2019 August 18 Sunday
തെറ്റു ചെയ്യുന്നവന്‍ മനുഷ്യനാണ്; അതിനെക്കുറിച്ചോര്‍ത്തു ദു:ഖിക്കുന്നവന്‍ മഹര്‍ഷിയാണ്; എന്നാല്‍ അതില്‍ അഭിമാനം കൊള്ളുന്നവന്‍ പിശാചാണ്.

നാടുകടത്തല്‍

അബ്ദുല്ല അല്‍ബറദൂനി വിവ: അബ്ദുല്ല പേരാമ്പ്ര

എന്റെ രാജ്യം
ഒരു സ്വേഛാധിപതിയില്‍ നിന്നും
മറ്റൊരാളിലേക്ക് കൈമാറ്റം ചെയ്യപ്പെട്ടിരിക്കുന്നു.
അയാളാവട്ടെ ഏറ്റവും ദുഷിച്ചവനും
ഒരു ജയിലില്‍ നിന്ന് മറ്റൊന്നിലേക്ക്
ഒരു നാടുകടത്തലില്‍ നിന്ന് മറ്റൊരു
പ്രവാസത്തിലേക്ക്…
മെലിഞ്ഞ ഒരു ഒട്ടകത്തെ പോലെ
എവിടെയും എന്നെ ഒളിപ്പിക്കാന്‍ കഴിയുമിന്ന്.
മരണത്തിന്റെ കലവറയില്‍ നിന്ന്
എന്റെ രാജ്യത്തിന് മോചനമുണ്ടാവുമോ?
മൗനമുറങ്ങുന്ന ശ്മശാനത്തില്‍
ഓരോ ഖബ്‌റിടവും കുഴിച്ചുനോക്കി
വരാനിരിക്കുന്ന വസന്തവും
മണ്ണടയാത്ത പൈതൃകവും
ആരോ അന്വേഷിച്ചു നടക്കുന്നു.
ഉറക്കം കൂടുകൂട്ടിയ കണ്ണുകളില്‍ നിന്ന്
സ്വപ്നങ്ങള്‍ പടിയിറങ്ങിയിരിക്കുന്നു.
എവിടെയോ ഒളിച്ച ഒരു പ്രേതം കണക്കെ
പ്രത്യക്ഷപ്പെടുമായിരിക്കും കിനാവുകള്‍.
ഇരുട്ടില്‍ നിന്ന് കൊടും രാത്രിയിലേക്ക്
ഇറങ്ങിവരുമോ സ്വപ്നങ്ങള്‍?
എന്റെ രാജ്യത്തിന്റെ സങ്കടങ്ങള്‍
അതിന്റെ അതിര്‍ത്തിക്കുള്ളില്‍ ചുറ്റിത്തിരിയുന്നു.
മറ്റുള്ളവരുടെ മണ്ണില്‍
സ്വന്തം ഭൂമിയില്‍ തന്നെയും
അത് പ്രവാസിയായി മാറിയിരിക്കുന്നു.

അബ്ദുല്ല അല്‍ബറദൂനി- (1929-1999)ലോകപ്രശസ്ത അറബ് കവി. യമനിലെ സറാജാട്ട് ഗ്രാമത്തില്‍ ജനനം. ഏഴാം വയസില്‍ ചിക്കന്‍ പോക്‌സ് പിടിപ്പെട്ട് അന്ധനായി. 13 ാം വയസ് മുതല്‍ കവിത എഴുതിത്തുടങ്ങി. ഇതുവരെ 12 കവിതാ കൃതികളും പത്തോളം ഗദ്യകൃതികളും രചിച്ചു. രാഷ്ട്രീയം, സ്ത്രീ സമത്വം, നാടോടി സാഹിത്യം എന്നീ മേഖലകളിലും ശ്രദ്ധേയന്‍. 1950, 60, 70 കാലഘട്ടങ്ങളില്‍ രാഷ്ട്രീയ തടവുകാരനായി ജയിലില്‍ കിടന്നു.


ഏറ്റവും പുതിയ വാർത്തകൾക്കും വീഡിയോകൾക്കും സബ്‌സ്ക്രൈബ് ചെയ്യുക

കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.