2019 May 27 Monday
ഒരാളുടെ മഹത്വം അളക്കുന്നത് അയാള്‍ തനിക്ക് താഴ്ന്നവരോട് എങ്ങനെ ഇടപെടുന്നു എന്നു നോക്കിയാണ് -ജെ.കെ റൗളിങ്‌

സിറിയയില്‍നിന്ന് യു.എസ് സഖ്യസേന പിന്മാറ്റം തുടങ്ങി

 

ദമസ്‌കസ്: സിറിയയില്‍ ഐ.എസിനെതിരായ പോരാട്ടം നടത്തിയിരുന്ന യു.എസ് സഖ്യസേന നാട്ടിലേക്കുള്ള മടക്കം ആരംഭിച്ചു. യു.എസ് പ്രസിഡന്റ് ഡൊണാള്‍ഡ് ട്രംപിന്റെ അപ്രതീക്ഷിത പ്രഖ്യാപനത്തിന് ഒരു മാസത്തിനു ശേഷമാണ് സൈന്യം പിന്മാറ്റം തുടങ്ങിയത്. സേനാവക്താവാണ് ഇക്കാര്യം പുറത്തുവിട്ടത്.
ഐ.എസ് വിരുദ്ധ പോരാട്ടത്തിനായി അമേരിക്ക രൂപം കൊടുത്ത കംപൈന്‍ഡ് ജോയിന്റ് ടാസ്‌ക് ഫോഴ്‌സ്-ഓപറേഷന്‍ ഇന്‍ഹെറന്റ് റിസോള്‍വ് (സി.ജെ.ടി.എഫ്-ഒ.ഐ.ആര്‍) എന്ന പേരിലറിയപ്പെടുന്ന സൈന്യമാണ് സിറിയയില്‍നിന്നു പിന്‍വലിയുന്നത്.

സി.ജെ.ടി.എഫ്-ഒ.ഐ.ആര്‍ പിന്മാറ്റത്തിനു തുടക്കം കുറിച്ചതായി വക്താവ് കേണല്‍ സീന്‍ റയാന്‍ പറഞ്ഞു. സുരക്ഷാ ഭീഷണി ചൂണ്ടിക്കാണിച്ചു പിന്മാറ്റത്തിന്റെ കാലയളവ്, മടക്കത്തിന്റെ വഴി, അതുവരെ സൈന്യം തുടരുന്ന കേന്ദ്രങ്ങള്‍ തുടങ്ങിയവയെ കുറിച്ചൊന്നും വെളിപ്പെടുത്താന്‍ അദ്ദേഹം തയാറായിട്ടില്ല.
വടക്കന്‍ സിറിയയിലെ ഹസാക്കിഹിനടുത്ത റമീലാന്‍ സൈനിക താവളത്തിലുള്ള സൈനികര്‍ നാട്ടിലേക്കു മടങ്ങിത്തുടങ്ങിയതായി സന്നദ്ധ സംഘടനയായ സിറിയന്‍ ഒബ്‌സര്‍വേറ്ററി ഫോര്‍ ഹ്യൂമന്‍ റൈറ്റ്‌സ് അറിയിച്ചു. വ്യാഴാഴ്ചയാണ് ആദ്യ സംഘം ഇവിടെനിന്നു പുറപ്പെട്ടത്.

2014 ഒക്ടോബറിലാണ് ഐ.എസിനെതിരായ നടപടിക്കെന്ന പേരില്‍ അമേരിക്കയുടെ നേതൃത്വത്തില്‍ സി.ജെ.ടി.എഫ്-ഒ.ഐ.ആറിനു തുടക്കം കുറിച്ചത്. ഫ്രഞ്ച്, ബ്രിട്ടീഷ് സൈനികരും ദൗത്യത്തിന്റെ ഭാഗമായിട്ടുണ്ട്.
പശ്ചിമേഷ്യയിലെ മുഴുവന്‍ ഐ.എസ് കേന്ദ്രങ്ങളെയും ലക്ഷ്യമിട്ടാണ് സൈന്യം രൂപീകരിച്ചത്. കുവൈത്ത് ആണ് സൈനിക ആസ്ഥാനം. സേനയ്ക്ക് വടക്കന്‍ സിറിയയ്ക്കും ഇറാഖിനും പുറമെ മറ്റു രാജ്യങ്ങളിലും താവളങ്ങളുണ്ട്. ഇതില്‍ ഇറാഖിലെ താവളമൊഴികെയുള്ളതാണ് അടച്ചുപൂട്ടി സൈന്യത്തെ പിന്‍വലിക്കുന്നത്. ഇറാഖിലെ പ്രവര്‍ത്തനങ്ങള്‍ ഭാവിയിലും തുടരുമെന്ന് ട്രംപ് അറിയിച്ചിട്ടുണ്ട്.
സിറിയയില്‍ കുര്‍ദ് വിമതരായ സിറിയന്‍ ഡെമോക്രാറ്റിക് ഫോഴ്‌സുമായി സഹകരിച്ചാണ് സഖ്യസേന പോരാട്ടം നടത്തിയിരുന്നത്.
ഇവിടെനിന്ന് ഐ.എസ് ഭീകരരെ തുരത്തി നിയന്ത്രണം കുര്‍ദുകള്‍ ഏറ്റെടുത്തിരുന്നു. പിന്നീട് കുര്‍ദുകള്‍ക്കെതിരേ തുര്‍ക്കി സൈനിക നടപടി ആരംഭിച്ചതോടെ ഇവരെ ചെറുക്കാനും സഖ്യസേന സഹായിച്ചു. സഖ്യസേനാ പിന്മാറ്റത്തെ തുടര്‍ന്നു മേഖലയുടെ നിയന്ത്രണം കുര്‍ദുകള്‍ സര്‍ക്കാര്‍ അനുകൂല സേനയ്ക്കു കൈമാറിയിട്ടുണ്ട്.

 


ഏറ്റവും പുതിയ വാർത്തകൾക്കും വീഡിയോകൾക്കും സബ്‌സ്ക്രൈബ് ചെയ്യുക

കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.