2020 February 26 Wednesday
മധ്യേഷ്യൻ സമാധാന കരാർ ചൊവ്വാഴ്ച്ച പ്രഖ്യാപിക്കുമെന്ന് ട്രംപ്

വെടിയുണ്ട കണക്കെ നിങ്ങളെ എടുത്തെറിയും, ഇത് ഹ്യൂമന്‍ സ്ലിങ്‌ഷോട്ട്…


അഡ്വഞ്ചര്‍ പാര്‍ക്കുമായി അണിഞ്ഞൊരുങ്ങാന്‍ കാരാപ്പുഴ ഉദ്ഘാടനം ഈമാസം അവസാനം

 

കല്‍പ്പറ്റ: ഇലാസ്തികയുള്ള വലിയ കയറില്‍ വെടിയുണ്ട കണക്കെ ആളുകളെ എടുത്തെറിയുന്ന സാഹസിക വിനോദം ഹ്യൂമന്‍ സ്ലിങ്‌ഷോട്ട് ഇനി വയനാട്ടിലും. ജലവിഭവ വകുപ്പിനു കീഴിലുള്ള കാരാപ്പുഴ വിനോദസഞ്ചാര കേന്ദ്രത്തിലെ അഡ്വഞ്ചര്‍ പാര്‍ക്കിലാണ് ഈ സാഹസിക വിനോദം ഒരുക്കിയിരിക്കുന്നത്. ഇലാസ്തികതയുള്ള കയര്‍ പ്രത്യേക വാഹനം ഉപയോഗിച്ച് പിന്നോട്ടു വലിച്ചു വിടുമ്പോള്‍ കയറില്‍ ബന്ധിപ്പിച്ചയാള്‍ ഇതിനൊപ്പം വായുവില്‍ ഉയര്‍ന്നു പൊങ്ങുന്നതാണ് ഹ്യൂമന്‍ സ്ലിങ്‌ഷോട്ട്.
ഒരേ സമയം രണ്ട് പേര്‍ക്ക് സഞ്ചരിക്കാവുന്ന ദക്ഷിണേന്ത്യയിലെ ഏറ്റവും നീളമുള്ള സിപ്‌ലൈനും ഇവിടെ സഞ്ചാരികള്‍ക്കായി ഒരുങ്ങുന്നുണ്ട്. പാര്‍ക്കിന്റെ ഉദ്ഘാടനം ഈ മാസം അവസാനം നടത്താനാണ് ജലവിഭവ വകുപ്പിന്റെ പദ്ധതി. വയനാട്ടിലെ പ്രധാന പരിസ്ഥിതി സൗഹൃദ വിനോദസഞ്ചാര കേന്ദ്രമാണ് കാരാപ്പുഴ. ഇവിടം കൂടുതല്‍ സന്ദര്‍ശക സൗഹൃദമാക്കുന്നതിനു വിഭാവനം ചെയ്തതാണ് അഡ്വഞ്ചര്‍ പാര്‍ക്ക്.
ഹ്യൂമന്‍ സ്ലിങ് ഷോട്ടിനും 605 മീറ്റര്‍ നീളമുള്ള സിപ്‌ലൈനിനും പുറമെ ബംഗി ട്രംപോളിന്‍, ട്രംപോളിന്‍ പാര്‍ക്ക്, ഹ്യൂമന്‍ ഗെയ്‌റോ എന്നിവയും പാര്‍ക്കില്‍ സഞ്ചാരികള്‍ക്കായി ഒരുക്കിയിട്ടുണ്ട്. കുട്ടികളുടെ താല്‍പര്യങ്ങള്‍ക്കു മുന്‍തൂക്കം നല്‍കിയ തയാറാക്കിയതാണ് ട്രംപോളിന്‍ പാര്‍ക്ക്. കേരളത്തില്‍ ആദ്യമായാണ് കാരാപ്പുഴയില്‍ ഹ്യൂമന്‍ ഗെയ്‌റോ സംവിധാനം.
