2019 September 18 Wednesday
ദാരിദ്ര്യത്തെക്കുറിച്ച് ലജ്ജിക്കാനില്ല. അതില്‍ ലജ്ജതോന്നുന്നതാണ് ലജ്ജാകരം.

യമനിലേക്ക് സഹായവുമായി പുറപ്പെട്ട യു.എ.ഇ കപ്പലിനു നേരെ ഹൂതികള്‍ ആക്രമണം നടത്തി

അബ്ദുസ്സലാം കൂടരഞ്ഞി

റിയാദ്: യമനിലെ കലാപകാരികളായ ഹൂതികള്‍ യു.എ.ഇ കപ്പലിനു നേരെ കടലിടുക്കില്‍ വെച്ച് ആക്രമണം നടത്തി. സോമാലിയക്കും യമനിനും ഇടയിലുള്ള ബാബ് അല്‍ മന്‍ദബ് കപ്പല്‍ ചാലിലാണ് കഴിഞ്ഞ ദിവസം ഹൂതി തീവ്രവാദികള്‍ ആക്രമണം നടത്തി കപ്പല്‍ പിടികൂടാന്‍ ശ്രമം നടത്തിയതെന്ന് അറബ് സഖ്യ സേന യുടെ പിന്തുണയുള്ള യമന്‍ പ്രസിഡന്റ് അബ്ദുറബ്ബ് മന്‍സൂര്‍ ഹാദി അന്താരാഷ്ട്ര മാധ്യമങ്ങളോട് വ്യക്തമാക്കി. ഇതോടെ അന്താരാഷ്ട്ര കപ്പലുകള്‍ക്ക് ഇതേ പാതയില്‍ സഞ്ചരിക്കുന്നതിനു വന്‍ ഭീഷണിയാണ് ഹൂത്തികളെന്നും വ്യക്തമായതായി അദ്ദേഹം പറഞ്ഞു. 

യമനിലെ ഏദനിലേക്ക് സഹായ ഹസ്തവുമായി പുറപ്പെട്ട കപ്പലാണ് ഹൂതികള്‍ ആക്രമിച്ചു കീഴടക്കിയത്. റോക്കറ്റുകളും മറ്റു ആയുധങ്ങളും ഉപയോഗിച്ചാണ് ഹൂതികള്‍ കപ്പല്‍ തകര്‍ക്കാന്‍ ശ്രമിച്ചത്. എന്നാല്‍ അറബ് സഖ്യ സൈന്യത്തിന്റെ നാവിക സേന വിഭാഗം ഹൂതികള്‍ളെ തുരത്തി കപ്പല്‍ സംരക്ഷിക്കുകയായിരുന്നു. ആക്രമണം നേരിട്ട കപ്പലില്‍ നിന്നും ജീവനക്കാരെ സഖ്യ സേന രക്ഷപ്പെടുത്തിയിട്ടുണ്ട്.

ബാബ് അല്‍ മന്‍ദബ് കപ്പല്‍ ചാലില്‍ കൂടി സഞ്ചരിക്കുന്നവര്‍ക്ക് ഹൂത്തികളുടെ ആക്രമണം ഭീഷണിയായി മാറിയതായി സഖ്യ സേന വ്യക്തമാക്കി. എന്നാല്‍ ഹൂത്തികള്‍ക്ക് ഇവിടെയും വിജയിക്കാന്‍ കഴിയില്ലെന്നും സഖ്യ സേന അവരെ നേരിടുമെന്നും റിട്ടയേര്‍ഡ് റിയര്‍ അഡ്മിറലും സൈനിക വിശകലന നിപുണനുമായ ഷാമി അല്‍ സവാഹിരി പറഞ്ഞു.

ചെങ്കടലിന്റെയും ഇന്ത്യന്‍ മഹാ സമുദ്രത്തിലേക്ക് നീളുന്ന ഏദന്‍ ഉള്‍ക്കടലിന്റെയും ഇടയിലെ അതി പ്രധാന ജല പാതയാണ് ഹൂതികള്‍ കയ്യടക്കാന്‍ ശ്രമം നടക്കുന്നത്. അതെ സമയം, മീന്‍ പിടുത്ത ബോട്ടിനു നേരെ അറബ് സഖ്യ സൈന്യം നടത്തിയ ആക്രമണത്തില്‍ അഞ്ചു സിവിലിയന്മാര്‍ കൊല്ലപ്പെട്ടുകയും ആറു പേര്‍ക്ക് പരുക്കേല്‍ക്കുകയും ചെയ്തതായി ഹൂതികള്‍ വ്യക്തമാക്കി.


ഏറ്റവും പുതിയ വാർത്തകൾക്കും വീഡിയോകൾക്കും സബ്‌സ്ക്രൈബ് ചെയ്യുക

കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.