2018 November 18 Sunday
ജീവിച്ചതല്ല ജീവിതം, നാം ഓര്‍മയില്‍ വയ്ക്കുന്നതാണ്, പറഞ്ഞു കേള്‍പ്പിക്കാന്‍ വേണ്ടി നാം ഓര്‍മ്മയില്‍ വയ്ക്കുന്നതാണു ജീവിതം

പ്രളയത്തില്‍ വീട് നഷ്ടപ്പെട്ടവര്‍ക്ക് ഏപ്രിലോടെ പുതിയ വീട്

കോഴിക്കോട്: ഈ മാസം 30നകം പ്രളയബാധിത പ്രദേശങ്ങളിലെ തകര്‍ന്ന വീടുകളുടെ പുനര്‍നിര്‍മാണത്തിനുള്ള പ്ലാനിന് അംഗീകാരം നല്‍കും. അടുത്തവര്‍ഷം ഏപ്രില്‍ മാസത്തോടെ മുഴുവന്‍ വീടുകളുടെയും നിര്‍മാണം പൂര്‍ത്തീകരിക്കാനാണ് ഉദ്ദേശിക്കുന്നത്. 400-450 സ്‌ക്വയര്‍ഫീറ്റിലുള്ള വീടുകളാണു നഷ്ടപ്പെട്ടവര്‍ക്കായി നിര്‍മിച്ചുനല്‍കുക. സര്‍ക്കാര്‍ സഹായമായ നാലു ലക്ഷം രൂപ ഉപയോഗപ്പെടുത്തി സ്വന്തമായി വീട് നിര്‍മിക്കാന്‍ സാധിക്കുന്നവര്‍ ഇതുസംബന്ധിച്ച സമ്മതപത്രം ബന്ധപ്പെട്ട വില്ലേജ് ഓഫിസില്‍ സമര്‍പ്പിക്കണം. സര്‍ക്കാര്‍ പ്ലാന്‍ അനുസരിച്ച് വീട് ആവശ്യമുള്ളവര്‍ ഈ മാസം 14നകം വീടു പണിയാന്‍ ഉദ്ദേശിക്കുന്ന സ്ഥലത്തിന്റെ സര്‍വേ സ്‌കെച്ച് വില്ലേജ് ഓഫിസില്‍ ഹാജരാക്കണം. ശേഷം 16ന് വടകര, കോഴിക്കോട് താലൂക്കിലും 17ന് താമരശ്ശേരി, കൊയിലാണ്ടി താലൂക്കിലും ആര്‍ക്കിടെക്ട്, എന്‍ജിനീയര്‍മാര്‍, ഉദ്യോഗസ്ഥര്‍ എന്നിവര്‍ അതതു താലൂക്കിലെ അപേക്ഷകര്‍ക്കൊപ്പം ചര്‍ച്ച നടത്തും. അപേക്ഷകര്‍ സര്‍വേ സ്‌കെച്ചിന്റെ പകര്‍പ്പ് കൈവശം കരുതണം.
ഈ മാസം 29ന് വടകര, കോഴിക്കോട് താലൂക്കിലും 30ന് കൊയിലാണ്ടി, താമരശ്ശേരി താലൂക്കിലും നടക്കുന്ന അദാലത്ത് വഴി പ്ലാനിനു അംഗീകാരം നല്‍കും. സ്ഥലവും വീടും നഷ്ടപ്പെട്ടവര്‍ക്ക് വീട് നിര്‍മിക്കാന്‍ ആവശ്യമായ സ്ഥലം കണ്ടെത്തിയിട്ടുണ്ട്. ഇതുസംബന്ധിച്ച വിവരങ്ങളറിയാന്‍ അതത് തഹസില്‍ദാ (ഭൂരേഖ)രുമായി ബന്ധപ്പെടണം.
75 ശതമാനവും അതിനുമേലെയും നാശമുണ്ടായ വീടുകളെ പൂര്‍ണമായി തകര്‍ന്ന വീടുകളായി കണക്കാക്കി നല്‍കുന്ന പരമാവധി തുകയാണ് നാലു ലക്ഷം. കേന്ദ്ര വിഹിതത്തിനൊപ്പം മഖ്യമന്ത്രിയുടെ ദുരിതാശ്വാസനിധിയില്‍ നിന്നുളള വിഹിതം ചേര്‍ത്താണു നാലുലക്ഷം നല്‍കുന്നത്. വീടുകള്‍ക്കുണ്ടായ നാശനഷ്ടത്തിന്റെ അളവ് 14-75 ശതമാനത്തിനിടയില്‍ കണക്കാക്കി അഞ്ചു വിഭാഗങ്ങളായി തരംതിരിക്കും.15 ശതമാനം നാശം സംഭവിച്ച വീടുകള്‍ക്ക് പതിനായിരം രൂപയും 16 മുതല്‍ 29 ശതമാനം വരെ കേടുപാടുകള്‍ സംഭവിച്ച വീടുകള്‍ക്ക് 60,000 രൂപയും 30 മുതല്‍ 59 ശതമാനം വരെ നഷ്ടം സംഭവിച്ച വീടുകള്‍ക്ക് 1,25000 രൂപയും 60 മുതല്‍ 74 ശതമാനം വരെ നാശം സംഭവിച്ചവയ്ക്ക് 2.5 ലക്ഷവുമാണ് നല്‍കിവരുന്നത്.

 


കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.