ഹ്യൂമന്‍ സ്ലിങ്‌ഷോട്ട്, ബംഗി ട്രംപോളിന്‍ സംവിധാനങ്ങളും ജില്ലയില്‍ നടാടെയാണ്. ഏകദേശം രണ്ടു കോടി രൂപ ചെലവിലാണ് അഡ്വഞ്ചര്‍ പാര്‍ക്ക് സജ്ജീകരിച്ചത്. നാഷനല്‍ അഡ്വഞ്ചര്‍ ഫൗണ്ടേഷനാണ്(എന്‍.എ.എഫ്)മൂന്നു വര്‍ഷം പാര്‍ക്കിന്റെ നടത്തിപ്പവകാശം. കാരാപ്പുഴ എയ്‌റോ അഡ്വഞ്ചര്‍ എന്‍.എ.എഫുമായി സഹകരിക്കും.
2017 മെയ് അഞ്ചിനാണ് കാരാപ്പുഴ ടൂറിസം കേന്ദ്രം ഔദ്യോഗികമായി സഞ്ചാരികള്‍ക്ക് തുറന്നുകൊടുത്തത്. കേന്ദ്ര സര്‍ക്കാര്‍ അനുവദിച്ച രണ്ടു കോടി രൂപയും സംസ്ഥാന സര്‍ക്കാരിന്റെ 5.21 കോടി രൂപയും വിനിയോഗിച്ചു കേരളാ ഇറിഗേഷന്‍ ഇന്‍ഫ്രാസ്ട്രക്ച്ചര്‍ ഡവലപ്‌മെന്റ് കോര്‍പറേഷനാണ് ടൂറിസം കേന്ദ്രത്തില്‍ ഒന്നും രണ്ടും ഘട്ട പ്രവൃത്തികള്‍ നടത്തിയത്. ടൂറിസം വകുപ്പ് അനുവദിച്ച നാലുകോടി രൂപ വിനിയോഗിച്ചായിരുന്നു മൂന്നാംഘട്ട പ്രവൃത്തി നിര്‍വഹണം.
വാച്ച് ടവറുകള്‍, ലോട്ടസ് പോണ്ട്, ഫിഷിങ് ഡക്ക്, നടപ്പാതകള്‍, കുടിലുകള്‍, പാര്‍ക്കിങ് ഏരിയ എന്നിവ മൂന്നാം ഘട്ടത്തില്‍ ഉള്‍പ്പെടുത്തിയ പ്രവൃത്തികളാണ്. ദിവസവും നൂറു കണക്കിനു സഞ്ചാരികളാണ് കാരാപ്പുഴയില്‍ എത്തുന്നത്. രാവിലെ ഒന്‍പതു മുതല്‍ വൈകുന്നേരം ആറു വരെയാണ് ടൂറിസം കേന്ദ്രത്തില്‍ സന്ദര്‍ശകര്‍ക്കു പ്രവേശനം. മുതിര്‍ന്നവര്‍ക്ക് മുപ്പതും 12 വയസിനു താഴെയുള്ളവര്‍ക്ക് പത്തും രൂപയാണ് ടിക്കറ്റ് നിരക്ക്. അഡ്വഞ്ചര്‍ പാര്‍ക്കിലെ സൗകര്യങ്ങള്‍ ആസ്വദിക്കുന്നതിനു പ്രത്യേകം ഫീസ് നല്‍കണം.
ദേശീയപാത 766ല്‍ കാക്കവയലില്‍നിന്നു ഏഴു കിലോമീറ്റര്‍ മാത്രം അകലെയാണ് വിനോദസഞ്ചാര കേന്ദ്രം.
വിവിധോദ്ദേശ്യ പദ്ധതിയാണ് കാരാപ്പുഴ. ജലസേചനത്തിനായാണ് പദ്ധതി വിഭാവനം ചെയ്തത്. കുടിവെള്ള വിതരണത്തിനും അണയിലെ വെള്ളം ഉപയോഗപ്പെടുത്തുന്നുണ്ട്.


ഏറ്റവും പുതിയ വാർത്തകൾക്കും വീഡിയോകൾക്കും സബ്‌സ്ക്രൈബ് ചെയ്യുക

കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.