2019 May 20 Monday
രാഷ്ട്രീയപാര്‍ട്ടി നേതാക്കളുടെയും പ്രധാനമന്ത്രിമാരുടെയും കളിപ്പാവകളായി മാറുന്നവരെയല്ല നിയമിക്കേണ്ടത്. അന്ധന്‍ അന്ധനെ നയിച്ചാല്‍ ഇരുവരും കുഴിയില്‍ വീഴും -യേശു

പ്രതിപക്ഷം സഭയില്‍നിന്ന് ഇറങ്ങിപ്പോയി

 

തിരുവനന്തപുരം: മാധ്യമവിലക്ക് സംബന്ധിച്ച സര്‍ക്കാര്‍ ഉത്തരവുമായി ബന്ധപ്പെട്ട അടിയന്തര പ്രമേയത്തിന് അവതരണാനുമതി നിഷേധിച്ചതില്‍ പ്രതിഷേധിച്ച് പ്രതിപക്ഷം നിയമസഭയില്‍നിന്ന് ഇറങ്ങിപ്പോയി. കെ.സി ജോസഫാണ് അടിയന്തരപ്രമേയത്തിന് അവതരണാനുമതി തേടിയത്.
മുഖ്യമന്ത്രിയുടെ നിലപാടാണ് ഇത്തരം ഒരു സര്‍ക്കുലര്‍ പുറപ്പെടുവിക്കാന്‍ കാരണമെന്ന് കെ.സി ജോസഫ് പറഞ്ഞു. മാധ്യമങ്ങളെ ഒരു വിളിപ്പാട് അകലെ നിര്‍ത്തുകയാണ് മുഖ്യമന്ത്രിയുടെ ലക്ഷ്യം. പത്രമാരണ നിയമത്തിലൂടെ മാധ്യമങ്ങള്‍ക്ക് കൂച്ചുവിലങ്ങിടുന്നു. മുഖ്യമന്ത്രി അറിയാതെ ഒരു ഉത്തരവ് ആഭ്യന്തര സെക്രട്ടറി ഇറക്കില്ല. കേന്ദ്രത്തില്‍ മോദിയ്ക്ക് മാധ്യമങ്ങളോടുള്ള അതേ മനോഭാവമാണ് കേരളത്തില്‍ പിണറായിക്കും, അദ്ദേഹം കൂട്ടിച്ചേര്‍ത്തു.
മാധ്യമങ്ങള്‍ക്ക് ഒരു തരത്തിലുമുള്ള നിയന്ത്രണങ്ങളും ഏര്‍പ്പെടുത്തിയിട്ടില്ലെന്നു മുഖ്യമന്ത്രിക്കുവേണ്ടി മറുപടി നല്‍കിയ മന്ത്രി ഇ.പി ജയരാജന്‍ പറഞ്ഞു. സര്‍ക്കുലര്‍ സംബന്ധിച്ച് ചില ആശങ്കകള്‍ ഉണ്ടായ പശ്ചാത്തലത്തില്‍ ഇതില്‍ ഭേദഗതി വരുത്തും.
എല്ലാ മാധ്യമങ്ങള്‍ക്കും ഒരേ പോലെ വാര്‍ത്ത ലഭിക്കുന്നതിനാണ് പുതിയ ക്രമീകരണത്തിനായി സര്‍ക്കുലര്‍ പുറപ്പെടുവിച്ചിട്ടുള്ളത്. മാധ്യമ പ്രവര്‍ത്തകര്‍ക്ക് ഏതു സമയത്തും വാര്‍ത്തകളില്‍ പ്രതികരണം തേടി മന്ത്രിമാരെ സമീപിക്കാമെന്നും മന്ത്രി കൂട്ടിച്ചേര്‍ത്തു.
പുതിയ ഉത്തരവില്‍ മാധ്യമ പ്രവര്‍ത്തകര്‍ക്ക് എന്തെങ്കിലും ആശങ്കയുണ്ടെങ്കില്‍ ഭേദഗതി വരുത്തുമെന്ന് മുഖ്യമന്ത്രി പറഞ്ഞിട്ടുണ്ടെന്നും മന്ത്രി പറഞ്ഞു.
പബ്ലിക് റിലേഷന്‍സ് വകുപ്പുമായി ബന്ധപ്പെട്ട കാര്യത്തില്‍ ആഭ്യന്തരവകുപ്പിന് ഇത്തരമൊരു സര്‍ക്കുലര്‍ ഇറക്കാന്‍ എന്താണ് അധികാരമെന്നു പ്രതിപക്ഷനേതാവ് രമേശ് ചെന്നിത്തല ചോദിച്ചു.
മാധ്യമ പ്രവര്‍ത്തകര്‍ വിമര്‍ശിക്കുമ്പോള്‍ അതിന്റെ നല്ല വശങ്ങള്‍ ഉള്‍ക്കൊള്ളണം.
കേരളത്തില്‍ പത്രപ്രവര്‍ത്തകര്‍ക്ക് മുഖ്യമന്ത്രിയുടെ പത്രസമ്മേളനത്തില്‍ പങ്കെടുക്കാന്‍ ഒരു പ്രളയംവരെ കാത്തിരിക്കേണ്ടി വന്നു. മാധ്യമങ്ങളുടെ കാലില്‍ ചങ്ങല ഇടാനാണ് സര്‍ക്കാര്‍ ശ്രമം. കേരളം പോലുള്ള പുരോഗമന സ്വഭാവമുള്ള നാട്ടില്‍ ഇത്തരം ഒരു മാധ്യമ മാരണ സര്‍ക്കുലര്‍ അത്ഭുതപ്പെടുത്തുന്നതായും ചെന്നിത്തല കൂട്ടിച്ചേര്‍ത്തു.
സര്‍ക്കുലര്‍ വിവാദത്തില്‍ പത്രപ്രവര്‍ത്തക യൂനിയന്‍ ഉള്‍പ്പെടെയുള്ളവരുമായി ചര്‍ച്ച നടത്തണം. സര്‍ക്കുലര്‍ പിന്‍വലിക്കാന്‍ സര്‍ക്കാര്‍ തയാറാകണമെന്നും ഇതിനു അനുകൂലമല്ലാത്ത സര്‍ക്കാര്‍ നിലപാടില്‍ പ്രതിഷേധിച്ച് ഇറങ്ങിപ്പോകുകയാണെന്നും പ്രതിപക്ഷനേതാവ് രമേശ് ചെന്നിത്തല പറഞ്ഞു.

 


ഏറ്റവും പുതിയ വാർത്തകൾക്കും വീഡിയോകൾക്കും സബ്‌സ്ക്രൈബ് ചെയ്യുക

കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.