2018 November 18 Sunday
ജീവിച്ചതല്ല ജീവിതം, നാം ഓര്‍മയില്‍ വയ്ക്കുന്നതാണ്, പറഞ്ഞു കേള്‍പ്പിക്കാന്‍ വേണ്ടി നാം ഓര്‍മ്മയില്‍ വയ്ക്കുന്നതാണു ജീവിതം

നിയമപാലകര്‍ക്കെതിരേ നിയമ യുദ്ധത്തിനൊരുങ്ങി ഗെയില്‍ ഇര

ആഷിഖ് അലി ഇബ്രാഹിം

മുക്കം: ഗെയില്‍ വാതക പൈപ്പ്‌ലൈന്‍ പദ്ധതി നടപ്പാക്കുന്നതുമായി ബന്ധപ്പെട്ട് ഒരുവര്‍ഷം മുന്‍പ് കോഴിക്കോട്- മലപ്പുറം ജില്ലാ അതിര്‍ത്തിയായ എരഞ്ഞിമാവിലും പരിസര പ്രദേശങ്ങളിലും അഴിഞ്ഞാടിയ പൊലിസ് അക്രമത്തില്‍ ക്രൂരമായി മര്‍ദനമേറ്റ യുവാവ് നീതിതേടി കോടതിയിലേക്ക്. വെസ്റ്റ് കൊടിയത്തൂര്‍ അമ്പലക്കണ്ടി മുഹമ്മദ് ഷെരീഫാണ് തനിക്കു നേരിട്ട ക്രൂരനടപടികളുടെ പേരില്‍ പൊലിസിനെതിരേ പോരാട്ടം നടത്തുന്നത്. അന്നു പൊലിസിന്റെ മര്‍ദനങ്ങള്‍ക്കിരയായ നിരവധിപേര്‍ നിയമ പോരാട്ടത്തിന്റെ വഴിയില്‍ നിന്ന് പിന്‍മാറിയെങ്കിലും നീതി ലഭിക്കുംവരെ പോരാടാനാണ് ഇദ്ദേഹത്തിന്റെ തീരുമാനം. 2017 നവംബര്‍ ഒന്നിന് എരഞ്ഞിമാവില്‍ ഗെയില്‍വിരുദ്ധ പ്രക്ഷോഭം നടത്തിയ സമരക്കാരെ ഓടിക്കുന്നതിനിടയില്‍ കല്ലായില്‍ വച്ചാണ് ഷെരീഫിനെ പൊലിസ് ക്രൂരമായി തല്ലിച്ചതച്ചത്. തന്റെ കൃഷിസ്ഥലത്തേക്ക് വരുമ്പോഴായിരുന്നു പൊലിസ് വളഞ്ഞിട്ട് അക്രമിച്ചതെന്നും പണവും മൊബൈല്‍ ഫോണും പൊലിസ് കവര്‍ന്നതായും അദ്ദേഹം പറഞ്ഞു. അറസ്റ്റ് ചെയ്ത് ഷെരീഫ് അടക്കമുള്ളവരെ മഞ്ചേരി ജയിലില്‍ പ്രവേശിപ്പിക്കുകയായിരുന്നു. ലാത്തിച്ചാര്‍ജിനിടയില്‍ തലയ്ക്ക് സാരമായി പരുക്കേറ്റ ഷരീഫിനെ ആദ്യം ആശുപത്രിയിലെത്തിക്കാന്‍ പൊലിസ് തയാറായില്ല. പിന്നീട് ഗെയില്‍വിരുദ്ധ സമരസമിതി നേതാക്കള്‍ ഇടപെട്ടാണ് ചികിത്സ ലഭ്യമാക്കിയത്. തുടര്‍ന്ന് പൊലിസിനെ അക്രമിക്കല്‍, പൊതുമുതല്‍ നശിപ്പിക്കല്‍, പൊലിസിന്റെ കൃത്യനിര്‍വഹണം തടസപ്പെടുത്തല്‍ അടക്കമുള്ള വകുപ്പുകള്‍ ചേര്‍ത്ത് നിരവധി കേസുകളില്‍ ഉള്‍പ്പെടുത്തി റിമാന്‍ഡ് നീട്ടുകയായിരുന്നു. മഞ്ചേരി ജയിലില്‍നിന്ന് പുറത്തിറങ്ങിയപ്പോള്‍ മുക്കം പൊലിസിന്റെ പരാതിയില്‍ വീണ്ടും റിമാന്‍ഡിലായി. ഇങ്ങനെ 20 ദിവസത്തോളം ജയിലില്‍ കിടന്ന ശേഷമാണ് നിരപരാധിയായ ഇദ്ദേഹം പുറത്തിറങ്ങിയത്. ഇതിനിടെ ഉപജീവന മാര്‍ഗമായിരുന്ന ബേക്കറി കടയും കൂള്‍ബാറും നഷ്ടത്തെ തുടര്‍ന്ന് അടച്ചുപൂട്ടേണ്ടി വന്നു. പൊലിസിന്റെ ക്രൂരതകള്‍ക്കെതിരേ നടപടി ആവശ്യപ്പെട്ട് മുഖ്യമന്ത്രിക്കും സംസ്ഥാന പൊലിസ് മേധാവിക്കും ഷെരീഫ് പരാതി നല്‍കിയെങ്കിലും നിരാശയായിരുന്നു ഫലം. ഇതോടെ വാഴക്കാട് എസ്.ഐ വിജയരാജനും കണ്ടാലറിയാലുന്ന പൊലിസുകാര്‍ക്കുമെതിരേ പൊലിസ് കംപ്ലയിന്റ് അതോറിറ്റി, സംസ്ഥാന മനുഷ്യാവകാശ കമ്മിഷന്‍, ന്യൂനപക്ഷ കമ്മിഷന്‍ എന്നിവിടങ്ങളില്‍ പരാതി നല്‍കി. എന്നാല്‍ തിരുവനന്തപുരം, തൃശൂര്‍, മലപ്പുറം എന്നിവിടങ്ങളിലടക്കം നിരവധി സിറ്റിങ്ങുകള്‍ നടത്തിയെങ്കിലും പൊലിസുകാര്‍ക്കെതിരേ നടപടിയെടുക്കാന്‍ കഴിയില്ലെന്ന വാദമാണു പൊലിസ് കംപ്ലയിന്റ് അതോറിറ്റി അടക്കമുള്ള കമ്മിഷനുകള്‍ ഉന്നയിച്ചത്.  ഇതോടെയാണു നീതിതേടി കോടതിയെ സമീപിക്കാന്‍ ഷെരീഫ് തീരുമാനിച്ചത്. പ്രക്ഷോഭത്തിന്റെ മറവില്‍ അഴിഞ്ഞാടിയ പൊലിസിനെതിരേ നടപടി ഉണ്ടാകുംവരെ നിയമപോരാട്ടം തുടരുമെന്ന് വ്യാപാരി വ്യവസായി ഏകോപന സമിതി കൊടിയത്തൂര്‍ യൂനിറ്റ് പ്രസിഡന്റ് ഷെരീഫ് വ്യക്തമാക്കി. ഗെയില്‍ വിരുദ്ധ സമരത്തെ ക്രൂരമായ അടിച്ചമര്‍ത്തിയ പൊലിസ് നടപടി ശക്തമായ വിമര്‍ശനത്തിനു വഴിവച്ചിരുന്നെങ്കിലും പൊലിസിനെതിരേ യാതൊരു നടപടിയും ഉണ്ടായിരുന്നില്ല.

 


കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.