2019 April 24 Wednesday
പരാജയം ഒരു കുറ്റമേയല്ല. എന്നാല്‍, പരാജയത്തില്‍ നിന്നു പാഠം പഠിക്കാതിരിക്കല്‍ ഒരു കുറ്റം തന്നെയാണ് -വാള്‍ട്ടര്‍ റിസ്റ്റണ്‍

റയലിന് സമനിലക്കുരുക്ക്

വാര്‍സ്വവ: ആറു ഗോളുകള്‍ പിറന്ന ത്രില്ലര്‍ പോരാട്ടത്തില്‍ നിലവിലെ ചാംപ്യന്‍മാരായ റയല്‍ മാഡ്രിഡിനെ പോളണ്ട് ക്ലബ് ലെഗിയ വാര്‍സ്വവ 3-3നു സമനിലയില്‍ പിടിച്ചു. വിസിലൂതി 57ാം സെക്കന്‍ഡില്‍ തന്നെ വല ചലിപ്പിച്ച് ഗെരത് ബെയ്ല്‍ മാനസികാധിപത്യം റയലിനു സമ്മാനിച്ചെങ്കിലും കെടാത്ത പോരാട്ട വീര്യം പുറത്തെടുത്ത് ലെഗിയ ചാംപ്യന്‍മാരെ ഞെട്ടിക്കുകയായിരുന്നു. പെപ്പയും റാമോസും ഇല്ലാത്ത പ്രതിരോധത്തിലെ പാളിച്ചകളാണ് റയലിനു ഉറപ്പായിരുന്ന വിജയം നിഷേധിച്ചത്. ഒരു ഘട്ടത്തില്‍ 3-2 എന്ന നിലയില്‍ റയല്‍ പിന്നിലായിരുന്നു. 85ാം മിനുട്ടില്‍ കൊവാകിച് നേടിയ ഗോളാണ് സമനിലയുടെ ആശ്വാസം നിലവിലെ ചാംപ്യന്‍മാര്‍ക്ക് സമ്മാനിച്ചത്. റയലിനായി ബെയ്ല്‍, കൊവാകിച് എന്നിവര്‍ക്ക് പുറമേ കരിം ബെന്‍സമയും വല കുലുക്കി. ലെഗിയക്കായി ഒഡ്ജിഡ്ജ, റഡോവിച്, മൗലിന്‍ എന്നിവര്‍ സ്‌കോര്‍ ചെയ്തു.
മറ്റു മത്സരങ്ങളില്‍ കരുത്തരായ യുവന്റസിനെ ഒളിംപിക് ലിയോണ്‍ 1-1നും ലെയ്സ്റ്റര്‍ സിറ്റിയെ കൊബന്‍ഹ്വാന്‍ ഗോള്‍രഹിത സമനിലയിലും തളച്ചു. ജര്‍മന്‍ കരുത്തരായ ബൊറൂസിയ ഡോര്‍ട്മുണ്ട് 1-0ത്തിനു സ്‌പോര്‍ടിങിനെയും സെവിയ്യ 4-0ത്തിനു ഡൈനാമോ സഗ്രെബിനേയും പോര്‍ടോ 1-0ത്തിനു ക്ലബ് ബ്രുഗ്ഗയേയും ബയര്‍ ലെവര്‍കൂസന്‍ കരുത്തരായ ടോട്ടനം ഹോട്‌സ്പറിനെ 1-0ത്തിനും മൊണാക്കോ 3-0ത്തിനു സി.എസ്.കെ.എ മോസ്‌കോവിനേയും പരാജയപ്പെടുത്തി.
അഡ്രിയാന്‍ റാമോസിന്റെ ഗോളിലാണ് ബൊറൂസിയ വിജയിച്ചത്. ടോട്ടനം സ്വന്തം തട്ടകത്തിലാണ് തോല്‍വി വഴങ്ങിയത്. കാംപല്‍ നേടിയ ഏക ഗോളിലാണ് ലെവര്‍കൂസന്‍ ടോട്ടനത്തെ വീഴ്ത്തിയത്.
ജയത്തോടെ ടോട്ടനത്തെ പിന്തള്ളി ലെവര്‍കൂസന്‍ ഗ്രൂപ്പ് ഇയില്‍ രണ്ടാം സ്ഥാനത്തേക്ക് കയറി പ്രീ ക്വാര്‍ട്ടര്‍ സാധ്യത വര്‍ധിപ്പിച്ചു. ഗ്രൂപ്പ് എഫില്‍ ബൊറൂസിയ ഒന്നാം സ്ഥാനത്തും റയല്‍ രണ്ടാമതും. ഗോള്‍രഹിത സമനിലയെങ്കിലും ഗ്രൂപ്പ് ജിയില്‍ ലെയ്സ്റ്റര്‍ സിറ്റി ഒന്നാം സ്ഥാനത്ത് തുടരുമ്പോള്‍ പോര്‍ടോ രണ്ടാമത്. ഗ്രൂപ്പ് എചില്‍ വിജയത്തോടെ സെവിയ്യ ഒന്നാം സ്ഥാനത്തേക്ക് കയറിയപ്പോള്‍ സമനില വഴങ്ങിയ യുവന്റസ് രണ്ടാമത്.


ഏറ്റവും പുതിയ വാർത്തകൾക്കും വീഡിയോകൾക്കും സബ്‌സ്ക്രൈബ് ചെയ്യുക

കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.