2019 August 21 Wednesday
തെറ്റു ചെയ്യുന്നവന്‍ മനുഷ്യനാണ്; അതിനെക്കുറിച്ചോര്‍ത്തു ദു:ഖിക്കുന്നവന്‍ മഹര്‍ഷിയാണ്; എന്നാല്‍ അതില്‍ അഭിമാനം കൊള്ളുന്നവന്‍ പിശാചാണ്.

സംസ്ഥാനപാതാ പുനര്‍നിര്‍മാണം; വട്ടംകറങ്ങി യാത്രക്കാര്‍

വടക്കാഞ്ചേരി: ഷൊര്‍ണൂര്‍-കൊടുങ്ങല്ലൂര്‍ സംസ്ഥാനപാതയില്‍ പാര്‍ളിക്കാട് പട്ടിച്ചിറക്കാവ് പാടശേഖരത്ത് നടക്കുന്ന റോഡ് നിര്‍മാണ പ്രവൃത്തികള്‍ ജനങ്ങളെ വലക്കുന്നു. പാര്‍ളിക്കാടിനും കുറാഞ്ചേരിയ്ക്കും ഇടയില്‍ വാഹനഗതാഗതം നിയന്ത്രിച്ചാണു തകര്‍ന്ന റോഡ് പുനര്‍നിര്‍മിക്കുന്നത്. ഇതിന്റെ ഭാഗമായി ഗതാഗതം പഴയ മിണാലൂര്‍ റോഡ് വഴി തിരിച്ചുവിടുകയാണ്. ഈ റോഡിലെ പാര്‍ളിക്കാട് റെയില്‍വേ ഗെയ്റ്റാണ് വില്ലനാകുന്നത്.
ട്രെയിനുകള്‍ കടന്നുപോകാന്‍ ഭൂരിഭാഗം സമയവും ഗെയ്റ്റ് അടച്ചിടുമ്പോള്‍ ഇരു ദിശയിലേക്കും കിലോമീറ്ററുകള്‍ ദൂരം വാഹനങ്ങള്‍ കുടുങ്ങിക്കിടക്കുകയാണ്. ട്രെയിന്‍ കടന്നുപോയ ശേഷം തുറക്കുന്ന ഗെയ്റ്റ് അല്‍പ്പസമയത്തിനകം വീണ്ടും അടയ്ക്കുമ്പോള്‍ മുഴുവന്‍ വാഹനങ്ങള്‍ക്കും കടന്നുപോകാനാവാത്ത സ്ഥിതിയാണ്. അതിനിടെ നീണ്ട വാഹനനിരയായതോടെ ഗെയ്റ്റ് അടയ്ക്കാനാകാത്ത സാഹചര്യവും രൂപപ്പെട്ടു.
സ്വകാര്യ ബസ് സര്‍വിസുകളും കടുത്ത പ്രതിസന്ധിയിലാണ്. സമയകൃത്യത പാലിക്കാനാകാതെ പല സര്‍വിസുകളും റദ്ദാക്കുകയും ചെയ്യുന്നുണ്ട്. ഇന്നലെ ബസുകള്‍ സര്‍വിസ് ഉപേക്ഷിച്ചതിനെ തുടര്‍ന്നു വിദ്യാര്‍ഥികളടക്കം നൂറുകണക്കിനു യാത്രക്കാരാണു പെരുവഴിയിലായത്. ചേലക്കരയില്‍ കുട്ടികള്‍ വീടുകളിലെത്താന്‍ പൊലിസിന്റെ സഹായം തേടുന്ന സാഹചര്യവുമുണ്ടായി. പൊലിസ് വാഹനങ്ങള്‍ ക്രമീകരിച്ചാണു വിദ്യാര്‍ഥികളെ വീടുകളിലെത്തിച്ചത്. അതിനിടെ റോഡ് നിര്‍മാണം ഇഴയുകയാണെന്ന പരാതിയും ഉയര്‍ന്നിട്ടുണ്ട്.


ഏറ്റവും പുതിയ വാർത്തകൾക്കും വീഡിയോകൾക്കും സബ്‌സ്ക്രൈബ് ചെയ്യുക

കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.