2020 July 14 Tuesday
കോവിഡിനെതിരെ പ്രതിരോധം ശക്തമാക്കി ബഹ്റൈന്‍; രാജ്യത്ത് പരീക്ഷണാടിസ്ഥാനത്തില്‍ ഇനി പ്ലാസ്മ ചികിത്സയും

മലപ്പുറം ഉപതെരഞ്ഞെടുപ്പ്: നാളെ കലാശക്കൊട്ട്

ഫസല്‍ മറ്റത്തൂര്‍

മലപ്പുറം: ഒരു മാസത്തിലധികംനീണ്ട തെരഞ്ഞെടുപ്പ് പ്രചാരണത്തിന് നാളെ കൊടിയിറങ്ങും. 12ന് നടക്കുന്ന മലപ്പുറം ലോക്‌സഭാ മണ്ഡലം ഉപതെരഞ്ഞെടുപ്പ് പ്രചാരണത്തിന് നാളെ വൈകിട്ട് ആറിനാണ് കലാശക്കൊട്ട്. തെരഞ്ഞെടുപ്പ് കമ്മിഷന്റെ പ്രഖ്യാപനത്തെ തുടര്‍ന്ന് മാര്‍ച്ച് 16നാണ് മലപ്പുറത്ത് ഉപതെരഞ്ഞെടുപ്പിന്റെ വിജ്ഞാപനമിറങ്ങിയത്.

2019ലെ ലോക്‌സഭാ തെരഞ്ഞെടുപ്പിനു മുന്നോടിയായി നടക്കുന്ന ഉപതെരഞ്ഞെടുപ്പ്് എന്നതിനാല്‍ ദേശീയ പ്രാധാന്യത്തോടെയുള്ള പ്രചാരണമാണ് മലപ്പുറത്ത് നടന്നത്. മുസ്്‌ലിം ലീഗിന്റെ ഉരുക്കുകോട്ടയില്‍ ഇടത്-വലതു മുന്നണികള്‍ സംസ്ഥാന നേതാക്കളെ അണിനിരത്തിയപ്പോള്‍ പാര്‍ട്ടിയുടെ ന്യൂനപക്ഷ മുഖങ്ങളെ അണിനിരത്തി ന്യൂനപക്ഷ മേഖലയില്‍ സാനിധ്യമറിയിക്കാനുള്ള ശ്രമാണ് ബി.ജെ.പി നടത്തിയത്.

മുസ്്‌ലിം ലീഗ് ദേശീയ ജനറല്‍ സെക്രട്ടറി പി.കെ കുഞ്ഞാലിക്കുട്ടിയുടെ പ്രചാരണത്തിന് ലീഗ് നേതാക്കളേക്കാള്‍ സംസ്ഥാനത്തെ കോണ്‍ഗ്രസിന്റെ മുഴുവന്‍ നേതാക്കളും സജീവമായതാണ്് തെരഞ്ഞെടുപ്പിലെ ശ്രദ്ധേയ കാഴ്ച. പ്രതിപക്ഷ നേതാവ് രമേശ് ചെന്നിത്തല, മുന്‍ മുഖ്യമന്ത്രി ഉമ്മന്‍ചാണ്ടി എന്നിവര്‍ പ്രചാരണത്തിന്റെ ആദ്യ ഘട്ടത്തില്‍ ജില്ലയിലെത്തിയവരാണ്. ഗൃഹസമ്പര്‍ക്ക പരിപാടികളില്‍ ഉള്‍പ്പെടെ സജീവമായ ഇരുവരും ഇപ്പോഴും പ്രചാരണ രംഗത്തുണ്ട്. മുന്‍ കേന്ദ്ര പ്രതിരോധ മന്ത്രി എ.കെ ആന്റണി, മഹാരാഷ്ട്ര മുന്‍ ഗവര്‍ണര്‍ കെ. ശങ്കരനാരായണന്‍ എന്നിവരെ കൂടാതെ കോണ്‍ഗ്രസിന്റെ യുവ എം.എല്‍.എമാരും മുസ്്‌ലിം ലീഗ് എം.എല്‍.എമാരും ശക്തമായ പ്രചാരണമാണ് കാഴ്ചവച്ചത്.

ചരല്‍കുന്ന് സമ്മേളനത്തോടെ 2016 ല്‍ യു.ഡി.എഫ് വിട്ട കേരള കോണ്‍ഗ്രസ്(എം) കുഞ്ഞാലിക്കുട്ടിയുടെ പ്രചാരണത്തിനെത്തി. സംസ്ഥാന മന്ത്രിമാര്‍, പാര്‍ട്ടി നേതാക്കള്‍ എന്നിവരെ അണിനിരത്തിയാണ് ഇടതു സ്ഥാനാര്‍ഥി എം.ബി ഫൈസലിന്റെ തെരഞ്ഞെടുപ്പ് പ്രചാരണം നടന്നിരുന്നത്. ലോക്‌സഭാ മണ്ഡലം കണ്‍വന്‍ഷനു ശേഷം പ്രചാരണരംഗത്തു നിന്നു മാറിനിന്ന സി.പി.എം സംസ്ഥാന നേതാക്കളും മന്ത്രിമാരും ഏപ്രില്‍ ഒന്നുമുതല്‍ പ്രചാരണ രംഗത്ത് വീണ്ടും സജീവമായിരുന്നു. ആദ്യ ഘട്ടത്തില്‍ വി.എസ് അച്യുതാനന്ദനെ തെരഞ്ഞെടുപ്പ് പ്രചാരണത്തിന് ഇറക്കേണ്ടതില്ലെന്ന് തീരുമാനിച്ചിരുന്നെങ്കിലും ഇന്നലെ ആദ്യമായി പാര്‍ട്ടിയുടെ നിര്‍ദേശ പ്രകാരം വി.എസ് പ്രചാരണത്തിനെത്തി.

