2019 February 16 Saturday
യഥാര്‍ഥ മഹാന്‍ ഒരിക്കലും തന്നെക്കുറിച്ച് അങ്ങനെ കരുതിയിട്ടേയുണ്ടാകില്ല!

പുനരുദ്ധാരണം തുടങ്ങി; ഗാര്‍ഡന്‍ വളപ്പ്- ഇട്ടമ്മല്‍ പാതക്ക് ശാപമോക്ഷം

 

കാഞ്ഞങ്ങാട്: കാഞ്ഞങ്ങാട് നഗരസഭയില്‍പ്പെട്ട ഗാര്‍ഡന്‍ വളപ്പ് വഴി അജാനൂര്‍ പഞ്ചായത്തിലെ ഇട്ടമ്മലിലേക്ക് പോകുന്ന റോഡിന് അവസാനം ശാപ മോക്ഷം. കോട്ടച്ചേരി റെയില്‍വേ മേല്‍പ്പാലം യാഥാര്‍ഥ്യമായാല്‍ അപ്പ്രോച് റോഡ് ആവേണ്ട ഈ റോഡിനെ ചൊല്ലി വര്‍ഷങ്ങളായി നഗരസഭയും, സ്ഥല ഉടമകള്‍ തമ്മിലും കേസ് നിലനില്‍ക്കുകയായിരുന്നു.
തങ്ങളുടെ അനുവാദമില്ലാതെയാണ് ഇതിലൂടെ റോഡ് ഉണ്ടാക്കിയതെന്നും, അതിനാല്‍ പൂര്‍വ സ്ഥിതിയിലാക്കി തരണമെന്നും ആവശ്യപ്പെട്ട് ഉടമകളായ ചിത്താരി വി.പി ഹൗസിലെ ആമിനയുടെ മക്കളായ മുംതാസ്, നസീര്‍ എന്നിവര്‍ 2009ല്‍ കോടതിയെ സമീപിക്കുകയുണ്ടായി. കോടതി ഇവര്‍ക്ക് അനുകൂലമായി വിധി പറയുകയും ചെയ്തു. പിന്നീട് ഒരു അറ്റകുറ്റ പണിയും നടക്കാത്തതിനാല്‍ ഈ പാത കുണ്ടും കുഴിയും നിറഞ്ഞു ഗതാഗത യോഗ്യമല്ലാതായിട്ട് നാളുകളേറെയായി. ഇതിനെതിരെ കഴിഞ്ഞ നഗരസഭ ഭരണ സമിതി കോടതിയിലെത്തിയെങ്കിലും അനുകൂല വിധി നേടാന്‍ കഴിഞ്ഞിരുന്നില്ല.
രണ്ടു ദിവസം മുന്‍പ് നഗരസഭാ ചെയര്‍മാന്‍ വി.വി രമേശന്‍ മുന്‍കൈയെടുത്ത് ഉടമകളുമായി വീണ്ടും സംസാരിച്ചു ഒത്തു തീര്‍പ്പിലെത്തി. അതനുസരിച്ച് നിലവിലുള്ള റോഡിനു സ്ഥലം വിട്ടുനല്‍കാന്‍ ഉടമകള്‍ തയ്യാറായതോടെ, ഗാര്‍ഡന്‍ വളപ്പ്-ഇട്ടമ്മല്‍ റോഡിന് ശാപ മോക്ഷം ലഭിക്കുകയാണ്. തുടര്‍ന്ന് ഇന്നലെ റോഡിന്റെ പുനരുദ്ധാരണം ആരംഭിക്കുകയും ചെയ്തു .
നഗരസഭാ ചെയര്‍മാന്‍ വി.വി രമേശന്‍, ആരോഗ്യസ്ഥിരം സമിതി ചെയര്‍മാന്‍ എം.പി ജാഫര്‍, ബല്ല വില്ലേജ് ഓഫിസര്‍ ഗോപി, ഓവര്‍സീയര്‍ ശ്രീജിത്ത്, അനില്‍ ഗാര്‍ഡന്‍ വളപ്പ്, മുഹമ്മദ് ഫൈസല്‍ തുടങ്ങിയവര്‍ നവീകരണ ഉദ്ഘാടന വേളയില്‍ പങ്കെടുത്തു.

 


കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.