2018 September 22 Saturday
ഒരാളുടെ മഹത്വം അളക്കുന്നത് അയാള്‍ തനിക്ക് താഴ്ന്നവരോട് എങ്ങനെ ഇടപെടുന്നു എന്നു നോക്കിയാണ്
ജെ.കെ റൗളിങ്

പ്രളയ ബാധിതര്‍ക്ക് വാഹന വകുപ്പിന്റെ വക ഇരുട്ടടി

ചങ്ങനാശേരി: കനത്ത മഴയിലുണ്ടായ പ്രളയത്തിലെ ദുരിതങ്ങള്‍ക്കു പിന്നാലെ കുട്ടനാട്ടുകാര്‍ക്ക് മോട്ടോര്‍ വാഹന വകുപ്പിന്റെ അടി. കഴിഞ്ഞ ആഴ്ചകളില്‍ നടക്കേണ്ടിയിരുന്ന രജിസ്‌ട്രേഷന്‍ നടപടികള്‍ മുടങ്ങിയവരില്‍ നിന്നും വന്‍തുക പിഴ ആവശ്യപ്പെടുന്നതായാണ് ആക്ഷേപം.
പുതിയതും പഴയതുമായ വാഹനങ്ങളുടെ വിവിധതരം രജിസ്‌ട്രേഷനുകളാണ് കുട്ടനാട്ടുകാര്‍ക്ക് യഥാസമയം നടത്താനാകാതെ പോയത്. എന്നാല്‍ വെള്ളമിറങ്ങിയ ശേഷം മാമ്പുഴക്കരിയിലെ ജോയിന്റ് ആര്‍ടിഒ ഓഫീസിലെത്തിയവരോട് ആയിരക്കണക്കിനു രൂപയാണ് പിഴയായി ആവശ്യപ്പെട്ടത്. ഒന്നിന് രജിസ്‌ട്രേഷന്‍ നടത്തേണ്ടവരാണ് ഇന്നലെയെത്തിയവരില്‍ അധികവും പിറ്റേന്ന് ഞായറാഴ്ചയായതും ഇവര്‍ക്കു വിനയായി പുതിയ ഓട്ടോറിക്ഷയുടെ താത്കാലിക രജിസ്‌ട്രേഷന്‍ കാലാവധി കഴിഞ്ഞതിനെത്തുടര്‍ന്ന് ഇന്നലെയെത്തിയ ഒരാളോട് 2500 രൂപയാണ് പിഴയായി ആവശ്യപ്പെട്ടത്.
ബന്ധുവീട്ടിലായിരുന്നെന്നും കളിഞ്ഞ ദിവസമാണ് മടങ്ങിയെത്തിയതെന്നും പറഞ്ഞിട്ടും സര്‍ക്കാര്‍ നിയമമാണെന്നും പിഴയടച്ചേ മതിയാകുയെന്ന മറുപടിയാണ് ഉദ്യോഗസ്ഥരില്‍ നിന്നും ലഭിച്ചതെന്നാണ് രജിസ്‌ട്രേഷനെത്തിയവര്‍ പറയുന്നത്.എന്നാല്‍ കുട്ടനാടിനു വെളിയിലുള്ള ദുരിതാശ്വാസക്യാമ്പുകള്‍ ഇനിയും അവസാനിച്ചിട്ടില്ലാത്ത സാഹചര്യത്തില്‍ ഇത്തരമൊരു തീരുമാനം ദ്രോഹപരമാണെന്നാണ് വാഹനഉടമകളുടെ പരാതി.
13 മുതല്‍ 31 വരെയുള്ള കാലാവധിയില്‍ നടത്തേണ്ടിയിരുന്ന രജിസ്‌ട്രേഷനുകള്‍ക്കു മാത്രമെ ഇളവു ലഭിക്കുവെന്നും അതിനുശേഷമുള്ളവരില്‍ നിന്നും പിഴ ഈടാക്കണമെന്നാണ് മോട്ടോര്‍ വാഹനവകുപ്പില്‍ നിന്നും ലഭിച്ചിട്ടുള്ള നിര്‍ദേശമെന്ന് കുട്ടനാട് ജോയിന്റ് ആര്‍ടിഒ അധിക്യതര്‍ പറഞ്ഞു. ഈ തീരുമാനം നിലവില്‍ വന്നത് വെള്ളപ്പൊക്കത്തില്‍ സര്‍വവും നശിച്ച കുട്ടനാട്ടുകാര്‍ക്ക് ഇരുട്ടടിയായിരിക്കുകയാണ്. വെള്ളം പരിധിവിട്ടുയര്‍ന്നു തുടങ്ങിയപ്പോള്‍ തന്നെ കുട്ടനാട്ടുകാര്‍ വാഹനവുമായി സമീപമുള്ള ഉയര്‍ന്ന പ്രദേശങ്ങളിലേക്കു പോയിരുന്നു.
ചിലര്‍ വീടിനു സമീപത്തുള്ള പാലങ്ങളിലും ഉയര്‍ന്ന പുരയിടങ്ങളിലും വാഹനമിട്ടിട്ടാണ് ക്യാമ്പുകളിലേക്കും ബന്ധുവീടുകളിലേക്കും അഭയം തേടിപോയത്. എന്നാല്‍ ഇവയില്‍ പലവാഹനങ്ങളും പിന്നീട് വെള്ളത്തിനടിയിലായി. കേടായ വാഹനങ്ങള്‍ അറ്റകുറ്റപ്പണികള്‍ നടത്താതെ രജിസ്‌ട്രേഷനു കൊണ്ടുപോകാനാകാതെ വിഷമിച്ചവരും ഏറെയാണ്. മിക്ക വാഹനഉടമകളും ആഴ്ചകളായി പണിയില്ലാത്തതിനാല്‍ കയ്യില്‍ പണമൊന്നുമില്ലാതെ വിഷമിക്കുകയാണ്.
വീടുകളില്‍ മടങ്ങിയെത്തിയ കുടുംബങ്ങള്‍ ആദ്യത്തെ ഒരാഴ്ച വീടുകള്‍ താമസയോഗ്യമാക്കുകയാരുന്നു ചെയ്തത്. എന്നാല്‍ ഒന്നോ രണ്ടോ ദിവസത്തെ ഇടവേളയുടെ പേരില്‍ ആയിരങ്ങള്‍ പിഴയീടാക്കുന്നത് ദുരിതബാധിതരോടുള്ള കടുത്ത അനീതിയാണെന്നാണ് ഇവര്‍ ആരോപിക്കുന്നത്. കുറഞ്ഞപക്ഷം 10 ദിവസത്തെയെങ്കിലും രജിസ്‌ട്രേഷന്‍ കാലാവധി നീട്ടി നല്‍കണമെന്നും എല്ലാത്തരം പ്രവഡത്തികള്‍ക്കും പിഴ ഒഴിവാക്കി തരണമെന്നുമാണ് നാട്ടുകാരുടെ ആവശ്യം.

 

 

 


കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.