2019 February 19 Tuesday
യുക്തിയും ശാന്തമായി തീരുമാനമെടുക്കാനുള്ള കഴിവുമാണ് ഒരു നേതാവിനുവേണ്ട വിശിഷ്ടഗുണങ്ങള്‍ -കോര്‍ണിലിയസ് ടാസിറ്റസ്‌

മയക്കുമരുന്നു മാഫിയകളുടെ കരങ്ങള്‍ വിദ്യാലയങ്ങള്‍ക്കടുത്തേക്കു വരുന്നത് തടയണം: മുഖ്യമന്ത്രി


അധ്യാപകദിനാഘോഷവും അധ്യാപക അവാര്‍ഡ് വിതരണവും ഉദ്ഘാടനം ചെയ്തു

തിരുവനന്തപുരം: മയക്കുമരുന്നു മാഫിയകളുടെ കരങ്ങള്‍ നമ്മുടെ വിദ്യാലയങ്ങള്‍ക്കടുത്തേക്കു നീണ്ടുവരുന്നത് തടയാന്‍ നാം ജാഗ്രത പുലര്‍ത്തണമെന്ന് മുഖ്യമന്ത്രി പിണറായി വിജയന്‍ പറഞ്ഞു.

അധ്യാപകദിനാഘോഷവും സംസ്ഥാന അധ്യാപക അവാര്‍ഡ് വിതരണവും അട്ടക്കുളങ്ങര ഗവ. സെന്‍ട്രല്‍ സ്‌കൂളില്‍ ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം.

വിദ്യാലയത്തിന്റെ ചുറ്റുപാടിലേക്ക് വരേണ്ടാത്തവര്‍ വരുന്നുണ്ടോ എന്ന് ശ്രദ്ധിക്കണം. അതിനു തടയിടാന്‍ അധ്യാപകര്‍ക്കും അധ്യാപക രക്ഷാകര്‍തൃസമിതികള്‍ക്കും കഴിയണം. വിദ്യാര്‍ഥി സംഘടനകള്‍ സജീവമായിരുന്ന കാലത്ത് അവര്‍ ഇക്കാര്യങ്ങളില്‍ ജാഗ്രത പുലര്‍ത്തിയിരുന്നു. മയക്കുമരുന്ന് നല്‍കി വിദ്യാര്‍ഥികളെ സ്വാധീനിക്കുകയും അടിമകളാക്കുകയും പിന്നീട് കാരിയര്‍മാരുമാക്കുന്ന അവസ്ഥയുണ്ട്. ഇങ്ങനെ സംഭവിച്ചാല്‍ കുട്ടികള്‍ പൂര്‍ണമായി നശിച്ചുപോകുമെന്ന ആപത്ത് നാം തിരിച്ചറിഞ്ഞ് ജാഗ്രത പാലിക്കാനാകണം.

സര്‍ക്കാരിന്റെ ശ്രദ്ധയ്ക്കപ്പുറം അധ്യാപകരും രക്ഷകര്‍ത്താക്കളും ശ്രദ്ധ പുലര്‍ത്തണം. കുട്ടികളുടെ കണ്ണ് കലങ്ങിയാല്‍ അതെന്തുകൊണ്ടെന്ന് അന്വേഷിക്കാനുള്ള ശ്രദ്ധ അധ്യാപകര്‍ക്കുണ്ടാകണം. അധ്യാപകരും വിദ്യാര്‍ഥികളും തമ്മില്‍ ആത്മബന്ധം കുറയാതെ ശ്രദ്ധിക്കണം. അതില്‍ കുറവ് വന്നാല്‍ ഭാവി തലമുറയെ ബാധിക്കും.

പഴയകാലത്ത് കുട്ടികളെക്കുറിച്ചും വീട്ടിലെ സാഹചര്യത്തെക്കുറിച്ചും അധ്യാപകര്‍ വിശദമായി മനസിലാക്കി അതിന്റെ അടിസ്ഥാനത്തിലുള്ള ഇടപെടലും ഉണ്ടാകാറുണ്ടായിരുന്നു. പൊതുവിദ്യാലയങ്ങളില്‍ വ്യത്യസ്ത തലത്തിലും സാഹചര്യത്തിലും നിന്നുള്ള കുട്ടികളുണ്ട്. വീട്ടിലെ പ്രത്യേക സാഹചര്യങ്ങള്‍ കാരണം ശരാശരിയില്‍ താഴെ പോകുന്ന കുട്ടികളുണ്ടാകാം. അത്തരത്തിലുള്ള കുട്ടികളില്‍ പ്രത്യേകശ്രദ്ധയും പിന്തുണയും അധ്യാപകര്‍ നല്‍കണം.

കൂട്ടായ മനസ്സോടെ സ്‌കൂളുകളുടെ അഭിവൃദ്ധിക്ക് അധ്യാപകര്‍ ശ്രമിക്കണം. സമൂഹത്തിനുവേണ്ടി അര്‍പ്പിതമായിരുന്നു പണ്ട് ദേശീയപ്രസ്ഥാനത്തിന്റെ കാലത്ത് അധ്യാപകരുടെ ജീവിതം. ഭാവിതലമുറയെ വാര്‍ത്തെടുക്കല്‍ മാത്രമല്ല, ഇന്നുള്ള തലമുറയെ സേവിക്കുന്ന പ്രവര്‍ത്തനവും അധ്യാപകര്‍ നടത്തിയിരുന്നു. നാട്ടിലുള്ള എല്ലാ നല്ല പ്രവൃത്തികള്‍ക്കുമൊപ്പം അധ്യാപകര്‍ ഉണ്ടായിരുന്നു. ഡിജിറ്റല്‍ ക്ലാസുകളിലേക്കുള്ള മാറ്റത്തിന് സര്‍ക്കാര്‍ മുന്‍ഗണന നല്‍കുന്നുണ്ട്.

