2019 February 19 Tuesday
യുക്തിയും ശാന്തമായി തീരുമാനമെടുക്കാനുള്ള കഴിവുമാണ് ഒരു നേതാവിനുവേണ്ട വിശിഷ്ടഗുണങ്ങള്‍ -കോര്‍ണിലിയസ് ടാസിറ്റസ്‌

നേത്രപരിശോധനാ ക്യാംപില്‍ വേണ്ടത്ര ഡോക്ടര്‍മാരില്ല; വയോജനങ്ങള്‍ ചികിത്സ ലഭിക്കാതെ മടങ്ങി

എരുമപ്പെട്ടി: എരുമപ്പെട്ടി ഗ്രാമപഞ്ചായത്ത് വയോജനങ്ങള്‍ക്കായി നടത്തിയ നേത്രപരിശോധന ക്യാംപില്‍ ഡോക്ടര്‍മാരുടെ കുറവ് മൂലം രോഗികള്‍ വലഞ്ഞതായി പരാതി. മങ്ങാട് ആയുര്‍വേദ ഡിസ്‌പെന്‍സറിയില്‍ നടന്ന ക്യാംപില്‍ കണ്ണ് പരിശോധനക്കെത്തിയ വൃദ്ധജനങ്ങളാണ് മണിക്കൂറുകള്‍ നീണ്ട കാത്തിരിപ്പിനൊടുവില്‍ മടങ്ങിപ്പോയത്. പഞ്ചായത്തിലെ മുഴുവന്‍ വയോധികരുടേയും കണ്ണ് പരിശോധനക്കായി രണ്ട് ഡോക്ടര്‍മാര്‍ മാത്രമാണുണ്ടായിരുന്നതെന്ന് നാട്ടുകാര്‍ ആരോപിച്ചു.
200 ഓളം പേര്‍ പരിശോധനക്കായി എത്തിയിരുന്നു. ഇതില്‍ 100 പേര്‍ക്ക് മാത്രമാണ് ടോക്കണ്‍ നല്‍കിയത്. അതിരാവിലെ എത്തിയ വയോധികര്‍ പോലും പരിശോധന നടത്താന്‍ കഴിയാതെ മടങ്ങേണ്ടി വന്നു. കുടിവെള്ളവും ഭക്ഷണവും കഴിക്കാതെ തളര്‍ന്ന് അവശരായാണ് സാധാരണക്കാരും നിര്‍ധനരുമായ ഇവര്‍ തിരിച്ചു പോയത്. അധികൃതരുടെ നിരുത്തരവാദിത്ത്വപരമായ പ്രവൃത്തിയാണ് ജനങ്ങളെ ബുദ്ധിമുട്ടിലാക്കിയതെന്ന് നാട്ടുകാര്‍ പറഞ്ഞു.
അതേസമയം ക്യാംപില്‍നിന്ന് ചികിത്സ ലഭിക്കാതെ മടങ്ങിപ്പോയ എല്ലാവര്‍ക്കും എരുമപ്പെട്ടി സാമൂഹ്യാരോഗ്യ കേന്ദ്രത്തില്‍ ചികത്സ നല്‍കുന്നതിനുള്ള സംവിധാനം ഒരുക്കിയിട്ടുണ്ടെന്ന് അധികൃതര്‍ അറിയിച്ചു.


കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.