2019 September 18 Wednesday
ദാരിദ്ര്യത്തെക്കുറിച്ച് ലജ്ജിക്കാനില്ല. അതില്‍ ലജ്ജതോന്നുന്നതാണ് ലജ്ജാകരം.

ജഡ്ജി നിയമനത്തില്‍ കേന്ദ്രസര്‍ക്കാറിന് താല്‍പ്പര്യമില്ലെന്ന് ചീഫ് ജസ്റ്റിസ്

ഈ സര്‍ക്കാരാണ് കൂടുതല്‍ ജഡ്ജിമാരെ നിയമിച്ചതെന്ന് കേന്ദ്രനിയമമന്ത്രി

ന്യൂഡല്‍ഹി: ഉന്നത നീതിപീഠങ്ങളിലെ ജഡ്ജിമാരുടെ നിയമനവുമായി ബന്ധപ്പെട്ട് കേന്ദ്രസര്‍ക്കാരിനെ വിമര്‍ശിച്ചു സുപ്രിംകോടതി ചീഫ്ജസ്റ്റിസ് ടി.എസ് താക്കൂര്‍ വീണ്ടും രംഗത്ത്. കോടതികളില്‍ ജഡ്ജിമാരുടെ ഒഴിവ് നികത്തുകയും അടിസ്ഥാന സൗകര്യങ്ങള്‍ വര്‍ധിപ്പിക്കുകയും ചെയ്യുകയെന്ന ഗൗരവമുള്ള വിഷയത്തില്‍ കേന്ദ്രസര്‍ക്കാരിനു താല്‍പ്പര്യമില്ലെന്നും ഇക്കാര്യത്തില്‍ അലസ സമീപനമാണ് സര്‍ക്കാര്‍ സ്വീകരിക്കുന്നതെന്നും അദ്ദേഹം പറഞ്ഞു. 500 ജഡ്ജിമാരുടെ ഒഴിവുകളാണ് ഹൈക്കോടതികളിലുള്ളത്. കോടതി മുറികള്‍ ജഡ്ജിമാരില്ലാത്തതിനാല്‍ ഒഴിഞ്ഞു കിടക്കുകയാണ്. വിവിധ ട്രൈബ്യുണലുകള്‍ രൂപീകരിക്കുന്ന കാര്യത്തില്‍ സുപ്രിംകോടതി എതിരല്ല. ട്രൈബ്യൂണലുകള്‍ കോടതിയുടെ ജോലി ഭാരം കുറയ്ക്കാന്‍ സഹായിക്കും. എന്നാല്‍ ട്രൈബ്യുണലുകള്‍ക്ക് ആവശ്യമായ അടിസ്ഥാന സൗകര്യങ്ങള്‍ സര്‍ക്കാര്‍ നല്‍കുന്നില്ല. നിലവിലുള്ള ട്രൈബ്യൂണലുകളില്‍ തന്നെ ആവശ്യമായ സൗകര്യങ്ങളില്ലെന്നും താക്കൂര്‍ പറഞ്ഞു. സെന്‍ട്രല്‍ അഡ്മിനിസ്‌ട്രേറ്റിവ് ട്രൈബൂണലിന്റെ (സി.എ.ടി) വാര്‍ഷികസമ്മേളനത്തെ അഭിസംബോധനചെയ്തു സംസാരിക്കുകയായിരുന്നു അദ്ദേഹം.
വിരമിക്കാത്ത സുപ്രിംകോടതി ജഡ്ജിമാരെ തന്നെ ട്രൈബ്യൂണല്‍ തലവന്‍മാരായി അയയ്‌ക്കേണ്ട സാഹചര്യമാണുള്ളത്. വിരമിച്ച തന്റെ സഹപ്രവര്‍ത്തകരെ അങ്ങോട്ട് അയയ്ക്കുന്നതില്‍ തനിക്കു വേദനയുണ്ട്. അടിസ്ഥാന സൗകര്യങ്ങള്‍ നല്‍കലും ഒഴിവുകള്‍ നികത്തലുമാണ് അടിയന്തരമായി ട്രൈബ്യുണലുകളില്‍ ചെയ്യേണ്ടതെന്നും അദ്ദേഹം വ്യക്തമാക്കി. എന്നാല്‍ പിന്നാലെ ചീഫ്ജസ്റ്റിസിനു മറുപടിയുമായി കേന്ദ്രനിയമ മന്ത്രി രവിശങ്കര്‍ പ്രസാദ് രംഗത്തുവന്നു. ഈ വര്‍ഷം ഇതുവരെ 120 ജഡ്ജിമാരെ നിയമിച്ചു. നിലവില്‍ 5000ഓളം ഒഴിവുകളാണുള്ളത്. ഇതില്‍ ഇപ്പോഴത്തെ സര്‍ക്കാരിനു മാത്രമായി പ്രത്യേക പങ്കില്ലെന്നുംഈ സര്‍ക്കാരിന്റെ കാലത്താണ് കൂടുതല്‍ നിയമനങ്ങള്‍ നടന്നതെന്നും അദ്ദേഹം അവകാശപ്പെട്ടു.
ജഡ്ജിമാരെ നിയമിക്കാന്‍ കൊണ്ടുവന്ന ദേശീയ ജൂഡീഷ്യല്‍ നിയമന കമ്മിഷനെ കോടതി റദ്ദാക്കുകയും പഴയ കൊളീജിയം സംവിധാനം പുനസ്ഥാപിക്കുകയും ചെയ്ത ശേഷം സര്‍ക്കാരും സുപ്രിംകോടതിയും തമ്മില്‍ ഏറ്റമുട്ടലിലാണുള്ളത്. ഹൈക്കോടതി ജഡ്ജിമാരായി കൊളീജിയം നിര്‍ദേശിച്ച 77 പേരില്‍ 43 പേരുകള്‍ കേന്ദ്ര സര്‍ക്കാര്‍ തള്ളിക്കളയുകയും ഫയല്‍ മടക്കി അയയ്ക്കുകയും ചെയ്തിരുന്നു. 34 പേരെ നിയമിച്ചു. എന്നാല്‍ സര്‍ക്കാര്‍ തള്ളിയ പേരുകള്‍ അതേപടി ചേര്‍ത്തു കോടതി പട്ടിക സര്‍ക്കാരിനു വീണ്ടും അയച്ചിരുന്നു. ഇതു സംബന്ധിച്ച ഹരജി പരിഗണിക്കവെ ജൂഡീഷ്യല്‍ സംവിധാനത്തെ ഇല്ലാതാക്കാനാണോ സര്‍ക്കാര്‍ ശ്രമിക്കുന്നതെന്നു ചീഫ് ജസ്റ്റിസ് ചോദിച്ചിരുന്നു.


ഏറ്റവും പുതിയ വാർത്തകൾക്കും വീഡിയോകൾക്കും സബ്‌സ്ക്രൈബ് ചെയ്യുക

കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.

Latest News