2019 May 25 Saturday
നമ്മുടെ ഭാവിയുടെ സ്രഷ്ടാക്കള്‍ മറ്റാരുമല്ല; നമ്മള്‍ തന്നെയാണ്! -മഹാവീരന്‍

പ്രകൃതിയുടെ കാത്തുവയ്പ്പ്

തളിപ്പറമ്പ്: കടുത്ത വേനലില്‍ നാടെങ്ങും കുടിവെള്ളക്ഷാമം രൂക്ഷമാകുമ്പോഴും ചവനപ്പുഴ മീത്തല്‍ നാട്ടുകാര്‍ക്ക് പേടിയില്ല. പ്രദേശത്തെ ഉപേക്ഷിക്കപ്പെട്ട കരിങ്കല്‍ ക്വാറിയിലെ മഴവെള്ള സംഭരണിയിലെ വെള്ളം അടുത്ത മഴക്കാലം വരെ ഉപയോഗിച്ചാലും തീരാത്തത്രയും ഉണ്ടെന്ന ഉറപ്പാണ് കാരണം.

ഒരുകാലത്ത് സജീവമായ കരിങ്കല്‍ ക്വാറി കരിങ്കല്ലിന്റെ ലഭ്യത കുറഞ്ഞതോടെ ഉടമ ഉപേക്ഷിക്കുകയായിരുന്നു. പിന്നീട് ഇതൊരു മാലിന്യനിക്ഷേപ കേന്ദ്രമായി മാറി. ജനവാസം കുറഞ്ഞ പ്രദേശത്ത് പുറമേ നിന്നുളളവര്‍ വാഹനങ്ങളിലെത്തിച്ച് മാലിന്യങ്ങള്‍ തള്ളുന്നത് പതിവായി മാറുകയും മഴക്കാലത്ത് ഇവിടെനിന്നു ഒഴുകിയെത്തുന്ന മാലിന്യം കലര്‍ന്ന വെള്ളം ആരോഗ്യത്തിന് ഭീഷണിയായി മാറുകയും ചെയ്തതോടെ നാട്ടുകാര്‍ പ്രദേശത്തുള്ള കുടുംബശ്രീ പ്രവര്‍ത്തകരുടെ സഹകരണത്തോടെ ക്വാറി ശുചീകരണത്തിന് മുന്നിട്ടിറങ്ങുകയായിരുന്നു.

ഇതിനു ശേഷം മാലിന്യ നിക്ഷേപത്തിനെതിരേ ജനകീയ സമിതിയുടെ നേതൃത്വത്തില്‍ കാവല്‍ ഏര്‍പ്പെടുത്തുകയും ചെയ്തു.
ഇപ്പോള്‍ ക്വാറിയില്‍ സംഭരിച്ചിട്ടുളള ലക്ഷക്കണക്കിന് ലിറ്റര്‍ മഴവെളളം കൃഷിക്കും കുടിക്കാനുമുള്ള ആവശ്യത്തിനായി നാട്ടുകാര്‍ ഉപയോഗിക്കുന്നുണ്ട്. ഇവിടെയുള്ള അമ്പതോളം കുടുംബങ്ങള്‍ പ്ലാസ്റ്റിക്ക് പൈപ്പ് വഴിയാണ് വീടുകളിലും കൃഷിസ്ഥലങ്ങളിലും വെള്ളം എത്തിക്കുന്നത്. ക്വാറിയെ നാട്ടുകാര്‍ക്ക് ഉപകാരപ്രദമായ മഴവെളള സംഭരണിയായി നിലനിര്‍ത്തുന്നതിനുളള എല്ലാ സഹകരണവും നല്‍കി ഉടമയും നാട്ടുകാരോടൊപ്പം നില്‍ക്കുന്നു. കടുത്ത വേനലിലും ക്വാറിയുടെ പല ഭാഗത്തുന്നുനിന്നും ചെറിയ ഉറവകളിലൂടെ ശുദ്ധജലം ഒഴുകിയെത്തുന്നുണ്ട്. വേനല്‍ചൂടിലും സജീവമായ നീര്‍ച്ചാലുകള്‍ ഇത്തവണത്തെ വേനലിനെ അതിജീവിക്കാന്‍ സഹായകരമാകുമെന്ന പ്രതീക്ഷയിലാണ് നാട്ടുകാര്‍.


 


ഏറ്റവും പുതിയ വാർത്തകൾക്കും വീഡിയോകൾക്കും സബ്‌സ്ക്രൈബ് ചെയ്യുക

കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.