2018 September 21 Friday
പതിനായിരം ബന്ധുക്കള്‍ക്ക് പകരം നില്‍ക്കാന്‍ ഒരേയൊരു ആത്മാര്‍ഥ സുഹൃത്ത് മതി.
യൂറിപ്പിഡിസ്

സംസ്ഥാനത്ത് ഭരണസ്തംഭനം: ചെന്നിത്തല

തിരുവനന്തപുരം: മുഖ്യമന്ത്രി ചികിത്സക്കായി അമേരിക്കയിലേക്കു പോയതിനു പിന്നാലെ റിലീഫ് പ്രവര്‍ത്തനങ്ങള്‍ മരവിച്ചെന്നു പ്രതിപക്ഷ നേതാവ് രമേശ് ചെന്നിത്തല. മുഖ്യമന്ത്രിയുടെ ചികിത്സ അനിവാര്യമാണെങ്കിലും പകരം ആര്‍ക്കും ചുമതല നല്‍കാത്തതു ദുരിതാശ്വാസ പ്രവര്‍ത്തനങ്ങള്‍ അവതാളത്തിലാക്കിയെന്നും അദ്ദേഹം മീറ്റ് ദി പ്രസ് പരിപാടിയില്‍ ആരോപിച്ചു.

മുഖ്യമന്ത്രിക്കു സ്വന്തം മന്ത്രിമാരെ വിശ്വാസമില്ലാത്തതാണ് ചുമതല കൈമാറാത്തതിനു കാരണം. സംസ്ഥാനത്തു ഭരണസ്തംഭനംമൂലം ഒന്നും നടക്കുന്നില്ല. ദുരിതാശ്വാസ പ്രവര്‍ത്തനങ്ങളില്‍ ഗുരുതര വീഴ്ചയാണ് സംഭവിച്ചിരിക്കുന്നത്. തീരുമാനങ്ങളെടുക്കാന്‍ ആളില്ലാത്ത സ്ഥിതിയാണെന്നും മുന്‍പു മുഖ്യമന്ത്രിമാര്‍ വിദേശത്തു ചികിത്സക്കും മറ്റുമായി പോയപ്പോഴെല്ലൊം ചുമതല ഏതെങ്കിലും മന്ത്രിക്കു കൈമാറിയിരുന്നെന്നും അദ്ദേഹം പറഞ്ഞു.
സര്‍ക്കാരില്‍ ഏകോപനമില്ലാത്ത അവസ്ഥയാണ്. മന്ത്രിമാരുടെ വിദേശ യാത്ര സംബന്ധിച്ച്, ഇപ്പോഴത്തെ സാഹചര്യത്തില്‍ അനാവശ്യ ചെലവുകള്‍ വേണോയെന്ന് ആലോചിക്കണമെന്ന് അദ്ദേഹം പറഞ്ഞു. വിദേശ രാജ്യങ്ങളില്‍ പോയി പണപ്പിരിവ് നടത്തുന്നതിനു നടപടിക്രമങ്ങളും ചട്ടങ്ങളുമുണ്ട്. അതൊന്നും പരിശോധിക്കാതെ എടുത്തുചാടരുത്. സര്‍ക്കാര്‍ ജീവനക്കാരില്‍നിന്നു നിര്‍ബന്ധിത പിരിവ് പാടില്ലെന്നും ചെന്നിത്തല പറഞ്ഞു.


കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.