എസ്.എസ്.എല്‍.സി പരീക്ഷാ വിവാദത്തിന്റെ പശ്ചാതലത്തില്‍ വിദ്യാഭ്യാസ മന്ത്രി സി. രവീന്ദ്രനാഥിനെയും ഇടതുമുന്നണി പ്രചാരണത്തിനിറക്കിയിരുന്നില്ല. തെരഞ്ഞെടുപ്പ് പ്രചാരണത്തിന്റെ അവസാനഘട്ടത്തില്‍ മുഖ്യമന്ത്രി പിണറായി വിജയന്‍ തന്നെ നേരിട്ടെത്തി പ്രചാരണം കൊഴുപ്പിക്കാമെന്നായിരുന്നു പാര്‍ട്ടിയുടെ കണക്കുകൂട്ടല്‍. തിരുവനന്തപുരത്തുവച്ച് ജിഷ്ണു പ്രണോയിയുടെ അമ്മ പൊലിസ് നടപടിക്ക് വിധേയമായതിനു തൊട്ടുപിന്നാലെയുള്ള സന്ദര്‍ശനമായതിനാല്‍ ഇതും വേണ്ടത്ര വിജയിച്ചില്ലെന്നാണ് വിലയിരുത്തല്‍.

ഉപതെരഞ്ഞെടുപ്പ് സംസ്ഥാന സര്‍ക്കാരിന്റെ വിലയിരുത്തലാകുമെന്ന് പാര്‍ട്ടി ജനറല്‍ സെക്രട്ടറി കൊടിയേരി ബാലകൃഷ്ണനും കേന്ദ്ര സര്‍ക്കാരിന്റെ വിലയിരുത്തലാകുമെന്ന് ബി.ജെ.പി സംസ്ഥാന പ്രസിഡന്റ് കുമ്മനം രാജശേഖരനും വ്യക്തമാക്കിയിരുന്നു. ബി.ജെ.പി സ്ഥാനാര്‍ഥി ശ്രീ പ്രകാശിനായി സംസ്ഥാന നേതാക്കള്‍ സജീവ പ്രചാരണമാണ് നടത്തിയത്. മൂന്നു മുന്നണി സ്ഥാനാര്‍ഥികള്‍ക്കു പുറമേ ആറ് സ്വതന്ത്ര സ്ഥാനാര്‍ഥികളാണ് മത്സര രംഗത്തുള്ളത്. എ.കെ ഷാജി, എന്‍. മുഹമ്മദ് മുസ്‌ലിയാര്‍, കെ. ഷാജി മോന്‍, പി.പി.എ സഗീര്‍, മുഹമ്മദ് ഫൈസല്‍, കുഞ്ഞാലിക്കുട്ടി കുളമ്പില്‍ പടിഞ്ഞാറേക്കര എന്നിവരാണ് സ്ഥാനാര്‍ഥികള്‍. 17നാണ് വോട്ടെണ്ണല്‍.
………………..
പെണ്‍പടമുന്നില്‍, ആകെ 13,12,693 വോട്ടര്‍മാര്‍
ഏഴ്് നിയമസഭാ മണ്ഡലങ്ങളുള്ള മലപ്പുറം ലോക്‌സഭയില്‍ 13,12,693 വോട്ടര്‍മാരാണുള്ളത്. വോട്ടര്‍മാരുടെ എണ്ണത്തില്‍ സ്ത്രീകളാണ് മുന്നില്‍. വിധിയെഴുത്തിന് 6,56,420 സ്ത്രീകളുള്ളപ്പോള്‍ 6,56,273 പുരഷന്മാരാണ് വോട്ടര്‍പട്ടികയില്‍ ഇടംപിടിച്ചിരിക്കുന്നത്.

1,95,135 വോട്ടര്‍മാരുള്ള മലപ്പുറം നിയോജക മണ്ഡലമാണ് വോട്ടര്‍മാരുടെ എണ്ണത്തില്‍ മുന്നില്‍. 1,68,475 വോട്ടര്‍മാരുള്ള വേങ്ങരയാണ് വോട്ടര്‍മാരുടെ എണ്ണത്തില്‍ പിന്നില്‍. കൊണ്ടോട്ടി(1,88,339), മഞ്ചേരി(1,90,441), മങ്കട(1,93,911), പെരിന്തല്‍മണ്ണ(1,93,958), വള്ളിക്കുന്ന്(1,82,434) എന്നിങ്ങനെയാണ് വോട്ടര്‍മാരുടെ എണ്ണം.


ഏറ്റവും പുതിയ വാർത്തകൾക്കും വീഡിയോകൾക്കും സബ്‌സ്ക്രൈബ് ചെയ്യുക

കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.