വളരെ വേഗത്തില്‍തന്നെ പൊതുവിദ്യാലയങ്ങള്‍ ഹൈടെക്കാക്കും. പന്ത്രണ്ടാം ക്ലാസ് വരെ ഈരീതിയില്‍ മാറ്റാന്‍ സമയബന്ധിതമായ പരിപാടിയാണ് ആവിഷ്‌കരിക്കുന്നത്. എന്നാല്‍, മാതൃഭാഷ എഴുതിത്തന്നെ പഠിക്കാന്‍ പ്രത്യേകം ശ്രദ്ധിക്കണം. മറ്റു ഭാഷകള്‍ പഠിക്കുമ്പോള്‍ ഓഡിയോവിഷ്വല്‍ സങ്കേതങ്ങളുടെ സഹായം കൂടി ഉപയോഗപ്പെടുത്തുന്നത് ഉച്ചാരണവും മറ്റും മെച്ചപ്പെടുത്താന്‍ സഹായിക്കും.

പൊതുവിദ്യാലയങ്ങളെ മെച്ചപ്പെടുത്തുന്ന നടപടികളില്‍ സര്‍ക്കാരിനൊപ്പം പൂര്‍വവിദ്യാര്‍ഥികള്‍ക്കും നാട്ടുകാര്‍ക്കും വലിയ പങ്ക് വഹിക്കാനാകും. പി.ടി.എകളും തദ്ദേശസ്ഥാപനങ്ങളും എം.എല്‍.എയും എം.പിയും മറ്റു സഹായസന്നദ്ധരും പിന്തുണച്ചാല്‍ സര്‍ക്കാരിന്റെ വിഭവശേഷിക്കൊപ്പം നല്ല നിലയ്ക്ക് സ്‌കൂളുകളെ മെച്ചപ്പെടുത്താനാകുമെന്നും മുഖ്യമന്ത്രി കൂട്ടിച്ചേര്‍ത്തു. സംസ്ഥാന അധ്യാപക അവാര്‍ഡുകളും വിദ്യാരംഗം കലാസാഹിത്യ പുരസ്‌കാരങ്ങളും പി.ടി.എകള്‍ക്കുള്ള അവാര്‍ഡുകളും മുഖ്യമന്ത്രി സമ്മാനിച്ചു.

വിദ്യാഭ്യാസമന്ത്രി പ്രൊഫ. സി. രവീന്ദ്രനാഥ് അധ്യക്ഷത വഹിച്ചു. കേരളം ഡിജിറ്റല്‍ വിദ്യാഭ്യാസത്തിലേക്ക് നീങ്ങുകയാണെന്ന് അദ്ദേഹം അറിയിച്ചു. കമ്പ്യൂട്ടര്‍ ഉപയോഗിച്ച് എങ്ങനെ തങ്ങളുടെ വിഷയം കാര്യക്ഷമമായി പഠിപ്പിക്കാനാകുമെന്ന് അധ്യാപകര്‍ക്ക് സമഗ്ര പരിശീലനം നല്‍കും. സമൂഹത്തിന്റെ പ്രതീക്ഷക്കൊത്ത് അധ്യാപകര്‍ ഉയരണമെന്ന് അദ്ദേഹം പറഞ്ഞു. ജീവിതശൈലി എന്ന വിഷയത്തിലൂന്നി ഇനി ഒരു വര്‍ഷം അധ്യാപകരെയും വിദ്യാര്‍ഥികളെയും രക്ഷിതാക്കളെയും ബോധവത്കരിക്കാനുള്ള നടപടികള്‍ കൈക്കൊള്ളുമെന്ന് അദ്ദേഹം പറഞ്ഞു.

ഡോ. എ. സമ്പത്ത് എം.പി, വി.എസ്. ശിവകുമാര്‍ എം.എല്‍.എ, പൊതുവിദ്യാഭ്യാസസെക്രട്ടറി എ.പി.എം മുഹമ്മദ് ഹനീഷ്, പൊതുവിദ്യാഭ്യാസ സ്‌പെഷ്യല്‍ സെക്രട്ടറി കെ. ഗോപാലകൃഷ്ണ ഭട്ട്, പൊതുവിദ്യാഭ്യാസ ഡയറക്ടര്‍ കെ.വി. മോഹന്‍കുമാര്‍, ഹയര്‍ സെക്കന്‍ഡറി ഡയറക്ടര്‍ എം.എസ്. ജയ, അസാപ് ഡയറക്ടര്‍ ഡോ. എം.ടി. രെജു, ആര്‍.എം.എസ്.എ ഡയറക്ടര്‍ ആര്‍. രാഹുല്‍, വൊക്കേഷണല്‍ ഹയര്‍സെക്കന്‍ഡറി ഡയറക്ടര്‍ കെ.പി. നൗഫല്‍ തുടങ്ങിയവര്‍ സംബന്ധിച്ചു.


കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.