2019 August 23 Friday
നീ വിധിപറയുകയാണെങ്കില്‍ നീതിപൂര്‍വം വിധിപറയുക. നിശ്ചയം, അല്ലാഹു നീതിമാന്മാരെ സ്‌നേഹിക്കുന്നു. ഖുര്‍ആന്‍ (5:42)

പോസ്റ്റല്‍ ബാലറ്റ് വിതരണം കേന്ദ്ര തെരഞ്ഞെടുപ്പ് കമ്മിഷന്റെ മാനദണ്ഡം പാലിച്ച്: ഡി.ജി.പി

തിരുവനന്തപുരം: കേന്ദ്ര തെരഞ്ഞെടുപ്പ് കമ്മിഷന്‍ പുറത്തിറക്കിയ റിട്ടേണിങ് ഓഫിസര്‍മാര്‍ക്കുള്ള ഹാന്‍ഡ് ബുക്കിലെ മാനദണ്ഡം അനുസരിച്ചാണ് പോസ്റ്റല്‍ ബാലറ്റ് വിതരണവുമായി ബന്ധപ്പെട്ട ഫോറം നമ്പര്‍ 12 വിതരണം ചെയ്യുന്നതിനും അവ ബന്ധപ്പെട്ട റിട്ടേണിങ് ഓഫിസര്‍ക്ക് അയച്ചു കൊടുക്കുന്നതിനും ക്യാംപുകളിലെ മുതിര്‍ന്ന ഉദ്യോഗസ്ഥരെ ചുമതലപ്പെടുത്തിയിട്ടുള്ളതെന്ന് ഡി.ജി.പി.
ഇത് പോസ്റ്റല്‍ ബാലറ്റ് അര്‍ഹതപ്പെട്ട എല്ലാവര്‍ക്കും ലഭിക്കുന്നുവെന്ന് ഉറപ്പാക്കാനുള്ള സ്വാഭാവികവും അനിവാര്യവുമായ നടപടിക്രമം മാത്രമാണെന്നും എല്ലാ തെരഞ്ഞെടുപ്പ് കാലത്തും ചെയ്യാറുള്ള സാധാരണ പ്രക്രിയയാണിതെന്നും അദ്ദേഹം പറഞ്ഞു.
പൊലിസ് ഉദ്യോഗസ്ഥര്‍ക്ക് ഫോറം നമ്പര്‍ 12 വിതരണം ചെയ്യേണ്ടത് അതിനായി നിയോഗിക്കപ്പെട്ട സൂപ്രണ്ട് ഓഫ് പൊലിസ്, നോഡല്‍ ഓഫിസര്‍ മുഖേനയാണെന്നും പോസ്റ്റല്‍ ബാലറ്റ് പേപ്പറിലൂടെ സമ്മതിദാനാവകാശം വിനിയോഗിക്കുന്ന പൊലിസ് ഉദ്യോഗസ്ഥര്‍ക്ക് അതു നിര്‍വഹിക്കുന്നതിന് ആവശ്യമായ കാര്യങ്ങള്‍ ഏകോപിപ്പിക്കുന്നതിനായി നോഡല്‍ ഓഫിസറെ സൂപ്രണ്ട് ഓഫ് പൊലിസ് നിയോഗിക്കേണ്ടതാണെന്നും തെരഞ്ഞെടുപ്പ് കമ്മിഷന്‍ നിര്‍ദേശം നല്‍കിയിരുന്നു. ഫോറം നമ്പര്‍ 12 റിട്ടേണിങ് ഓഫിസര്‍ക്ക് അയക്കുന്നതോടെ മുതിര്‍ന്ന ഉദ്യോഗസ്ഥന്റെ ചുമതല അവസാനിക്കുന്നതാണ്. വോട്ട് രേഖപ്പെടുത്തിയ ബാലറ്റ് പേപ്പറുകള്‍ പൊലിസ് ഉദ്യോഗസ്ഥരില്‍നിന്ന് വാങ്ങുകയോ തുടര്‍നടപടികള്‍ എടുക്കുകയോ ചെയ്യാന്‍ പാടില്ല. ഇത്തരം കവറുകള്‍ പ്രസ്തുത ഉദ്യോഗസ്ഥര്‍ നേരിട്ടാണ് ബന്ധപ്പെട്ട റിട്ടേണിങ് ഓഫിസര്‍ക്ക് അയക്കേണ്ടത്. ഈ കാര്യങ്ങള്‍ ഏപ്രില്‍ 11ന് പൊലിസ് ആസ്ഥാനത്തുനിന്ന് യൂനിറ്റ് മേധാവികള്‍ക്ക് നല്‍കിയ സന്ദേശത്തില്‍ വ്യക്തമാക്കിയിട്ടുണ്ട്.
പോസ്റ്റല്‍ ബാലറ്റ് പേപ്പറുകള്‍ അടങ്ങിയ കവര്‍ കൃത്യമായി ബന്ധപ്പെട്ട പൊലിസ് ഉദ്യോഗസ്ഥര്‍ക്ക് നല്‍കേണ്ടതും സ്വതന്ത്രമായും ഭയരഹിതമായും പോസ്റ്റല്‍ ബാലറ്റ് ഉപയോഗിക്കുന്നതിനുള്ള സാഹചര്യം ഉറപ്പുവരുത്തേണ്ടതും അതത് യൂനിറ്റ് മേധാവിമാരുടെ ഉത്തരവാദിത്തമാണ്.
പോസ്റ്റല്‍ ബാലറ്റ് സ്വീകരിച്ച് വോട്ട് രേഖപ്പെടുത്തി തിരികെ റിട്ടേണിങ് ഓഫിസര്‍ക്ക് അയച്ചുകൊടുക്കേണ്ടത് സമ്മതിദായകരായ ഉദ്യോഗസ്ഥരുടെ കടമയാണെന്നും മറിച്ചുള്ള പ്രചാരണങ്ങള്‍ അടിസ്ഥാനരഹിതമാണെന്നും ഈ പ്രക്രിയയില്‍ എന്തെങ്കിലും കുറ്റകരമായ വ്യതിയാനം വരുത്തിയതായി ശ്രദ്ധയില്‍പ്പെട്ടാല്‍ അതിനെതിരേ നിയമ നടപടികള്‍ സ്വീകരിക്കുന്നതാണെന്നും ഡി.ജി.പി ലോക്‌നാഥ് ബെഹ്‌റ പത്രകുറിപ്പില്‍ അറിയിച്ചു.

 


ഏറ്റവും പുതിയ വാർത്തകൾക്കും വീഡിയോകൾക്കും സബ്‌സ്ക്രൈബ് ചെയ്യുക

കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.