2018 November 18 Sunday
ജീവിച്ചതല്ല ജീവിതം, നാം ഓര്‍മയില്‍ വയ്ക്കുന്നതാണ്, പറഞ്ഞു കേള്‍പ്പിക്കാന്‍ വേണ്ടി നാം ഓര്‍മ്മയില്‍ വയ്ക്കുന്നതാണു ജീവിതം

യു.എസ് അറ്റോര്‍ണി ജനറല്‍ രാജിവച്ചു

 

വാഷിങ്ടണ്‍: യു.എസ് അറ്റോര്‍ണി ജനറല്‍ ജെഫ് സെഷന്‍സ് രാജിവച്ചു. പ്രസിഡന്റ് ഡൊണാള്‍ഡ് ട്രംപിന്റെ ആവശ്യപ്രകാരമാണ് രാജിയെന്ന് അദ്ദേഹം രാജിക്കത്തില്‍ പറയുന്നു. സെഷന്‍സിന്റെ ചീഫ് സ്റ്റാഫായിരുന്ന മാത്യൂ വിറ്റകറിനെ പകരം ചുമതലയേല്‍പ്പിച്ചതായി യു.എസ് പ്രസിഡന്റ് ഡൊണാള്‍ഡ് ട്രംപ് ട്വീറ്റ് ചെയ്തു.
സ്ഥിരം അറ്റോര്‍ണി ജനറലിനെ പിന്നീട് നിയമിക്കുമെന്നു ട്രംപ് അറിയിച്ചു. ട്രംപിനെ ശക്തമായി പിന്തുണച്ചിരുന്ന സെഷന്‍സ്, കുടിയേറ്റ വിരുദ്ധ തീരുമാനങ്ങള്‍ നടപ്പിലാക്കുന്നതില്‍ മുഖ്യ പങ്കുവഹിച്ചിരുന്നു.
സെനറ്റ് ആംഡ് കമ്മിറ്റി അംഗമായിരിക്കെ റഷ്യന്‍ ഉദ്യോഗസ്ഥരുമായി ഇദ്ദേഹം കൂടിക്കാഴ്ച നടത്തിയതായി ജസ്റ്റിസ് കമ്മിറ്റി സ്ഥിരീകരിച്ചിരുന്നു. 2016ലെ പ്രസിഡന്റ് തെരഞ്ഞെടുപ്പിലെ റഷ്യന്‍ ഇടപെടലുമായി ബന്ധപ്പെട്ട് ട്രംപിനും സെഷന്‍സിനുമിടയില്‍ അസ്വാരസ്യങ്ങള്‍ ഉടലെടുത്തിരുന്നു.
തെരഞ്ഞെടുപ്പിലെ റഷ്യന്‍ ഇടപെടല്‍ സംബന്ധിച്ച് സ്‌പെഷല്‍ കൗണ്‍സില്‍ റോബര്‍ട്ട് മ്യൂളറിന്റെ അന്വേഷണത്തിനുള്ള മേല്‍നോട്ടം താല്‍ക്കാലിക അറ്റോര്‍ണി ജനറല്‍ വഹിക്കുമെന്ന് ജസ്റ്റിസ് ഡിപ്പാര്‍ട്ട്‌മെന്റ് അറിയിച്ചു.
മ്യൂളറിന്റെ നേതൃത്വത്തിലുള്ള അന്വേഷണത്തെ മാത്യു വിറ്റകര്‍ നേരത്തെ പരസ്യമായി വിമര്‍ശിച്ചിരുന്നു. ഇടക്കാല തെരഞ്ഞെടുപ്പ് കഴിഞ്ഞു മണിക്കൂറുകള്‍ക്കുള്ളില്‍ സര്‍ക്കാരിന്റെ ഏറ്റവും പ്രധാനപ്പെട്ട ചുമതല വഹിക്കുന്നയാളെ മാറ്റിയത് ട്രംപുമായി അടുപ്പമുള്ളവരെപ്പോലും ഞെട്ടിച്ചിരിക്കുകയാണ്.

 


കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.