2017 March 26 Sunday
ലോകത്തില്‍ മാറ്റങ്ങള്‍ വരണമെന്ന് ഏവരും ആഗ്രഹിക്കുന്നു. എന്നാല്‍, സ്വയം മാറ്റത്തിനു വിധേയനാവാന്‍ ആരും തയ്യാറല്ല താനും
- ലിയോ ടോള്‍സ്‌റ്റോയ്

കോട്ടയം ഡി.സി.സി സത്യപ്രതിജ്ഞ; ഉമ്മന്‍ചാണ്ടി അസൗകര്യം അറിയിച്ചിരുന്നു: സുധീരന്‍

VM sudheeran

പത്തനംതിട്ട: കോട്ടയത്ത് പുതിയ ഡി.സി.സി പ്രസിഡന്റ് ചുമുതലയേറ്റ ചടങ്ങില്‍ പങ്കെടുക്കാന്‍ പറ്റാത്തതിലുള്ള അസൗകര്യം ഉമ്മന്‍ചാണ്ടി നേരത്തേ അറിയിച്ചിരുന്നതായി കെ.പി.സി.സി പ്രസിഡന്റ് വി. എം. സുധീരന്‍.

പത്തനംതിട്ടയില്‍ മാധ്യമങ്ങളോടു സംസാരിക്കുകയായിരുന്നു അദ്ദേഹം. വിപുലമായ ചര്‍ച്ചകള്‍ക്കു ശേഷമാണ് എല്ലാ ഡി.സി.സി പ്രസിഡന്റുമാരേയും തിരഞ്ഞെടുത്തത്. മുതിര്‍ന്ന നേതാവ് എ. കെ. ആന്റണി, മുന്‍ മുഖ്യമന്ത്രി ഉമ്മന്‍ചാണ്ടി, പ്രതിപക്ഷ നേതാവ് രമേശ് ചെന്നിത്തല, രാജ്യസഭാ ഉപാധ്യക്ഷന്‍ പി.ജെ. കുര്യന്‍ തുടങ്ങിയവരോടെല്ലാം അഭിപ്രായം ചോദിച്ചിരുന്നു.

കോണ്‍ഗ്രസ് ചരിത്രത്തില്‍ ഒരിക്കലും ഇത്ര വിശാലമായ ചര്‍ച്ച നടന്നിട്ടില്ല. എല്ലാ വിഭാഗവും സ്വാഗതം ചെയ്ത ആളുകളാണ് ഡി.സി.സി നേതൃത്വത്തിലേക്ക് എത്തിയിരിക്കുന്നത്. ഇത് കോണ്‍ഗ്രസിനെ കൂടുതല്‍ ബലപ്പെടുത്തുമെന്നും സുധീരന്‍ പറഞ്ഞു.

 

കേന്ദ്ര-സംസ്ഥാന സര്‍ക്കാരുകള്‍ ജനങ്ങളെ കലാപത്തിലേക്കു നയിക്കുന്നു

പത്തനംതിട്ട: നോട്ടു നിരോധനത്തിലൂടെ കേന്ദ്രവും റേഷനരി കൊടുക്കാതെ സംസ്ഥാനവും ജനങ്ങളെ കലാപത്തിലേക്കു നയിക്കുകയാണെന്ന് കെ.പി.സി.സി പ്രസിഡന്റ് വി.എം. സുധീരന്‍. ഡി.സി.സി പ്രസിഡന്റായി ബാബു ജോര്‍ജ് ചുമതല ഏറ്റെടുത്ത ചടങ്ങില്‍ മുഖ്യ പ്രഭാഷണം നടത്തുകയായിരുന്നു അദ്ദേഹം.

തലതിരിഞ്ഞ നയങ്ങളുമായാണ് കേന്ദ്ര സര്‍ക്കാര്‍ മുന്നോട്ടു പോകുന്നത്. സാധരണക്കാരന് സ്വന്തം പണം തിരിച്ചെടുക്കാന്‍ കഴിയാത്ത രാജ്യമായി ഇന്ത്യ മാറി. നോട്ടു പിന്‍വലിക്കലിനു മുന്‍പ് നടപടിയെക്കുറിച്ച് അരനിമിഷം ചിന്തിക്കാന്‍ മോദി തയാറായിരുന്നെങ്കില്‍ പ്രതിസന്ധി ഉണ്ടാകുമായിരുന്നില്ല. രാജ്യത്തെ വിലക്കയറ്റത്തിലേക്ക് നയിച്ച മോദി പെട്രോളിയം ഉല്‍പ്പന്നങ്ങളുടെ വില ഉയര്‍ത്തി. മോദിയുടെ ജനദ്രോഹ നടപടികളുടെ തുടര്‍ച്ചയാണ് കേരളത്തിലെ പിണറായി ഭരണം. റേഷനരി വിതരണം കേരളത്തില്‍ വലിയ പ്രതിസന്ധിയെ നേരിടുകയാണ്.

പൊതു വിപണിയിലും അരിവില ഉയര്‍ന്നതോടെ ജനങ്ങള്‍ ദുരിതത്തിലായി. സംസ്ഥാനത്ത് സ്ത്രീകള്‍ക്കും ദളിതര്‍ക്കും എതിരായ അക്രമങ്ങള്‍ വര്‍ധിച്ചു. രണ്ടു സര്‍ക്കാരുകളും കൂടി കലാപം ക്ഷണിച്ചു വരുത്തുകയാണ്. കോണ്‍ഗ്രസ് വിരുദ്ധര്‍ പോലും രാജ്യത്ത് കോണ്‍ഗ്രസ് ഭരണത്തിന്റെ ആവശ്യകത തിരിച്ചറിഞ്ഞ സാഹചര്യമാണുള്ളതെന്നും സുധീരന്‍ പറഞ്ഞു.

യോഗം രാജ്യസഭ ഉപാധ്യക്ഷന്‍ പ്രൊഫ. പി.ജെ. കുര്യന്‍ ഉദ്ഘാടനം ചെയ്തു. സ്ഥാനം ഒഴിഞ്ഞ ഡി.സി.സി പ്രസിഡന്റ് പി. മോഹന്‍രാജ് അധ്യക്ഷത വഹിച്ചു. ഡി.സി.സി പ്രസിഡന്റ് ബാബു ജോര്‍ജ്, ജില്ലയുടെ ചുമതലയുള്ള നേതാവ് ശരത്ചന്ദ്ര പ്രസാദ്, കെ.പി.സി.സി ട്രഷറര്‍ ജോണ്‍സണ്‍ ഏബ്രഹാം, ആന്റോ ആന്റണി എം.പി, അടൂര്‍ പ്രകാശ് എം.എല്‍.എ, മുന്‍ എം.എല്‍.എ കെ. ശിവദാസന്‍ നായര്‍, ജില്ലാ പഞ്ചായത്ത് അധ്യക്ഷ അന്നപൂര്‍ണാദേവി തുടങ്ങിയവര്‍ പ്രസംഗിച്ചു.