2018 November 19 Monday
നല്ല സ്വഭാവം ആഴ്ചകൊണ്ടോ മാസം കൊണ്ടോ ഉണ്ടാകുന്നതല്ല. അത് ഓരോ ദിവസവും അല്‍പാല്‍പമായി രൂപപ്പെട്ട് വരുന്നതാണ്.

പ്രതിഷേധമായി ജില്ലയിലെ ഹര്‍ത്താല്‍

 

കല്‍പ്പറ്റ: ഇന്ധനവില വര്‍ധനവില്‍ പ്രതിഷേധിച്ച് യു.ഡി.എഫും എല്‍.ഡി.എഫും ആഹ്വാനം ചെയ്ത ഹര്‍ത്താല്‍ ജില്ലയില്‍ പൂര്‍ണം.
വയനാട്ടിലെ പ്രധാന ടൗണുകളിലെല്ലാം തന്നെ കടകമ്പോളങ്ങള്‍ അടഞ്ഞുകിടന്നു. ഏതാനം സ്വകാര്യവാഹനങ്ങളൊഴിച്ച് ഭൂരിഭാഗം വാഹനങ്ങളും നിരത്തിലിറങ്ങിയില്ല. കെ.എസ്.ആര്‍.ടി സിയും സ്വകാര്യബസുകളും ജില്ലയില്‍ സര്‍വിസുകളൊന്നും നടത്തിയില്ല. ജില്ലയില്‍ ഹര്‍ത്താല്‍ തീര്‍ത്തും സമാധാനപരമായിരുന്നു. ഇരുചക്രവാഹനങ്ങളും ഇത്തവണ നിരത്തിലിറങ്ങിയത് കുറവായിരുന്നു. സര്‍ക്കാര്‍ ഓഫിസുകളില്‍ ഹാജര്‍നില തീരെ കുറവായിരുന്നു. ജില്ലയിലെ പ്രധാന ടൗണുകളായ മാനന്തവാടി, കല്‍പ്പറ്റ, സുല്‍ത്താന്‍ബത്തേരി എന്നിവിടങ്ങളിലും മീനങ്ങാടി, പനമരം, പടിഞ്ഞാറത്തറ, മേപ്പാടി, പുല്‍പ്പള്ളി, കമ്പളക്കാട് തുടങ്ങി ജില്ലയുടെ മുക്കിലും മൂലയിലും ഹര്‍ത്താല്‍ പ്രതിധ്വനിച്ചു. സാധാരണ ഹര്‍ത്താല്‍ ദിവസം തുറക്കാറുള്ള പെട്ടിക്കടകള്‍ പോലും ഭൂരിഭാഗവും അടഞ്ഞുകിടന്നു. കര്‍ണാടക, തമിഴ്‌നാട് സംസ്ഥാനങ്ങളില്‍ നിന്നുമെത്തിയ വാഹനങ്ങള്‍ അതിര്‍ത്തിയില്‍ നിര്‍ത്തിയിട്ടു.
ഇന്ധനവിലവര്‍ധനവ് രൂക്ഷമായ സാഹചര്യത്തില്‍ ശക്തമായ പ്രതിഷേധത്തിന്റെ ഭാഗമായി നടന്ന ഹര്‍ത്താലില്‍ എല്ലാവരും ഒരുപോലെ പിന്തുണച്ചു. ഹര്‍ത്താല്‍ അനുകൂലികള്‍ ജില്ലയിലെ ടൗണുകളില്‍ രാവിലെ പ്രകടനം നടത്തി.
സുല്‍ത്താന്‍ ബത്തേരിയില്‍ ഹര്‍ത്താലനുകൂലികള്‍ വാഹനങ്ങള്‍ തടഞ്ഞു. ദുരിതാശ്വാസ പ്രവര്‍ത്തനങ്ങളുമായി ബന്ധപ്പെട്ട് ജില്ലയിലെത്തുന്ന വാഹനങ്ങളെയും പത്രം, പാല്‍ എന്നിവയെയും ഹര്‍ത്താലില്‍ നിന്നൊഴിവാക്കിയിരുന്നു.

 

 

 

 

 

 

 


കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.