2018 November 16 Friday
നിങ്ങള്‍ മൂന്നുപേരുള്ളപ്പോള്‍ രണ്ട് പേര്‍ മാത്രം മാറിനിന്ന് സ്വകാര്യം പറയരുത്

സഊദിയില്‍ ഹറമൈന്‍ ട്രെയിന്‍ സര്‍വീസ് ഈ മാസം അവസാനം മുതല്‍

ജിദ്ദ: ഹറമൈന്‍ ട്രെയിന്‍ സര്‍വീസ് പദ്ധതിയില്‍ ഈ മാസം അവസാനം മുതല്‍ വാണിജ്യാടിസ്ഥാനത്തില്‍ സര്‍വീസുകള്‍ ആരംഭിക്കുമെന്ന് സഊദി പൊതുഗതാഗത മന്ത്രാലയം അറിയിച്ചു. മക്കയേയും മദീനയേയും ബന്ധിപ്പിക്കുന്ന അല്‍ ഹറമൈന്‍ അതിവേഗ ട്രെയിന്‍ നാന്നൂറ്റിയമ്പത് കിലോ മീറ്റര്‍ ഒന്നര മണിക്കൂറില്‍ ഓടിയെത്തും . അവസാന ഒരുക്കങ്ങള്‍ വിലയിരുത്തുന്നതിനു ജിദ്ദ, മക്ക റെയില്‍വേ സ്റ്റേഷനുകള്‍ ഗതാഗത മന്ത്രി ഡോ. നബീല്‍ അല്‍ ആമൂദി സന്ദര്‍ശിച്ചു. ജിദ്ദ സുലൈമാനിയ സ്‌റ്റേഷനില്‍ നിന്നും മക്കയിലേക്ക് അദ്ദേഹം ട്രെയിനില്‍ യാത്ര ചെയ്യുകയും ചെയ്തു. ഹറമൈന്‍ ട്രെയിന്‍ സ്‌റ്റേഷനുകളില്‍ സ്വകാര്യ കമ്പനികളും വ്യക്തികളും നൂറിലേറെ വ്യാപാര സ്ഥാപനങ്ങളും പ്രവര്‍ത്തിപ്പിക്കുമെന്നും മന്ത്രാലയം വൃത്തങ്ങള്‍ അറിയിച്ചു.

ഹജ്, ഉംറ തീര്‍ഥാടകരുടെ യാത്ര സുഗമമാക്കുന്നതിന് ലക്ഷ്യമിട്ട് നടപ്പാക്കുന്ന ഹറമൈന്‍ ട്രെയിന്‍ പദ്ധതിയില്‍ മാസങ്ങള്‍ക്കു മുമ്പ ്പരീക്ഷണാടിസ്ഥാനത്തില്‍ ട്രെയിന്‍ സര്‍വീസ് ആരംഭിച്ചിരുന്നു. പദ്ധതിയില്‍ അഞ്ചു റെയില്‍വേ സ്റ്റേഷനുകളാണുള്ളത്. മക്ക, മദീന, റാബിഗ്, ജിദ്ദ എന്നിവിടങ്ങളിലാണ് സ്റ്റേഷനുകള്‍, ജിദ്ദയില്‍ സുലൈമാനിയയിലെ പ്രധാന റെയില്‍വേ സ്റ്റേഷന് പുറമെ പുതിയ ജിദ്ദ എയര്‍പോര്‍ട്ടിലും റെയില്‍വേ സ്‌റ്റേഷനുണ്ടാവും.

മധ്യപൗരസ്ത്യ ദേശത്തെ ഏറ്റവും വലിയ ഗതാഗത പദ്ധതികളില്‍ ഒന്നാണ് ഹറമൈന്‍ ട്രെയിന്‍ പദ്ധതി. പദ്ധതിക്ക് 6700 കോടി റിയാലോളമാണ് ചെലവ്. മണിക്കൂറില്‍ 300 കിലോമീറ്റര്‍ വരെ വേഗതയുള്ള അത്യാധുനിക സംവിധാനങ്ങളോടെയാണ് 35 ട്രെയിനുകള്‍ സര്‍വീസ് നടത്തുക.


കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.