2017 June 22 Thursday
ആദര്‍ശങ്ങളും ലക്ഷ്യങ്ങളും തത്വങ്ങളും മറക്കുമ്പോള്‍ മാത്രമാണ് പരാജയം ഉണ്ടാകുന്നത്
ജവഹര്‍ലാല്‍ നെഹ്‌റു

മട്ടുപ്പാവ് കൃഷിയില്‍ വിജയം കൊയ്ത് ഇബ്‌റാഹീം

പുത്തന്‍ചിറ: കേരളത്തിലെ നാടന്‍ പച്ചക്കറിയിനങ്ങള്‍ മട്ടുപ്പാവില്‍ കൃഷി ചെയ്ത് വിജയം കൊയ്ത് താനത്ത്പറമ്പില്‍ ഇബ്‌റാഹീം ശ്രദ്ധേയനാകുന്നു. പുത്തന്‍ചിറ ഗ്രാമപഞ്ചായത്തിലെ അരീക്കത്തോട് പ്രദേശത്താണ് ഇബ്‌റാഹീം വീടിന്റെ ടെറസിന് മുകളില്‍ കൃഷി നടത്തുന്നത് .
മുരിങ്ങ,പയര്‍,വെണ്ട,വഴുതന കുമ്പളം ,കരിമ്പ്,മത്തന്‍ എന്നിവയും തക്കാളി, പച്ചമുളക്, വിവിധയിനം ചീര, വാഴ തുടങ്ങിയവയാണ് വീടിന്റെ ടെറസില്‍ കൃഷി ചെയ്തിരിക്കുന്നത്. തികച്ചും ജൈവ കൃഷിരീതിയാണ് ഷാജു അവലംബിക്കുന്നത്.
വീട്ടില്‍ സ്ഥാപിച്ച രണ്ട് ജൈവ വള നിര്‍മാണ യൂനിറ്റുകളിലാണ് ആവശ്യമായ ജൈവ വളം നിര്‍മിക്കുന്നത്. വീട്ടാവശ്യത്തിന് വാങ്ങുന്ന പച്ചക്കറിയുടേയും മറ്റും അവശിഷ്ടങ്ങള്‍ ജൈവ വളം നിര്‍മാണ യൂനിറ്റില്‍ നിക്ഷേപിച്ചാണ് വളം നിര്‍മിക്കുന്നത്.
അതിനാല്‍ കൃഷി ചിലവ് വളരെ കുറക്കാന്‍ കഴിയുമെന്നാണ് ഇബ്‌റാഹീം അനുഭവത്തിന്റെ വെളിച്ചത്തില്‍ പറയുന്നത് . ചീരയും തക്കാളിയുമൊഴികെ മറ്റുള്ളവയുടെ വിളവെടുപ്പ് ആകുന്നേയുള്ളൂ. ഇത്തവണയും നല്ല വിളവാണ് ഇബ്രാഹീം കണക്ക് കൂട്ടുന്നത്. വിത്തുകള്‍ വി.എഫ്.പി.സി.കെയാണ് ലഭ്യമാക്കുന്നത്. ടെറസില്‍ ഷീറ്റ് വിരിച്ച് അഗ്രോ ബാഗിലും ഉപയോഗശൂന്യമായ ടയറിലും മണ്ണ് നിറച്ചാണ് കൃഷി ചെയ്യുന്നത്. ഇത്തവണത്തെ കൃഷിക്ക് ആകെ ചിലവായത് 1500 ഓളം രൂപയാണ്.
വീട്ടിലേക്കാവശ്യമായ പച്ചക്കറികളെല്ലാം തന്നെ മട്ടുപ്പാവില്‍ കൃഷി ചെയ്തുണ്ടാക്കാന്‍ കഴിയുമെന്ന ശുഭാപ്തി വിശ്വാസമാണിപ്പോള്‍ ഇബ്‌റാഹീമിനുള്ളത്. ടയര്‍ ബിസിനസ് നടത്തുന്ന ഇബ്‌റാഹീം ഒഴിവ് ദിവസങ്ങളിലാണ് കൃഷിയില്‍ കൂടുതല്‍ സമയം ചിലവഴിക്കുന്നത്.
മറ്റ് ദിവസങ്ങളില്‍ രാവിലെയും വൈകിട്ടും വേനല്‍ കാലത്ത് കൃഷി നനക്കാന്‍ സമയം കണ്ടെത്തും. വീട്ടില്‍ ജൈവരീതിയില്‍ നടത്തുന്ന കൃഷിയില്‍ നിന്ന് ലഭിക്കുന്ന പച്ചക്കറി വിഷമുക്തമാണെന്ന പ്രത്യേകതയും ഉണ്ട്. കൃഷി നടത്താന്‍ സ്വന്തമായി സ്ഥലമില്ലാത്തതിനാലാണ് ടെറസിന് മുകളില്‍ കൃഷി നടത്താന്‍ തീരുമാനിച്ചത്. ഭാര്യ സുഹറയും ഇബ്‌റാഹീമിന്റെ സഹായത്തിനായുണ്ട്.

 


കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.