2017 August 19 Saturday
അവസരം ഒന്നിലധികം തവണ നിങ്ങളുടെ വാതിലില്‍ മുട്ടില്ല
ഷാം ഫോര്‍ട്ട്

ക്രിസ്റ്റ്യാനോ റൊണാള്‍ഡോ, 2016 ലെ ലോക ഫുട്‌ബോളര്‍

മെസ്സിയേയും ഗ്രീസ്മാനെയും തള്ളിയാണ് നേട്ടം

സൂറിച്ച്: 2016ലെ ലോക ഫുട്‌ബോള്‍ താരത്തിനുള്ള ഫിഫ ദി ബെസ്റ്റ് പുര്‌സകാരം പോര്‍ച്ചുഗല്‍ നായകനും റയല്‍ മാഡ്രിഡ് താരവുമായ ക്രിസ്റ്റ്യാനോ റൊണാള്‍ഡോയ്ക്ക്. പോര്‍ച്ചുഗലിനെ യൂറോ കിരീടത്തിലേക്കും റയല്‍ മാഡ്രിഡിനെ ചാംപ്യന്‍സ് ലീഗ്, ക്ലബ് ലോകകപ്പ് കിരീടങ്ങളിലേക്കും നയിച്ച മികവാണ് സൂപ്പര്‍ താരത്തെ പുരസ്‌കാരത്തിനര്‍ഹനാക്കിയത്. നേരത്തെ ഫ്രാന്‍സ് ഫുട്‌ബോള്‍ മാഗസിന്‍ അവാര്‍ഡായ ബാല്ലന്‍ ഡി ഓറും ക്രിസ്റ്റ്യാനോ സ്വന്തമാക്കിയിരുന്നു.

ബാഴ്‌സലോണയുടെ അര്‍ജന്റൈന്‍ താരം ലയണല്‍ മെസ്സി, അത്‌ലറ്റിക്കോ മാഡ്രിഡിന്റെ ഫ്രഞ്ച് താരം അന്റോയിന്‍ ഗ്രിസ്മാനേയും പിന്തള്ളിയാണ് ക്രിസ്റ്റ്യാനോ ലോക ഫുട്‌ബോളര്‍ പദവി വീണ്ടും സ്വന്തമാക്കിയത്. 2008ല്‍ ഫിഫയുടെ പുരസ്‌കാരവും ബാല്ലന്‍ ഡി ഓറും സ്വന്തമാക്കിയ ക്രിസ്റ്റ്യാനോ സമാന നേട്ടമാണ് ഇത്തവണയും സ്വന്തമാക്കിയത്. ഫിഫയും ബാല്ലന്‍ ഡി ഓറും സംയുക്തമായി അവാര്‍ഡ് നല്‍കിയപ്പോള്‍ 2013, 2014 വര്‍ഷങ്ങളിലും പോര്‍ച്ചുഗല്‍ നായകന്‍ മികവിന്റെ പര്യായമായി മാറിയിരുന്നു.

മികച്ച വനിതാ താരത്തിനുള്ള പുര്‌സകാരം അമേരിക്കയുടെ കാര്‍ലി ലോയ്ഡ് നേടി. 2015ല്‍ അമേരിക്കയെ ലോകകപ്പ് നേട്ടത്തിലേക്ക് നയിച്ച ലോയ്ഡ് 2008, 2012 ഒളിംപിക്‌സുകളില്‍ സ്വര്‍ണം നേടിയ അമേരിക്കന്‍ ടീമിലും അംഗമായിരുന്നു.

മികച്ച ഗോളിനുള്ള പുഷ്‌കാസ് അവാര്‍ഡ് മലേഷ്യന്‍ മധ്യനിര താരം മൊഹദ് ഫയാസ് സുബ്രിയ്ക്കാണ്. മലേഷ്യന്‍ സൂപ്പര്‍ ലീഗ് ടീം പെനംഗ് എഫ്.എയുടെ താരമായ മൊഹദ് ഫ്രീ കിക്കിലൂടെ നേടിയ ഗോളാണ് പുരസ്‌കാരത്തിനു അര്‍ഹമായത്.

മികച്ച പരിശീലകനുള്ള പുരസ്‌കാരം ലെയ്സ്റ്റര്‍ സിറ്റിയെ ഇംഗ്ലീഷ് പ്രീമിയര്‍ ലീഗ് കിരീടത്തിലേക്ക് നയിച്ച ക്ലൗഡിയോ റനിയേരി സ്വന്തമാക്കി. റയല്‍ മാഡ്രിഡ് കോച്ച് സിനദിന്‍ സിദാന്‍, പോര്‍ച്ചുഗല്‍ കോച്ച് ഫെര്‍ണാണ്ടോ സാന്റോസ് എന്നിവരെ പിന്തള്ളിയാണ് റനിയേരി പുരസ്‌കാരത്തിനു അര്‍ഹനായത്. റിയോ ഒളിംപിക്‌സ് വനിതാ ഫുട്‌ബോളില്‍ സ്വര്‍ണം നേടിയ ജര്‍മന്‍ ടീമിനെ പരിശീലിപ്പിച്ച സില്‍വിയ നെയ്ഡാണ് മികച്ച വനിതാ കോച്ച്. ആദ്യമായാണ് ജര്‍മനി വനിതാ ഫുട്‌ബോളില്‍ ഒളിംപിക് സ്വര്‍ണം സ്വന്തമാക്കിയത്. മികച്ച ഫുട്‌സാല്‍ താരത്തിനുള്ള ഔട്ട്സ്റ്റാന്‍ഡിങ് കരിയര്‍ പുരസ്‌കാരം ബ്രസീലിന്റെ ഫാല്‍ക്കാവോ സ്വന്തമാക്കി. ഫിഫ ഫയര്‍ പ്ലെ പുരസ്‌കാരം കൊളംബിയന്‍ ക്ലബ് അത്‌ലറ്റിക്കോ നാഷണലിനു ലഭിച്ചു.

ഫിഫ ലോക ഇലവന്‍: ഗോള്‍ കീപ്പര്‍- മാനുവല്‍ നൂയര്‍.
പ്രതിരോധം- ഡാനി ആല്‍വ്‌സ്, ജെറാര്‍ഡ് പീക്വെ, സെര്‍ജിയോ റാമോസ്, മാഴ്‌സെലോ.
മധ്യനിര- ലൂക മോഡ്രിച്, ടോണി ക്രൂസ്, ആന്ദ്രെ ഇനിയെസ്റ്റ.
മുന്നേറ്റം- ലയണല്‍ മെസ്സി, ലൂയീസ് സുവാരസ്, ക്രിസ്റ്റ്യാനോ റൊണാള്‍ഡോ.



 

 


കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.