2019 August 19 Monday
തെറ്റു ചെയ്യുന്നവന്‍ മനുഷ്യനാണ്; അതിനെക്കുറിച്ചോര്‍ത്തു ദു:ഖിക്കുന്നവന്‍ മഹര്‍ഷിയാണ്; എന്നാല്‍ അതില്‍ അഭിമാനം കൊള്ളുന്നവന്‍ പിശാചാണ്.

യമനില്‍ ബ്രിട്ടീഷ് നിര്‍മിത ക്ലസ്റ്റര്‍ ബോംബുകള്‍ ഉപയോഗിക്കില്ലെന്ന് സഊദി

നിസാര്‍ കലയത്ത്

ജിദ്ദ: സഊദിയുടെ നേതൃത്വത്തിലുള്ള അറബ് സഖ്യം ബ്രിട്ടീഷ് നിര്‍മിത ക്ലസ്റ്റര്‍ ബോംബുകള്‍ യമനില്‍ ഉപയോഗിക്കുന്നത് നിര്‍ത്തുമെന്ന് സഊദി ഗവണ്‍മെന്റ് അറിയിച്ചു.

അറബ് സഖ്യസേന ബ്രിട്ടീഷ് നിര്‍മിത ക്ലസ്റ്റര്‍ ബോംബുകള്‍ ‘പരിമിതമായ തോതില്‍’ യമനില്‍ വര്‍ഷിച്ചതായി ബ്രിട്ടീഷ് പ്രതിരോധ മന്ത്രി മൈക്കല്‍ ഫാലണ്‍ തിങ്കളാഴ്ച്ച പാര്‍ലമെന്റില്‍ പറഞ്ഞിരുന്നു.

ബി.എല്‍ 755 വിഭാഗത്തില്‍പ്പെട്ട ക്ലസ്റ്റര്‍ ബോംബുകളുടെ ഉപയോഗം നിര്‍ത്തി വയ്ക്കാന്‍ തീരുമാനിച്ച വിവരം സഊദി സര്‍ക്കാര്‍ സ്ഥിരീകരിക്കുകയും, തീരുമാനം ബ്രിട്ടീഷ് സര്‍ക്കാറിനെ അറിയിക്കുകയും ചെയ്തിട്ടുണ്ട്.

ഇതാദ്യമായാണ് ക്ലസ്റ്റര്‍ ബോംബുകളുടെ ഉപയോഗം സഊദി സ്ഥിരീകരിക്കുന്നത്. ‘വളരെ പരിമിതമായ തോതില്‍ ബി.എല്‍ 755 ബോംബുകള്‍ ഉപയോഗിച്ചിട്ടുണ്ട്. പക്ഷെ ജനവാസകേന്ദ്രങ്ങളില്‍ അവ ഉപയോഗിച്ചിട്ടില്ല. സിവിലിയന്‍മാര്‍ തിങ്ങിപ്പാര്‍ക്കുന്ന മേഖലകളില്‍ ഞങ്ങള്‍ ബോംബാക്രമണം നടത്താറില്ല.’ സഊദി ബ്രിഗേഡിയര്‍ ജനറല്‍ അഹ്മദ് അല്‍അസീരി പറഞ്ഞു. ഹൂതി മിലീഷ്യകളുടെ ആക്രമണങ്ങളെ പ്രതിരോധിക്കുന്നതിന് അവരുടെ സൈനിക കേന്ദ്രങ്ങളെ ലക്ഷ്യംവച്ച് മാത്രമാണ് ക്ലസ്റ്റര്‍ ബോംബുകള്‍ ഉപയോഗിച്ചിട്ടുള്ളതെന്നും അദ്ദേഹം കൂട്ടിച്ചേര്‍ത്തു.

ഒരു വിശാലമായ ഭൂപ്രദേശത്ത് നൂറുകണക്കിന് ചെറുബോംബുകളായി ചിതറി നാശനഷ്ടം വിതക്കാന്‍ കഴിവുള്ളവയാണ് ക്ലസ്റ്റര്‍ ബോംബുകള്‍. ഇത് ഇവയില്‍ പലതും പൊട്ടിത്തെറിക്കാറില്ല. ഇവ പിന്നീട് സംഘര്‍ഷം അവസാനിച്ചതിന് ശേഷം പൊട്ടിത്തെറിക്കാറാണ് പതിവ്. പൊട്ടാതെ കിടക്കുന്നവയുടെ കളിപ്പാട സമാനമായ രൂപം കുട്ടികളെ ആകര്‍ഷിക്കുന്നതിനാല്‍ കുട്ടികളാണ് ഇവയുടെ പ്രധാന ഇരകള്‍.


ഏറ്റവും പുതിയ വാർത്തകൾക്കും വീഡിയോകൾക്കും സബ്‌സ്ക്രൈബ് ചെയ്യുക

കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.