2019 April 25 Thursday
ഒരു പ്രഭുവിന്റെ രക്തത്തെക്കാള്‍ വില കൂടിയതത്രെ ഒരു പിച്ചക്കാരന്റെ കൈയിലുള്ള പുസ്തകം -വില്യം ഷേക്‌സ്പിയര്‍

സജിയെ ജീവിതത്തിലേക്ക് കൈപിടിച്ച് നടത്താന്‍ ജനകീയ കൂട്ടായ്മ

വടക്കാഞ്ചേരി: കുറാഞ്ചേരി ഉരുള്‍പൊട്ടല്‍ ദുരന്തത്തില്‍ അമ്മയും മകളും വീടും ജീവിതോപാധിയായ ഐസ് ഫാക്ടറിയുമൊക്കെ നഷ്ടപെട്ട് സങ്കട കടലില്‍ കഴിയുന്ന പാറേക്കാട്ടില്‍ സജിയെ ജീവിതത്തിലേക്ക് കൈപിടിച്ച് നടത്താന്‍ ജനകീയ കൂട്ടായ്മ രംഗത്ത്. സജിയുടെ വരുമാനമാര്‍ഗമായിരുന്ന ഐസ് ഫാക്ടറി പുനസ്ഥാപിച്ച് നല്‍കാനുള്ള പ്രവര്‍ത്തനങ്ങളുടെ ആദ്യഘട്ടം പൂര്‍ത്തിയായി. ഇതിന്റെ ഭാഗമായി തകര്‍ന്ന ഐസ് ഫാക്ടറി കെട്ടിടം പുനസ്ഥാപിച്ചു.
മണ്ണടിഞ്ഞ വീടിന് തൊട്ട് സമീപമാണ് ഫാക്ടറി പ്രവര്‍ത്തിച്ചിരുന്നത്. ദുരന്തം എല്ലാം തകര്‍ത്തപ്പോള്‍ ഫാക്ടറിയും മണ്‍കൂനയുടെ ഭാഗമായി. കെട്ടിടത്തോടൊപ്പം 15 ഫ്രീസറുകളും കുഴല്‍ കിണറും ഇലക്ട്രിക് ഉപകരണങ്ങളും ത്രീ ഫെയ്‌സ് കണക്ഷനുമെല്ലാം മണ്ണെടുത്തു. സജിയും ഭാര്യ ജോളി, മക്കളായ ജ്വോഷ്വല്‍, കാതറിന്‍ അത്ഭുതകരമായി രക്ഷപ്പെട്ടെങ്കിലും ഉടുതുണിക്ക് മറുതുണിയില്ലാത്ത സ്ഥിതിയായി.
ഐസ് നിര്‍മിച്ച് സപ്ലൈ ചെയ്തിരുന്ന ഒമ്‌നി വാഹനം പൂര്‍ണമായും തകര്‍ന്നടിഞ്ഞു. ഇപ്പോള്‍ കുറാഞ്ചേരിയിലെ ഒരു വീട്ടിലാണ് താമസം. പുനസ്ഥാപിച്ച ഫാക്ടറി കെട്ടിടത്തില്‍ അടുത്ത ദിവസം വൈദ്യുതി കണക്ഷനെത്തും. നഷ്ടപ്പെട്ട ഉപകരണങ്ങള്‍ പുനസ്ഥാപിക്കുന്നതിനുള്ള പ്രവര്‍ത്തനവും സജീവമാണ്. തെക്കുംകര പഞ്ചായത്ത് വൈസ് പ്രസിഡന്റ് സി.വി സുനില്‍കുമാറിന്റെ നേതൃത്വത്തിലാണ് സേവനയജ്ഞം നടക്കുന്നത്.


ഏറ്റവും പുതിയ വാർത്തകൾക്കും വീഡിയോകൾക്കും സബ്‌സ്ക്രൈബ് ചെയ്യുക

കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.