2019 July 16 Tuesday
മടിയന്മാരുടെയും മൂഢന്മാരുടെയും പ്രവൃത്തി ദിവസം എന്നും നാളെയായിരിക്കും

ക്രീമിയയിലെ കപ്പലപകടം: മരിച്ചവരില്‍ ആറ് ഇന്ത്യക്കാര്‍; ആറ് പേരെ കാണാനില്ല

മോസ്‌കോ: ക്രീമിയയില്‍ രണ്ട് ഇന്ധന കപ്പലുകളിലുണ്ടായ തീപിടിത്തത്തില്‍ മരിച്ചവരില്‍ ആറ് ഇന്ത്യക്കാരും. കാണാതായ പത്ത് പേരില്‍ ഒരു മലയാളിയടക്കം നാല് പേരെ രക്ഷപ്പെടുത്തി.
ആറ് ഇന്ത്യക്കാരെ ഇനിയും കണ്ടെത്താനുണ്ട്. ആശിഷ് അശോക് നായരാണ് രക്ഷപ്പെട്ട മലയാളി. കെര്‍ഷ് കടലിടുക്കില്‍ തിങ്കളാഴ്ചയുണ്ടായ തീപിടിത്തത്തില്‍ 14 പേരാണ് മരിച്ചത്.
പിനല്‍ കുമാര്‍ ഭരത്ഭായി ടണ്ടെല്‍, വിക്രം സിങ്, ശരവണന്‍ നാഗരാജന്‍, വിശാല്‍ ഡോഡ്, രാജ ദേബ്‌നാരായന്‍ പണഗ്രായി, കരണ്‍കുമാര്‍ ഹര്‍ഭായി ടണ്ടല്‍ എന്നിവരാണ് മരിച്ചതെന്ന് ഇന്ത്യന്‍ വിദേശകാര്യ മന്ത്രാലയം പറഞ്ഞു. സിദ്ധാര്‍ഥ് മെഹര്‍, നീരജ് സിങ്, സെബാസ്റ്റ്യന്‍ ബ്രിട്ടോ ബ്രീസ്‌ലിന്‍ ഷായരാജ്, രുഷികേഷ് രിജു സക്പാല്‍, അക്ഷയ് ബാബന്‍ ജാദവ്, ആനന്ദ്‌ശേഖര്‍ അവിനാഷ് എന്നിവരെയാണ് കാണാതായത്.
കാണാതായവര്‍ക്കായി റഷ്യന്‍ സമുദ്ര ഏജന്‍സി, സമുദ്ര രക്ഷാ പ്രവര്‍ത്തകര്‍ തിരച്ചില്‍ നടത്തുകയാണ്. മരിച്ചവരുടെ മൃതദേഹങ്ങള്‍ രാജ്യത്തേക്ക് കൊണ്ടുവരാനുള്ള നടപടികള്‍ ആരംഭിച്ചെന്നും മന്ത്രാലയം പറഞ്ഞു. ആശിഷ് അശോകിന് പുറമെ ഹരീഷ് ജോഗി, സച്ചിന്‍ സിങ്, കമലേഷ്ഭായി ഗോപല്‍ ഭായി ടണ്ടല്‍ എന്നിവരെയാണ് രക്ഷപ്പെടുത്തിയത്.
നാല് പൗരന്മാര്‍ കൊല്ലപ്പെട്ടെന്നും എട്ട് പേരെ രക്ഷപ്പെടുത്തിയെന്നും തുര്‍ക്കി അധികൃതര്‍ അറിയിച്ചു. നാല് പേരെ കാണാതായെന്നും തുര്‍ക്കി പറഞ്ഞു.
ഇന്ത്യ, തുര്‍ക്കി, ലിബിയ എന്നീ രാജ്യങ്ങളിലെ തൊഴിലാളികള്‍ ജോലി ചെയ്യുന്ന ടാന്‍സാനിയന്‍ കപ്പലുകളായ കാന്‍ഡി, മാസ്‌ട്രോ എന്നിവക്കാണ് തീപിടിച്ചത്.
ഒരു കപ്പലില്‍ പ്രകൃതി വാതകവും അടുത്തതില്‍ ഇന്ധനവുമായിരുന്നു ഉണ്ടായിരുന്നത്. ഇന്ധനം നിറയ്ക്കുന്നതിനിടെയായിരുന്നു അപകടം. കാന്‍ഡി കപ്പലില്‍ ഒന്‍പത് തുര്‍ക്കി പൗരന്മാരും എട്ട് ഇന്ത്യക്കാരുമാണുണ്ടായിരുന്നത്.
മാസ്‌ട്രോയില്‍ ഏഴു വീതം തുര്‍കിക്കാരും ഇന്ത്യക്കാരും ഒരു ലിബിയന്‍ പൗരനുമാണുണ്ടായിരുന്നതെന്ന് റഷ്യന്‍ വാര്‍ത്താ ഏജന്‍സിയായ ടാസ് റിപ്പോര്‍ട്ട് ചെയ്തു.
രണ്ട് കപ്പലുകളും കത്തിക്കൊണ്ടിരിക്കുകയാണെന്ന് റഷ്യന്‍ സമുദ്ര ഏജന്‍സി പറഞ്ഞു. തീയണക്കാന്‍ ശ്രമം നടക്കുന്നുണ്ട്.
രണ്ട് ബോട്ടുകളിലാണ് രക്ഷപ്പെട്ടവരെ കെര്‍ഷിലേക്ക് കൊണ്ടുവന്നതെന്ന് പ്രാദേശിക വൃത്തങ്ങള്‍ റിപ്പോര്‍ട്ട് ചെയ്തു. കപ്പലിന് സമീപത്തേക്ക് രണ്ട് ബോട്ടുകള്‍ പുറപ്പെട്ടെന്നും കാണാതായവര്‍ക്കായി തിരിച്ചില്‍ നടത്തുന്നുണ്ടെന്നും റഷ്യന്‍ വാര്‍ത്താ ഏജന്‍സി റിപ്പോര്‍ട്ട് ചെയ്തു. രക്ഷപ്പെട്ടവര്‍ കെര്‍ഷ് നഗര ആശുപത്രിയില്‍ ചികിത്സയിലാണെന്നും ആര്‍ക്കും ഗുരുതരമായ പരുക്കുകളില്ലെന്നും ക്രീമിയ ഡിസാസ്റ്റര്‍ മെഡിസിന്‍ ആന്‍ഡ് ആംബുലന്‍സ് സെന്റര്‍ തലവന്‍ സെര്‍ജി ഒലിഫെറങ്കോ പറഞ്ഞു.

 


ഏറ്റവും പുതിയ വാർത്തകൾക്കും വീഡിയോകൾക്കും സബ്‌സ്ക്രൈബ് ചെയ്യുക

കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.

Latest News