2018 September 25 Tuesday
ലോകത്തെ മാറ്റിമറിക്കാന്‍ ഇറങ്ങുന്നവര്‍ ആദ്യം സ്വയം മാറ്റിമറിക്കട്ടെ
സോക്രട്ടീസ്

പാകിസ്താന്റെ ധനസഹായം തടയാനുള്ള കോണ്‍ഗ്രസ് നീക്കത്തിനെതിരേ ഒബാമ

വാഷിങ്ടണ്‍: പാകിസ്താന് 540 ദശലക്ഷം ഡോളര്‍ സഹായം നല്‍കാനുള്ള യു.എസ് നീക്കത്തെ എതിര്‍ക്കുന്ന കോണ്‍ഗ്രസ് ശ്രമത്തിനെതിരേ ഒബാമ ഭരണകൂടം രംഗത്ത്. ഹഖാനി ശൃംഖലക്കെതിരേ പാകിസ്താന്‍ കാര്യക്ഷമമായ നടപടി സ്വീകരിക്കുന്നില്ലെന്നാരോപിച്ചാണ് റിപ്പബ്ലിക്കന്‍ പാര്‍ട്ടിക്ക് ഭൂരിപക്ഷമുള്ള കോണ്‍ഗ്രസില്‍ പാകിസ്താനുള്ള സഹായം തടയാന്‍ നീക്കം നടന്നത്. എന്നാല്‍ ഇത് ഉഭയകക്ഷി ബന്ധത്തില്‍ വിള്ളല്‍ വീഴ്ത്തുമെന്നാണ് ഒബാമ ഭരണകൂടം പറയുന്നത്.

കോണ്‍ഗ്രസിന്റെയും സെനറ്റിന്റേയും അനുമതി ലഭിച്ചശേഷമേ പാകിസ്താന് ധനസഹായം നല്‍കാനാകൂ. കോണ്‍ഗ്രസ് അംഗങ്ങള്‍ പാകിസ്താന്‍ ഹഖാനി ശൃംഖലക്കെതിരേ നടപടിയെടുക്കാത്ത വിഷയം ചൂണ്ടിക്കാട്ടിയെന്നും എന്നാല്‍ ഇതുമൂലം ധനസഹായം തടയുന്നത് അനാവശ്യവും സങ്കീര്‍ണവുമായ നടപടിയാകുമെന്നും വൈറ്റ്ഹൗസ് വ്യക്തമാക്കി. എന്‍.ഡി.എ.എ 2017 പദ്ധതിയില്‍ ഉള്‍പ്പെടുത്തിയാണ് പാകിസ്താന് യു.എസ് ധനസഹായം നല്‍കുന്നത്.
 2016 ഒക്ടോബര്‍ ഒന്നു മുതല്‍ 2017 ഡിസംബര്‍ 31 വരെയുള്ള കാലയളവിലാണ് 450 ദശലക്ഷം ഡോളറിന്റെ സഹായം പാകിസ്താന് ലഭിക്കുക. സഖ്യരാജ്യങ്ങള്‍ക്കുള്ള സഹായമായാണ് യു.എസ് പാകിസ്താന് ഈ തുക നല്‍കുന്നത്. കോണ്‍ഗ്രസിന്റെ പ്രതിരോധ കമ്മിറ്റിയുടെ ആശങ്കകള്‍ പരിഹരിക്കുമെന്ന് വൈറ്റ് ഹൗസ് പറയുന്നു. യു.എസിന്റെ ദേശീയ സുരക്ഷ കൂടി പരിഗണിച്ചാണ് പാകിസ്താന് സഹായം നല്‍കുന്നതെന്നാണ് ഒബാമ ഭരണകൂടം പറയുന്നത്.

വടക്കന്‍ പാകിസ്താനിലെ വസീറിസ്ഥാന്‍ കേന്ദ്രീകരിച്ച് പ്രവര്‍ത്തിക്കുന്ന ഹഖാനി ശൃംഖലയെ യു.എസ് തീവ്രവാദ വിഭാഗമായി പ്രഖ്യാപിച്ചിരുന്നു. അഫ്ഗാനിസ്ഥാന്‍ അതിര്‍ത്തിയില്‍ പ്രവര്‍ത്തിക്കുന്ന ഇവര്‍ അല്‍ഖാഇദയ്ക്ക് സമാനമായ പ്രവര്‍ത്തനമാണ് നടത്തുന്നത്. ഈ വര്‍ഷം സെപ്തംബര്‍ 31 ന് അവസാനിക്കുന്ന ധനസഹായ പാക്കേജില്‍ പാകിസ്താന് യു.എസ് 300 ദശലക്ഷം ഡോളറാണ് നല്‍കുന്നത്. ഹഖാനി ശൃംഖലക്കെതിരേ പാകിസ്താന്‍ നടപടിയെടുക്കുന്നുവെന്ന് യു.എസ് പ്രതിരോധ സെക്രട്ടറി ഉറപ്പു നല്‍കണമെന്നാണ് കോണ്‍ഗ്രസ് അംഗങ്ങള്‍ ആവശ്യപ്പെടുന്നത്. എന്നാല്‍ ഇത്തരത്തില്‍ ഉറപ്പു നല്‍കാന്‍ പ്രതിരോധ സെക്രട്ടറി തയാറായിട്ടില്ല.


കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.