2019 October 18 Friday
ഏറ്റവും വലിയ പാപം ഞാന്‍ കഴിവുകെട്ടവനാണ് എന്ന വിചാരമാണ്.

ശാസ്താംകോട്ടയില്‍നിന്നുള്ള ജലവിതരണം പ്രതിസന്ധിയില്‍

ശാസ്താംകോട്ട: ശാസ്താംകോട്ടയില്‍ നിന്നും ജില്ലയിലേക്കുള്ള കുടിവെള്ള വിതരണം പ്രതിസന്ധിയില്‍. ശാസ്താംകോട്ട ശുദ്ധജല തടാകത്തില്‍ നിന്നും ജലം പമ്പ് ചെയ്ത് ശുദ്ധീകരിച്ച് വിതരണം ചെയ്യുന്നതിലാണ് ഇപ്പോള്‍ അനിശ്ചിതാവസ്ഥ നിലനില്‍ക്കുന്നത്. വരള്‍ച്ച രൂക്ഷമായതോടെ തടാകത്തില്‍ നിന്നും പമ്പ് ചെയ്ത് എടുക്കുന്ന ജലത്തില്‍ ഓരും നിറവ്യത്യാസവും പ്രകടമായതോടെ പമ്പിങ്ങ് നിറുത്തി വയ്ക്കുകയായിരുന്നു.
തുടര്‍ന്ന് കല്ലട ഇറിഗേഷന്‍ പദ്ധതിയുടെ കനാലില്‍ നിന്നും തടയണ നിര്‍മിച്ച് ജലം പമ്പ് ചെയ്‌തെടുത്തു. എന്നാല്‍ ഒരു ദിവസം കൊണ്ട് ഇതും അവസാനിച്ചു. കനാലിലൂടെ ഒഴുകി വരുന്ന ജലത്തില്‍ കാട്ടുപന്നിയുടെ ചീഞ്ഞളിഞ്ഞ ജഡമടക്കം കണ്ടതോടെ നാട്ടുകാര്‍ പ്രതിഷേധവുമായി രംഗത്തുവന്നതാണ് ഇതിന് കാരണം. തെന്‍മല ഡാമില്‍ നിന്നു കനാല്‍ വഴി 65 കിലോമീറ്ററോളം ഒഴുകിയെത്തുന്ന കനാല്‍ ജലത്തിന്റെ ഗുണനിലവാരം പരിശോധിക്കാതെയാണ് പമ്പ് ചെയ്‌തെടുത്ത് കുടിവെള്ളമായി വിതരണം ചെയ്യുന്നതെന്ന് വ്യാപകമായ പരാതിയെ തുടര്‍ന്നാണ് നാട്ടുകാര്‍ തടഞ്ഞതും കനാല്‍ ജലം പമ്പ് ചെയ്യുന്നത് നിറുത്തിവച്ചതും.
ഇതോടെ ചവറ പന്മന കുടിവെള്ള പദ്ധതിക്കും കൊല്ലം നഗരത്തിനും കുടിവെള്ളമെത്തിക്കാന്‍ തടാകത്തിലെ കലക്കവെള്ളത്തെ ആശ്രയിക്കുകയാണിപ്പോള്‍. ക്ലോറിനേഷനും ജല ശുദ്ധീകരണ നടപടിയും ഫില്‍റ്റര്‍ ഹൗസില്‍ കാര്യക്ഷമമായി നടക്കുന്നില്ലെന്നും പരാതിയുണ്ട്. പൈപ്പുകളിലൂടെ കുടിവെള്ളമെന്ന് പറഞ്ഞ് എത്തുന്നത് എക്കലും മാലിന്യങ്ങളും അടങ്ങിയ കലക്കവെള്ളമാണ്. ഇതു മൂലം ഈ ജലം ഉപയോഗിക്കാന്‍ പറ്റുന്നില്ലെന്ന് മാത്രമല്ല പൊതു ടാപ്പുകളും തകരാറിലായിക്കൊണ്ടിരിക്കുകയാണ്. കൊല്ലം നഗരത്തിലേക്കും ചവറ പന്മന ഉള്‍പ്പടെയുള്ള പദ്ധതികളിലേക്കും സുഗമമായി കുടിവെള്ളം എത്തിക്കുന്നതിന് കഴിഞ്ഞ സര്‍ക്കാര്‍ ആവിഷ്‌കരിച്ച 14.5 കോടി രൂപയുടെ ബദല്‍ കുടിവെള്ള പദ്ധതി പൂര്‍ത്തീകരിച്ചിരുന്നെങ്കില്‍ ഈ അവസ്ഥ ഉണ്ടാകുമായിരുന്നില്ലെന്ന് തടാകസംരക്ഷണ സമിതി ആരോപിച്ചു. കടപ്പഴയില്‍ ശുദ്ധീകരണ പ്ലാന്റ് നിര്‍മ്മിച്ച് പൈപ്പ് വഴി വള്ളം ഫില്‍ല്‍റ്റര്‍ ഹൗസില്‍ എത്തിക്കാനുള്ള പദ്ധതി പാതിവഴി നിറുത്തിവച്ചത് ആരുടെ നിര്‍ദേശപ്രകാരമാണന്ന് അഴിമതി നിരോധനവകുപ്പിന് പോലും കണ്ടെത്താനായില്ല. ജല അതോറിറ്റി വിജിലന്‍സ് യൂനിറ്റിന്റെ അന്വേഷണ റിപ്പോര്‍ട്ടും വെളിച്ചം കണ്ടില്ല. ഇതിന് കാരണക്കാരായവര്‍ക്കെതിരേ അന്വേഷണം നടത്തണമെന്നും തടാകസംരക്ഷണ സമിതി ചെയര്‍മാന്‍ കെ. കരുണാകരന്‍ പിള്ള ആവശ്യപ്പെട്ടു.

 


ഏറ്റവും പുതിയ വാർത്തകൾക്കും വീഡിയോകൾക്കും സബ്‌സ്ക്രൈബ് ചെയ്യുക

കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.

Latest News