനെക്കുറിച്ചോര്‍ത്തു ദു:ഖിക്കുന്നവന്‍ മഹര്‍ഷിയാണ്; എന്നാല്‍ അതില്‍ അഭിമാനം കൊള്ളുന്നവന്‍ പിശാചാണ്.

സി.പി.എം പ്രവര്‍ത്തകരായ ദമ്പതികള്‍ കള്ളവോട്ട് ചെയ്‌തെന്ന് ആരോപണം

കോഴിക്കോട്: കോഴിക്കോട് പാര്‍ലമെന്റ് മണ്ഡലത്തില്‍ സി.പി.എം പ്രവര്‍ത്തകരായ ദമ്പതികള്‍ കള്ളവോട്ട് ചെയ്തതിന്റെ തെളിവുകള്‍ പുറത്ത്.
എലത്തൂര്‍ നിയോജകമണ്ഡലത്തില്‍പ്പെട്ട 47ാം ബൂത്തിലും 149ാം ബൂത്തിലുമാണ് കാക്കൂര്‍ സ്വദേശികളായ കളരിക്കല്‍ രമേശന്‍ എം.പി എന്നയാളും ഭാര്യ ശ്രീജ കെ.യും ഇരട്ട വോട്ട് ചെയ്തത്.  സി.പി.എം പ്രവര്‍ത്തകനായ രമേശന്‍ കാക്കൂര്‍ പഞ്ചായത്തിലെ പുന്നശ്ശേരി വെസ്റ്റ് എ.എല്‍.പി സ്‌കൂളിലെ 47ാം ബൂത്തില്‍ ക്രമ നമ്പര്‍ 295 ആയാണ് ഒരു വോട്ട് ചെയ്തത്. കുരുവട്ടൂര്‍ പഞ്ചായത്തിലെ 149ാം ബൂത്തില്‍ ക്രമനമ്പര്‍ 198 ആയാണ് മറ്റൊരു വോട്ട് ചെയ്തത്. രമേശന്റെ ഭാര്യ ശ്രീജ 47ാം ബൂത്തില്‍ ക്രമനമ്പര്‍ 297 ആയും 149ാം ബൂത്തില്‍ ക്രമനമ്പര്‍ 201 ആയും കള്ളവോട്ട് രേഖപ്പെടുത്തിയതായും തെളിവുകള്‍ പുറത്തുവിട്ട് ഡി.സി.സി ജനറല്‍ സെക്രട്ടറി ഐ.പി രാജേഷ് റിട്ടേണിങ് ഓഫിസര്‍ക്ക് പരാതി നല്‍കി. കള്ളവോട്ട് രേഖപ്പെടുത്തിയതിന് പുറമെ നിയമവിരുദ്ധമായി രണ്ട് ഇലക്ഷന്‍ ഐ.ഡി കാര്‍ഡ് കൈവശം വച്ചെന്ന ഗുരുതര കുറ്റവും ഇരുവര്‍ക്കും എതിരേ ആരോപിക്കുന്നു.
ഇതിന്റെ രേഖകള്‍ പുറത്തുവിടുകയും ഇരു ബൂത്തിലെയും യു.ഡി.എഫ് എജന്റുമാര്‍ ദമ്പതികള്‍ കള്ളവോട്ട് ചെയ്തായി മൊഴി നല്‍കുകയും ചെയ്തതോടെ സി.പി.എം പ്രതിരോധത്തിലായി.  ദേശാഭിമാനിയുടെ പ്രാദേശിക ഏജന്റ് കൂടിയാണ് രമേശന്‍. കള്ളവോട്ട് ചെയ്ത ദമ്പതികള്‍ക്കെതിരെ നടപടിയെടുക്കണമെന്നും മുന്നോട്ടുപോകുമെന്ന് യു.ഡി.എഫ് നേതാക്കള്‍ വ്യക്തമാക്കി.


ഏറ്റവും പുതിയ വാർത്തകൾക്കും വീഡിയോകൾക്കും സബ്‌സ്ക്രൈബ് ചെയ്യുക

കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.