2018 November 20 Tuesday
ജനങ്ങളേ, നിങ്ങള്‍ക്ക് നിങ്ങളുടെ നാഥനിങ്കലില്‍നിന്നുള്ള തത്വോപദേശങ്ങളും ശമനവും മാര്‍ഗദര്‍ശനവും സത്യവിശ്വാസികള്‍ക്ക് കാരുണ്യവും വന്നെത്തിയിരിക്കുന്നു

നീന്തല്‍ക്കുളവും ജൈവപച്ചക്കറി കൃഷിയുമൊരുക്കി വിദ്യാര്‍ഥികള്‍

മണ്ണാര്‍ക്കാട്: നാം പഴാക്കിക്കളയുന്ന മഴവെള്ളം വിദ്യാര്‍ഥികള്‍ക്ക് പഠനാര്‍ഹമായ നിരവധി പ്രവര്‍ത്തനങ്ങള്‍ക്ക് പ്രയോജനപ്പെടുത്താനായി എടത്തനാട്ടുകര ടി.എ.എം.യു.പി (യത്തീംഖാന) സ്‌കൂളില്‍ ആവിഷ്‌ക്കരിച്ച് നടപ്പാക്കുന്ന മഴക്കൊയ്ത്ത് പദ്ധതി വേറിട്ട കാഴ്ചയാകുന്നു. വിശാലമായ വിദ്യാലയ മേല്‍ക്കൂരയില്‍ പതിക്കുന്ന മഴവെള്ളം മുഴുവനായും പ്രത്യേകം തയാറാക്കിയ ചെലവുകുറഞ്ഞ സംഭരണിയില്‍ എത്തിച്ചാണ് വിവിധ പ്രവര്‍ത്തനങ്ങള്‍ക്കായി പ്രയോജനപ്പെടുത്തുന്നത്.
പ്രീ പ്രൈമറി മുതല്‍ ഏഴാം ക്ലാസുവരെ 950ല്‍പരം കുട്ടികള്‍ പഠിക്കുന്ന വിദ്യാലയത്തിലെ നീന്തല്‍ അറിയാത്ത കുട്ടികള്‍ക്ക് ഇതിനായുള്ള പരിശീലനമാണ് ആദ്യഘട്ടത്തില്‍ ഒരുക്കുന്നത്. ഇതിനായി രക്ഷിതാക്കളുടെ സമ്മതത്തോടെ 150 കുട്ടികള്‍ക്ക് പരിശീലനം ആരംഭിച്ചുകഴിഞ്ഞു. 40അടി നീളവും, 20 അടി വീതിയും, ഒന്നര മീറ്റര്‍ താഴ്ച്ചയുമുള്ള നീന്തല്‍ കുളത്തില്‍ ഏകദേശം ഒരു ലക്ഷം ലിറ്റര്‍ വെള്ളം ഇതിനോടകം സംഭരിച്ചു കഴിഞ്ഞു.
അധ്യാപകരും പൂര്‍വവിദ്യാര്‍ഥികളും രക്ഷിതാക്കളും ചേര്‍ന്നാണ് നീന്തല്‍ പരിശീലനത്തില്‍ കുട്ടികളെ സഹായിക്കുന്നത്. ഒഴിവ് പീരീഡുകള്‍ ക്രമീകരിച്ച് പ്രത്യേകം ഗ്രൂപ്പുകളാക്കിയാണ് കുട്ടികള്‍ക്ക് പരിശീലനം. നീന്തല്‍ പരിശീലനത്തിനുശേഷം കുളത്തില്‍ മത്സ്യക്കുഞ്ഞുങ്ങളെ നിക്ഷേപിച്ച് മത്സ്യവളര്‍ത്തല്‍ കുട്ടികള്‍ക്ക് പരിജയപ്പെടുത്തും. സ്‌കൂളിലെ ഉച്ചഭക്ഷണാവശിഷ്ടങ്ങള്‍ ഇതിനായി പ്രയോജനപ്പെടുത്തും. കൂടാതെ കുളത്തില്‍ താമര, ആമ്പല്‍, വിവിധതരം പായലുകള്‍ എന്നിവ വളര്‍ത്തി പരിസ്ഥിതി ശാസ്ത്ര പഠനത്തിനുള്ള ഇക്കോ-സിസ്റ്റം തയാറാക്കാനും പദ്ധതിയുണ്ടെന്ന് കണ്‍വീനര്‍ ടി.കെ മുഹമ്മദ് അറിയിച്ചു.
കൂടാതെ ജലവൈദ്യുത പദ്ധതിയുടെ മാതൃകയും പ്രവര്‍ത്തനവും പരിചയപ്പെടുത്തുന്നതിനായും കുളത്തിലെ ജലം ഉപയോഗിക്കുന്നുണ്ട്. ഇതിനായി ടര്‍ബൈനും അനുബന്ധ സംവിധാനങ്ങളും പി.ടി.എ പ്രസിഡന്റ് എം.കെ യാക്കൂബിന്റെ നേതൃത്വത്തില്‍ തയാറാക്കി പരീക്ഷണാടിസ്ഥാനത്തില്‍ പ്രവര്‍ത്തിപ്പിച്ച് വൈദ്യുതി നിര്‍മിച്ചു.
എടത്തനാട്ടുകര ടി.എ.എം യു.പി സ്‌കൂളിലെ മഴക്കൊയ്ത്ത് പദ്ധതിയുടേയും നീന്തല്‍ പരിശീലനത്തിന്റെയും ഉദ്ഘാടനം നാളെ മണ്ണാര്‍ക്കാട് ഫയര്‍ ആന്‍ഡ് റസ്‌ക്യൂ എസ്.ഐ നിര്‍വഹിക്കും. തുടര്‍ന്ന് അഗ്നിശമന സേനാംഗങ്ങളുടെ ജീവന്‍രക്ഷാ പ്രവര്‍ത്തനങ്ങളുടെ പരിചയപ്പെടുത്തലും പ്രദര്‍ശനവും നടക്കും.


കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.