2018 November 17 Saturday
ജീവിച്ചതല്ല ജീവിതം, നാം ഓര്‍മയില്‍ വയ്ക്കുന്നതാണ്, പറഞ്ഞു കേള്‍പ്പിക്കാന്‍ വേണ്ടി നാം ഓര്‍മ്മയില്‍ വയ്ക്കുന്നതാണു ജീവിതം

താഴെചൊവ്വ പുതിയപാലം ടാറിങ് രണ്ടാഴ്ച്ചക്കകം; കുരുക്കഴിക്കാന്‍ നഗരകവാടം

കണ്ണൂര്‍: ദേശീയപാതയിലെ ഗതാഗതക്കുരുക്കിനു പരിഹാരം കാണാന്‍ നിര്‍മിച്ച താഴെചൊവ്വയിലെ സമാന്തരപാലത്തിന്റെ മെക്കാഡം ടാറിങ് പ്രവൃത്തി രണ്ടാഴ്ചകള്‍ക്കുള്ളില്‍ തുടങ്ങും.
ടാറിനു പകരം കോണ്‍ക്രീറ്റ് മിശ്രിതമുപയോഗിച്ച് താല്‍ക്കാലിക ടാറിങ് നടത്തിയാണ് നിലവില്‍ പാലം ഗതാഗതത്തിന് തുറന്ന് കൊടുത്തിട്ടുള്ളത്. ഇതോടെ സമീപത്തുള്ള വ്യാപാരികള്‍ക്കും ഇരുചക്രവാഹനക്കാര്‍ക്കും മൂക്കുപൊത്തി പോകണ്ട അവസ്ഥയായി. വാഹനങ്ങള്‍ കടന്നുപോകുമ്പോള്‍ കോണ്‍ക്രീറ്റ് പൊടി പാറുന്നതാണ് ദുരിതമായത്.
നിലവിലുള്ള പാലത്തില്‍ നിന്ന് 1.50 മീറ്റര്‍ തെക്ക് ഭാഗത്തേക്കു മാറി 20 മീറ്റര്‍ പാലത്തിന്റെ നിര്‍മാണം പൂര്‍ത്തിയായിയിട്ട് മാസങ്ങളായി. രണ്ടുമാസമായുള്ള മഴയെത്തുടര്‍ന്നാണ് ടാറിങ് പ്രവൃത്തി നീണ്ടുപോയതെന്ന് അധികൃതര്‍ പറഞ്ഞു.
മെക്കാഡം ടാറിങ് പ്രവൃത്തി കഴിഞ്ഞാല്‍ ഉടന്‍ പുതിയപ്പാലത്തിന്റെ ഉദ്ഘാടനവും നടക്കും.
അതേസമയം, പാലം ഗതാഗതത്തിന് തുറന്ന്‌കൊടുത്തിട്ടും ഗതാഗതക്കുരുക്ക് പരിഹരിക്കാന്‍ കഴിഞ്ഞിട്ടില്ലെന്നും ഗതാഗതക്കുരുക്കിനു പ്രധാനകാരണം കാപ്പാട് റോഡിലൂടെയും തെഴുക്കിലെപീടിക ജങ്ഷനിലുള്ള സിറ്റി റോഡിലൂടെ പോകുന്ന വാഹനങ്ങളാണെന്നും ഇതിനു പരിഹാരമാണ് കാണേണ്ടതെന്നും നാട്ടുകാര്‍ പറയുന്നു.
രാവിലെയും വൈകിട്ടും സ്‌കൂള്‍ വാഹനങ്ങളും ഓഫിസ് ജീവനക്കാരുടെ വാഹനങ്ങളും നിരത്തിലിറങ്ങിയാല്‍ സ്ഥിതി രൂക്ഷമാകും.


കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.