2018 November 21 Wednesday
ജനങ്ങളേ, നിങ്ങള്‍ക്ക് നിങ്ങളുടെ നാഥനിങ്കലില്‍നിന്നുള്ള തത്വോപദേശങ്ങളും ശമനവും മാര്‍ഗദര്‍ശനവും സത്യവിശ്വാസികള്‍ക്ക് കാരുണ്യവും വന്നെത്തിയിരിക്കുന്നു

കേന്ദ്രത്തിന് നിവേദനം നല്‍കി, വേണം 4,796.35 കോടി

20ന് കേന്ദ്ര സംഘം എത്തിയേക്കും

മുഖ്യമന്ത്രി മടങ്ങിയെത്തിയ ശേഷം കൂടുതല്‍ സഹായം അഭ്യര്‍ഥിച്ചു നിവേദനം നല്‍കും

തിരുവനന്തപുരം: പ്രളയദുരന്തത്തില്‍നിന്നു കരകയറാന്‍ 4,796.35 കോടി രൂപയുടെ സഹായം തേടി ഇന്നലെ സംസ്ഥാനം കേന്ദ്രത്തിനു നിവേദനം നല്‍കി. കേന്ദ്ര ദുരന്ത നിവാരണ അതോറിറ്റിയുടെ കേന്ദ്ര മാനദണ്ഡ പ്രകാരമുള്ള സഹായമാണ് ആദ്യഘട്ടത്തില്‍ ആവശ്യപ്പെട്ടിരിക്കുന്നത്. ഏതാണ്ട് 40,000 കോടിയുടെ നഷ്ടമാണ് പ്രളയത്താല്‍ സംസ്ഥാനത്തിന് ഉണ്ടായിരിക്കുന്നത്. വിവിധ വകുപ്പുകള്‍ കണക്കെടുപ്പ് തുടങ്ങിയിട്ടുണ്ട്.
മുഖ്യമന്ത്രി മടങ്ങി എത്തിയതിനു ശേഷം കൂടുതല്‍ സഹായം അഭ്യര്‍ഥിച്ചു കൊണ്ടുള്ള മറ്റൊരു നിവേദനവും നല്‍കും. ഇന്നലെ കേന്ദ്രത്തിന് നല്‍കിയ നിവേദനത്തില്‍ ദുരന്തത്തില്‍ മരിച്ച 339 പേരുടെ കുടുംബങ്ങള്‍ക്ക് 13.56 കോടിയും രക്ഷാപ്രവര്‍ത്തനത്തിനും തിരച്ചിലിനും 271 കോടിയും ദുരിതാശ്വാസ ക്യാംപുകള്‍ പ്രവര്‍ത്തിപ്പിച്ചതിനുള്ള ചെലവായി 74.34 കോടിയും കുടിവെള്ളം വിതരണം ചെയ്തതിന് 3.70 കോടിയും കൃഷിയിടങ്ങളില്‍നിന്ന് മണ്ണ് മാറ്റുന്നതിന് 131 കോടിയും കാര്‍ഷിക വിളകള്‍ 33 ശതമാനത്തിലധികം നഷ്ടപ്പെട്ടവര്‍ക്ക് സബ്‌സിഡി നല്‍കാന്‍ 73.57 കോടിയും ദുരന്തത്തില്‍ ചത്തൊടുങ്ങിയ മൃഗങ്ങള്‍ക്ക് നഷ്ടപരിഹാരം നല്‍കാനും മറ്റുമായി 44.09 കോടിയും മത്സ്യബന്ധന മേഖലയില്‍ 1.43 കോടിയും പൂര്‍ണമായി തകര്‍ന്ന വീടുകള്‍ക്ക് 105 കോടിയും ഭാഗികമായി തകര്‍ന്ന വീടുകള്‍ക്ക് 853 കോടിയും ചെറിയ രീതിയില്‍ തകര്‍ന്ന വീടുകള്‍ക്ക് 1,732 കോടിയും പ്രധാന റോഡുകള്‍ക്ക് 95 കോടിയും വൈദ്യുതി മേഖലക്ക് 85 കോടിയും ജലസേചനത്തിന് 536 കോടിയും, കുടിവെള്ളം പുനഃസ്ഥാപിക്കാന്‍ 317 കോടിയും പഞ്ചായത്ത് റോഡിന് 73 കോടിയുമാണ് സംസ്ഥാനം ആവശ്യപ്പെട്ടിരിക്കുന്നത്.
ഈ മാസം 20ന് കേന്ദ്ര ആഭ്യന്തര സെക്രട്ടറിയുടെ നേതൃത്വത്തില്‍ വിവിധ വകുപ്പുകളുടെ ജോയിന്റ് സെക്രട്ടറിമാര്‍ അടങ്ങിയ സംഘം കേരളത്തിലെ ദുരിത മേഖലകള്‍ സന്ദര്‍ശിക്കും.സാധാരണ ജോയിന്റ് സെക്രട്ടറിയുടെ നേതൃത്വത്തില്‍ വകുപ്പ് സെക്രട്ടറിമാരാണ് പ്രളയ മേഖലകള്‍ സന്ദര്‍ശിക്കുക.
എന്നാല്‍ കേരളത്തിലെ ഇപ്പോഴത്തെ പ്രത്യേക സാഹചര്യത്തില്‍ കൂടുതല്‍ സഹായം ലഭ്യമാക്കാന്‍ വേണ്ടിയാണ് കേന്ദ്ര സര്‍ക്കാര്‍ കേന്ദ്ര ദുരന്ത നിവാരണ അതോറ്റിയുടെ ചാര്‍ജ് കൂടിയുള്ള ആഭ്യന്തര സെക്രട്ടറിയെ തന്നെ നേരിട്ട് അയക്കുന്നത്. സംഘം പ്രളയം ബാധിച്ച എല്ലാ ജില്ലകളും സന്ദര്‍ശിക്കും.
പിന്നീട് തിരുവനന്തപുരത്ത് ഉന്നതതല യോഗം കൂടും. ഇവര്‍ നല്‍കുന്ന റിപ്പോര്‍ട്ടിന്റെ അടിസ്ഥാനത്തിലായിരിക്കും സംസ്ഥാനത്തിന് കേന്ദ്രം സഹായം പ്രഖ്യാപിക്കുക. അതേ സമയം പ്രളയക്കെടുതി വിലയിരുത്താനായി ലോക ബാങ്ക്, എ.ഡി.ബി എന്നിവയുടെ 28 അംഗ സംഘം പ്രളയം ബാധിച്ച പ്രദേശങ്ങള്‍ സന്ദര്‍ശിക്കുകയാണ്.
ആലപ്പുഴ, എറണാകുളം, തൃശൂര്‍, പാലക്കാട്, മലപ്പുറം, വയനാട്, കോഴിക്കോട്, ഇടുക്കി, കോട്ടയം, പത്തനംതിട്ട ജില്ലകളിലാണ് സന്ദര്‍ശനം നടത്തുന്നത്.

 

 

 

 

 

 

 

 

 

 

 

 


കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.