2017 April 26 Wednesday
സൗന്ദര്യം കാഴ്ചയെ ആകര്‍ഷിക്കുന്നു. അര്‍ഹത ആത്മാവിനെ കീഴടക്കുന്നു.
അലക്‌സാണ്ടര്‍ പോപ്പ്‌

പയ്യന്നൂര്‍ മണ്ഡലത്തില്‍ സമഗ്ര കുടിവെള്ള പദ്ധതി തയാറാകുന്നു

 

പയ്യന്നൂര്‍: വരള്‍ച്ചയെ നേരിടാനും കുടിവെള്ള ക്ഷാമമുള്ള പ്രദേശത്ത് വെള്ളം എത്തിക്കുന്നതിനുമായി പയ്യന്നൂര്‍ മണ്ഡലത്തില്‍ സമഗ്ര കുടിവെള്ള പദ്ധതി തയാറാക്കുന്നു. മുന്നോടിയായി മണ്ഡലത്തിലെ കുടിവെള്ള പ്രശ്‌നം ചര്‍ച്ച ചെയ്യുന്നതിനും സമഗ്ര പരിപാടി ആവിഷ്‌കരിക്കുന്നതിനുമായി സി കൃഷ്ണന്‍ എം.എല്‍.എയുടെ നേതൃത്വത്തില്‍ പയ്യന്നൂര്‍ നഗരസഭാ ഹാളില്‍ യോഗം വിളിച്ചു ചേര്‍ത്തു. നഗരസഭാ ചെയര്‍മാന്‍ അഡ്വ. ശശി വട്ടക്കൊവ്വല്‍, പഞ്ചായത്തു പ്രസിഡന്റുമാര്‍, വാട്ടര്‍ അതോറിറ്റി, മൈനര്‍ ഇറിഗേഷന്‍, ഗ്രൗണ്ട് വാട്ടര്‍ എന്നിവയിലെ വകുപ്പ് ഉദ്യോഗസ്ഥന്മാര്‍ പങ്കെടുത്തു.
ഈ വര്‍ഷം നേരിടാനിരിക്കുന്ന വരള്‍ച്ചയുടെയും കുടിവെള്ള ക്ഷാമത്തിന്റെയും പ്രശ്‌നങ്ങള്‍ ജനപ്രതിനിധികള്‍ അവതരിപ്പിച്ചു. വകുപ്പുതല ഉദ്യോഗസ്ഥര്‍ ഇപ്പോള്‍ നടപ്പാക്കി കൊണ്ടിരിക്കുന്ന കുടിവെള്ള, ജലസേചന പദ്ധതികളുടെ വിശദാംശങ്ങള്‍ വിശദീകരിച്ചു. വിവിധ വകുപ്പുകളുടെ സംയോജനത്തിലൂടെ തദ്ദേശഭരണ വകുപ്പുകളുടെ പ്രശ്‌നങ്ങള്‍ക്ക് പരിഹാരം കാണുമെന്ന് സി കൃഷ്ണന്‍ എം.എല്‍.എ വ്യക്തമാക്കി. ഓരോ പ്രദേശത്തും കുടിവെള്ള ക്ഷാമം മൂലം ദുരിതമനുഭവിക്കുന്ന കുടുംബങ്ങളുടെ കണക്കുകളും അതിനു പരിഹാരമായി കുടിവെള്ളം ലഭ്യമാകുന്ന സ്രോതസും ചൂണ്ടിക്കാട്ടി റിപ്പോര്‍ട്ട് തയാറാക്കാന്‍ യോഗം പഞ്ചായത്തുകളോട് ആവശ്യപ്പെട്ടു. ഇതു പരിശോധിച്ച് ലഘു പദ്ധതികള്‍ രൂപം നല്‍കുന്നതിനായി 27ന് വീണ്ടും യോഗം ചേരും.


കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.