2018 November 13 Tuesday
ലോകത്തെ മാറ്റാന്‍ നിങ്ങള്‍ ചിന്തകളെ മാറ്റൂ

മേഖലാടിസ്ഥാനത്തില്‍ ധനസമാഹരണം 12 മുതല്‍

കൊല്ലം: കേരളത്തിന്റെ പുനര്‍നിര്‍മാണം ലക്ഷ്യമിടുന്ന മുഖ്യമന്ത്രിയുടെ ദുരിതാശ്വാസ നിധിയിയിലേക്കുള്ള ജില്ലാതല ധനസമാഹരണ യജ്ഞം കനിവോടെ കൊല്ലത്തിന്റെ ഭാഗമായി സെപ്റ്റംബര്‍ 12 മുതല്‍ 14 വരെ താലൂക്ക് അടിസ്ഥാനത്തില്‍ സംഭാവനകള്‍ സ്വീകരിക്കും. ജില്ലയുടെ ചുമതലയുള്ള മന്ത്രി ജെ. മേഴ്‌സിക്കുട്ടിയമ്മയും മറ്റ് ജനപ്രതിനിധികളും താലൂക്ക് കേന്ദ്രങ്ങളില്‍ നേരിട്ടാണ് തുക സ്വീകരിക്കുക.
12ന് രാവിലെ 10.30 മുതല്‍ 12.30 വരെ കരുനാഗപ്പള്ളി താലൂക്ക് ഓഫിസില്‍ ആദ്യ പരിപാടി നടക്കും. അന്ന് ഉച്ചകഴിഞ്ഞ് രണ്ട് മുതല്‍ നാല് വരെ കുന്നത്തൂര്‍ താലൂക്ക് ഓഫിസ്, 13ന് രാവിലെ 10.30 മുതല്‍ 12.30 വരെ കൊട്ടാരക്കര താലൂക്ക് ഓഫിസ്, ഉച്ചകഴിഞ്ഞ് രണ്ട് മുതല്‍ നാല് വരെ കടയ്ക്കല്‍, 14ന് രാവിലെ 10.30 മുതല്‍ 12.30 വരെ കൊല്ലം കലക്ടറേറ്റ്, ഉച്ചകഴിഞ്ഞ് രണ്ട് മുതല്‍ നാലു വരെ പുനലൂര്‍ താലൂക്ക് ഓഫിസ്, നാല് മുതല്‍ ആറുവരെ പത്തനാപുരം താലൂക്ക് ഓഫിസ് എന്നിങ്ങനെയാണ് മറ്റ് കേന്ദ്രങ്ങളിലെ ധനസമാഹരണ പരിപാടിയുടെ സമയക്രമം.
ദുരിതാശ്വാസ നിധിയിലേക്ക് തുക സമാഹരിക്കുന്നതിന്റെ ഭാഗമായി എല്ലാ ഗ്രാമപഞ്ചായത്ത് കമ്മിറ്റികളുടെയും അടിയന്തര യോഗം ഇന്ന് നടത്തണമെന്നും അതത് പ്രദേശങ്ങളിലെ വില്ലേജ് ഓഫിസര്‍മാരെയും സഹകരണ ബാങ്ക് പ്രസിഡന്റുമാരെയും നിര്‍വഹണ ഉദ്യോഗസ്ഥരെയും പങ്കെടുപ്പിക്കണമെന്നും പഞ്ചായത്ത് ഡെപ്യൂട്ടി ഡയരക്ടര്‍ അറിയിച്ചു.
സംഭാവന നല്‍കാന്‍ സന്നദ്ധതയുള്ളവരുടെ പട്ടിക യോഗത്തില്‍ തയാറാക്കുകയും തുടര്‍ന്നുള്ള ദിവസങ്ങളില്‍ ഈ പട്ടിക പ്രകാരം വ്യക്തികളെയും സ്ഥാപനങ്ങളെയും നേരില്‍ സമീപിച്ച് സംഭാവന സ്വീകരിക്കുകയും ചെയ്യണം. ഇങ്ങനെ ലഭിക്കുന്ന തുക അതത് താലൂക്ക് കേന്ദ്രങ്ങളില്‍ മന്ത്രിക്ക് കൈമാറണം. വ്യക്തികള്‍ക്ക് നേരിട്ടും സംഭാവന മന്ത്രിക്ക് നല്‍കാം.
ഗ്രാമപഞ്ചായത്ത് ഓഫിസുകളിലെ ഫ്രണ്ട് ഓഫിസില്‍ തുക സ്വീകരിച്ച് രസീത് നല്‍കാനും ക്രമീകരണമുണ്ടാകണം. ഇങ്ങനെ സ്വീകരിക്കുന്ന പണവും താലൂക്ക് കേന്ദ്രത്തില്‍ മന്ത്രിക്ക് നല്‍കണം. താലൂക്ക് കേന്ദ്രങ്ങളില്‍ തുക കൈമാറാന്‍ കഴിയാത്തവര്‍ക്ക് 15ന് കൊല്ലം കലക്ടറേറ്റില്‍ മന്ത്രിക്ക് പണം കൈമാറാന്‍ പ്രത്യേക സജ്ജീകരണം ഏര്‍പ്പെടുത്തും.
പഞ്ചായത്ത് മേഖലകളിലെ ട്രേഡ് യൂനിയന്‍ പ്രവര്‍ത്തകരുടെയും സന്നദ്ധ പ്രവര്‍ത്തകരുടെയും യോഗം പഞ്ചായത്ത് പ്രസിഡന്റിന്റെ നേതൃത്ത്വത്തില്‍ വിളിച്ചു ചേര്‍ത്ത് ദുരിതാശ്വാസ നിധിയിലേക്ക് സംഭാവന സ്വീകരിക്കുന്നതിന്റെ വിശദാംശങ്ങള്‍ അവതരിപ്പിക്കണം. സംഭാവന സ്വീകരിക്കുന്ന പ്രവര്‍ത്തനങ്ങളില്‍ ഇവരുടെ പങ്കാളിത്തവും ഉറപ്പാക്കാം.
പഞ്ചായത്തുകളുടെ തനത് ഫണ്ടില്‍നിന്നും മുഖ്യമന്ത്രിയുടെ ദുരിതാശ്വാസ നിധിയിലേക്ക് നല്‍കുന്ന സംഭാവന താലൂക്ക് കേന്ദ്രങ്ങളില്‍ മന്ത്രിക്ക് നേരിട്ട് കൈമാറണം. പഞ്ചായത്തുകളില്‍ സ്വീകരിക്കുന്ന തുക അതത് താലൂക്ക് കേന്ദ്രങ്ങളില്‍ നിശ്ചയിച്ച തീയതികളില്‍ ചെക്കായോ ഡി.ഡിയായോ എത്തിക്കണം.


കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.