2019 August 24 Saturday
സുഹൃത്തുക്കളോടു നന്നായി പെരുമാറുക; അവര്‍ നിങ്ങളോടു കൂടുതല്‍ അടുക്കും. ശത്രുക്കളോടും നന്നായി പെരുമാറുക;അവരെ നേടാന്‍ നിങ്ങള്‍ക്കു കഴിയും.

യു.പിയില്‍ മാധ്യമ പ്രവര്‍ത്തകന് പൊലിസിന്റെ മര്‍ദനം; മൂത്രം കുടിപ്പിച്ചതായി പരാതി

ലഖ്‌നൗ: ഉത്തര്‍പ്രദേശില്‍ മാധ്യമ പ്രവര്‍ത്തകനുനേരെ റെയില്‍വേ പൊലിസിന്റെ മര്‍ദനം. മുഖ്യമന്ത്രി യോഗി ആദിത്യനാഥിനെ സമൂഹമാധ്യമങ്ങളിലൂടെ അപകീര്‍ത്തിപ്പെടുത്തിയെന്ന് ആരോപിച്ച് മാധ്യമ പ്രവര്‍ത്തകനെ പൊലിസ് അറസ്റ്റ് ചെയ്തതിനു പിന്നാലെയാണ് വീണ്ടും മറ്റൊരു മാധ്യമ പ്രവര്‍ത്തകനുനേരെയും പൊലിസ് അതിക്രമമുണ്ടായത്.
ചൊവ്വാഴ്ച രാത്രി ശാമിലി ജില്ലയില്‍ ഒരു ചരക്കുവണ്ടി പാളം തെറ്റിയത് റിപ്പോര്‍ട്ട് ചെയ്യാനെത്തിയ ന്യൂസ്-24 ചാനലിന്റെ ലേഖകന്‍ അമിത് ശര്‍മക്കുനേരെയാണ് പൊലിസിന്റെ ആക്രമണം. യൂനിഫോമിലല്ലാത്ത പൊലിസുകാര്‍ സംഘം ചേര്‍ന്ന് ഇയാളെ ആക്രമിക്കുകയും മൂത്രം കുടിപ്പിച്ചതായും ആരോപണമുയര്‍ന്നിട്ടുണ്ട്.

പൊലിസുകാരില്‍ ഒരാള്‍ തന്റെ കാമറ തട്ടിതാഴെയിട്ടു. ഇതെടുക്കാന്‍ കുനിഞ്ഞതോടെ സംഘം മര്‍ദിക്കുകയായിരുന്നു. പിന്നീട് സ്റ്റേഷനില്‍ കൊണ്ടുപോയി വിവസ്ത്രനാക്കി ലോക്കപ്പിലാക്കി. ഇവിടെവച്ച് വീണ്ടും മര്‍ദിക്കുകയും മൂത്രം കുടിപ്പിക്കുകയും ചെയ്തതായി അമിത് ശര്‍മ പറയുന്നു.
ഇതുസംബന്ധിച്ച വാര്‍ത്ത ന്യൂസ്-24 ചാനല്‍ പുറത്തുവിട്ടതോടെയാണ് സംഭവം പുറത്തറിയുന്നത്. മാധ്യമപ്രവര്‍ത്തകനെ അറസ്റ്റ് ചെയ്ത വാര്‍ത്തയറിഞ്ഞ് നിരവധി മാധ്യമ പ്രവര്‍ത്തകര്‍ പൊലിസ് സ്റ്റേഷനില്‍ എത്തിയിരുന്നു. ഇവരുടെ പ്രതിഷേധത്തെ തുടര്‍ന്ന് ഇന്നലെ രാവിലെയാണ് മാധ്യമ പ്രവര്‍ത്തകനെ മോചിപ്പിച്ചത്. സംഭവത്തിന്റെ പശ്ചാത്തലത്തില്‍ സി.സി.ടി.വി കാമറാ ദൃശ്യങ്ങള്‍ പരിശോധിച്ച ഉന്നത പൊലിസ് ഉദ്യോഗസ്ഥര്‍, മാധ്യമ പ്രവര്‍ത്തകനെ ആക്രമിച്ച സ്റ്റേഷന്‍ ഓഫിസര്‍, ഒരു കോണ്‍സ്റ്റബിള്‍ എന്നിവരെ സസ്‌പെന്‍ഡ് ചെയ്തു.

 


ഏറ്റവും പുതിയ വാർത്തകൾക്കും വീഡിയോകൾക്കും സബ്‌സ്ക്രൈബ് ചെയ്യുക

കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.

Latest News