2019 September 19 Thursday
ദാരിദ്ര്യത്തെക്കുറിച്ച് ലജ്ജിക്കാനില്ല. അതില്‍ ലജ്ജതോന്നുന്നതാണ് ലജ്ജാകരം.

വയോജനങ്ങള്‍ക്കായി പകല്‍വീട് ഒരുങ്ങി

ചങ്ങനാശേരി: നിര്‍മാണം പൂര്‍ത്തിയായി വയോജനങ്ങളെ കാത്ത് പകല്‍വീട് ഒരുങ്ങി. തൃക്കൊടിത്താനം പഞ്ചായത്തിന്റെ തനതു ഫണ്ടില്‍ നിന്നാണ് സംരംഭത്തിനായുള്ള തുക കണ്ടെത്തിയത്. ഒറ്റപ്പെട്ട് കഴിയുന്ന വയോജനങ്ങള്‍ക്കും മുതിര്‍ന്ന പൗരന്‍മാര്‍ക്കും തണലായി തൃക്കൊടിത്താനത്ത് പകല്‍വീട് ഒരുങ്ങിയിരിക്കുന്നത്.
വാര്‍ധക്യമെന്നാല്‍ ഉപേക്ഷിക്കപ്പെടേണ്ട കാലമല്ല മറിച്ച് സംരക്ഷിക്കപ്പെടേണ്ട കാലമാണ് എന്ന കാഴ്ച്ചപ്പാടാണ് വയോജനങ്ങള്‍ക്കായി ഒരു പകല്‍വീട് എന്ന ആശയത്തിലേക്ക് തൃക്കൊടിത്താനം പഞ്ചായത്തിനെ എത്തിച്ചത്. പകല്‍സമയങ്ങളില്‍ വീടുകളില്‍ ഒറ്റയ്ക്കാവുന്ന വയോജനങ്ങള്‍ക്ക് വിശ്രമിക്കാനും വിനോദങ്ങളില്‍ ഏര്‍പ്പെടുന്നതിനുമായാണ് പകല്‍വീട് നിര്‍മിച്ചത്. മാനസിക ഉല്ലാസത്തിനായി ചെസ് ബോര്‍ഡ്, വിനോദോപാധിയായി ടെലിവിഷന്‍ തുടങ്ങിയ സൗകര്യങ്ങള്‍ ഇവിടെയുണ്ടാകും. ഉച്ചഭക്ഷണവും നല്‍കും. പരിപാലനത്തിനായി മെഡിക്കല്‍ സേവനവും ലഭ്യമാക്കും. 60 വയസിനു മുകളില്‍ പ്രായമുള്ള നിരാംലംബരായവര്‍ക്കാണ് പകല്‍വീട് ആശ്രയമാകുന്നത്. പഞ്ചായത്തിന്റെ ഫണ്ടില്‍ നിന്ന് 25 ലക്ഷം രൂപ ചിലവഴിച്ചാണ് പദ്ധതി പൂര്‍ത്തീകരിച്ചിരിക്കുന്നത്. രാവിലെ ഒന്‍പതു മുതല്‍ വൈകിട്ട് ആറുവരെയാണ് പകല്‍വീടിന്റെ പ്രവര്‍ത്തനസമയം നിശ്ചയിച്ചിട്ടുള്ളത്. പ്രവേശനം സൗജന്യമാണ്.
വിനോദങ്ങള്‍ക്കുള്ള മുറി, വായനശാല, വിശ്രമ മുറി, പാചകശാല, ശുചിമുറി തുടങ്ങിയ സൗകര്യങ്ങളാണ് കെട്ടിടത്തിലുണ്ടാവുക. വീടിന്റെ വിരസതകളില്‍ നിന്നും മാറി ഉല്ലാസപ്രദമായ ജീവിതത്തിനുള്ള അവസരമാണ് പകല്‍വീട്ടില്‍ ഇവര്‍ക്ക് ലഭിക്കുന്നത്. വായിക്കാനും വര്‍ത്തമാനം പറയാനും ഒന്നിച്ചിരുന്നു ടിവി കാണാനും മാത്രമല്ല ആശയങ്ങള്‍ പങ്കുവെക്കാനും ഇഷ്ടവിനോദങ്ങളിലേര്‍പ്പെടാനും സാധിക്കുന്നു കൂടാതെ ഇടക്കിടെ ചായയോ ഭക്ഷണമോ വേണ്ടവര്‍ക്ക് അതും പകല്‍വീട്ടില്‍ കിട്ടും.
ഇതിനു പുറമെ ആരോഗ്യ സംരക്ഷണ ക്യാംപുകളും മറ്റു നടത്തുന്നതിനുള്ള സൗകര്യവും ഒരുക്കുമെന്ന് പഞ്ചായത്ത് പ്രസിഡന്റ് എന്‍.രാജു പറഞ്ഞു.


ഏറ്റവും പുതിയ വാർത്തകൾക്കും വീഡിയോകൾക്കും സബ്‌സ്ക്രൈബ് ചെയ്യുക

കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.

Latest News