2019 April 25 Thursday
ഒരു പ്രഭുവിന്റെ രക്തത്തെക്കാള്‍ വില കൂടിയതത്രെ ഒരു പിച്ചക്കാരന്റെ കൈയിലുള്ള പുസ്തകം -വില്യം ഷേക്‌സ്പിയര്‍

ദര്‍വാദിലെ കെട്ടിട ദുരന്തം: മരണം 10 ആയി

 

ബംഗളൂരു: കര്‍ണാടകയിലെ ദര്‍വാദില്‍ നിര്‍മാണത്തിലിരിക്കുന്ന നാലുനില കെട്ടിടം തകര്‍ന്നുണ്ടായ ദുരന്തത്തില്‍ മരിച്ചവരുടെ എണ്ണം 10 ആയി. ഇന്നലെ എട്ടുമൃതദേഹങ്ങള്‍ കൂടി കണ്ടെടുത്തതോടെയാണിത്. ബംഗളൂരുവില്‍നിന്നു 400 കിലോമീറ്റര്‍ അകലെ ദര്‍വാദ് ജില്ലയിലെ കുമാരേശ്വരില്‍ ചൊവ്വാഴ്ച ഉച്ചയോടെയാണ് അപകടമുണ്ടായത്.

നിര്‍മാണത്തൊഴിലാളികളടക്കം അന്‍പതോളം ആളുകള്‍ കെട്ടിടത്തിനുള്ളില്‍ കുടുങ്ങിക്കിടക്കുകയായിരുന്നു. രക്ഷാപ്രവര്‍ത്തനം ശക്തമാക്കിയതിനാലാണ് മരണസംഖ്യ കുറയ്ക്കാനായത്. 10 ആംബുലന്‍സുകളും അഞ്ച് അഗ്‌നിശമനസേനാ യൂനിറ്റും രക്ഷാപ്രവര്‍ത്തനത്തില്‍ പങ്കെടുത്തു. അവശിഷ്ടങ്ങള്‍ക്കിടയില്‍ കുടുങ്ങിക്കിടന്ന പലരെയും പരുക്കുകളോടെയും സുരക്ഷിതമായും പുറത്തെത്തിച്ചു. എന്നാല്‍ പത്തുപേരെ രക്ഷിക്കാന്‍ കഴിഞ്ഞില്ലെന്നു പൊലിസ് അറിയിച്ചു.

മൂന്നാം നിലയിലെ പണികള്‍ നടന്നുകൊണ്ടിരിക്കെയാണ് അപകടം. കെട്ടിടത്തിന്റെ ആദ്യരണ്ടുനിലകളില്‍ അന്‍പതിലധികം കടകള്‍ പ്രവൃത്തിച്ചുവരികയായിരുന്നു. ഈ സമയം 150 ലധികം ആളുകളാണ് ഈ രണ്ടുനിലകളിലുമായി ഉണ്ടായിരുന്നത്. അപകടം സംബന്ധിച്ച് ദര്‍വാദ് പൊലിസ് അന്വേഷണം തുടങ്ങിയിട്ടുണ്ട്.

കെട്ടിടം തകര്‍ന്നുവീഴാനുള്ള കാരണം ഇതുവരെ കണ്ടെത്തിയിട്ടില്ല. എന്നാല്‍ നിലവാരമില്ലാത്ത നിര്‍മാണ സമാഗ്രികള്‍ ഉപയോഗിച്ചതുകൊണ്ടാണ് കെട്ടിടം തകര്‍ന്നുവീണതെന്നു പ്രദേശവാസികള്‍ ആരോപിച്ചു. സംഭവത്തില്‍ ഇതുവരെ പൊലിസ് ആരെയും അറസ്റ്റ്‌ചെയ്തിട്ടില്ല.

 

 


ഏറ്റവും പുതിയ വാർത്തകൾക്കും വീഡിയോകൾക്കും സബ്‌സ്ക്രൈബ് ചെയ്യുക

കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.