2019 June 18 Tuesday
നമ്മളിലുള്ള നന്മയാണു നമ്മുടെ നീതിബോധം -തിരുവള്ളുവര്‍

കൃഷ്ണഗിരിയില്‍ വീണ്ടും ക്രിക്കറ്റ് ആരവം; കേരളം-ഗുജറാത്ത് രഞ്ജി നോക്കൗട്ട് മത്സരം 15 മുതല്‍

നിസാം കെ. അബ്ദുല്ല

കൃഷ്ണഗിരി: രാജ്യത്തെ ഹൈആള്‍റ്റിറ്റിയൂഡ് സ്റ്റേഡിയങ്ങളിലൊന്നായ കൃഷ്ണഗിരിയില്‍ വീണ്ടും ക്രിക്കറ്റ് ആരവം. ഇത്തവണത്തെ ആരവത്തിന് ഇത്തിരി കടുപ്പം കൂടും. രഞ്ജിയുടെ നോക്കൗട്ട് റൗണ്ടില്‍ കേരളം ഗുജറാത്തിനെയാണ് 15 മുതല്‍ 19 വരെ നടക്കുന്ന മത്സരങ്ങളില്‍ നേരിടുക. സ്റ്റേഡിയം ആദ്യമായാണ് രഞ്ജിയുടെ നോക്കൗട്ട് മത്സരത്തിനു വേദിയാകുന്നത്.
ഇത്തവണത്തെ രഞ്ജി മത്സരങ്ങളിലെ കേരളത്തിന്റെ മികച്ച ഫോം കൂടി കണക്കിലെടുക്കുമ്പോള്‍ മത്സരത്തില്‍ തീപാറുമെന്നുറപ്പാണ്. ഇരു ടീമുകളും 12നു മത്സരങ്ങള്‍ക്കായി വയനാട്ടിലെത്തും. ഹിമാചല്‍പ്രദേശിനെ അവരുടെ തട്ടകത്തില്‍ പോയി അഞ്ചു വിക്കറ്റിന് തകര്‍ത്താണ് കേരളം നോക്കൗട്ടില്‍ കടന്നത്. തുടര്‍ച്ചയായി രണ്ടാംതവണയാണ് കേരളം രഞ്ജിയുടെ നോക്കൗട്ടിലെത്തുന്നത്.
ആദ്യ ഇന്നിങ്‌സില്‍ ഹിമാചലിനെ 297ല്‍ കേരളം എറിഞ്ഞൊതുക്കിയിരുന്നു. ആറു വിക്കറ്റ് കൊയ്ത് എം.ഡി നീതീഷും രണ്ടു വീതം വിക്കറ്റുകള്‍ പിഴുത് സന്ദീപ് വാരിയറും ബേസില്‍ തമ്പിയും കേരളത്തിന് പോരാടാനുള്ള വീര്യം നല്‍കിയെങ്കിലും കേരളത്തിന്റെ ഒന്നാമിന്നിങ്‌സ് 286ല്‍ അവസാനിക്കുകയായിരുന്നു. സെഞ്ച്വറി നേടിയ പി. രാഹുല്‍(127), സഞ്ജു സാംസണ്‍(50), മുഹമ്മദ് അസ്ഹറുദ്ദീന്‍(40) എന്നിവര്‍ക്കു മാത്രമാണ് പിടിച്ചുനില്‍ക്കാനായത്. ആദ്യ ഇന്നിങ്‌സില്‍ ലീഡ് വഴങ്ങിയ കേരളം വിജയം പിടിച്ചെടുക്കാനുള്ള വാശിയിലായിരുന്നു രണ്ടാമിന്നിങ്‌സിന് ഇറങ്ങിയത്. 285ല്‍ നില്‍ക്കെ കേരളത്തെ വെല്ലുവിളിച്ച് ഹിമാചല്‍ എട്ട് വിക്കറ്റ് നഷ്ടത്തില്‍ ഇന്നിങ്‌സ് ഡിക്ലയര്‍ ചെയ്ത് കേരളത്തെ ബാറ്റിങ്ങിനു ക്ഷണിക്കുകയായിരുന്നു.  എന്നാല്‍ നായകന്‍ സച്ചിന്‍ ബേബിയും(92), വിനൂപ് മനോഹരനും(96) നല്‍കിയ അടിത്തറയില്‍നിന്ന് ആഞ്ഞടിച്ച സഞ്ജു സാംസണ്‍(പുറത്താകാതെ 61) ടീമിന് അഞ്ച് വിക്കറ്റ് വിജയം സമ്മാനിച്ചു.
ഈ ആത്മവിശ്വാസത്തിലായിരിക്കും ടീം കൃഷ്ണഗിരിയിലും പാഡണിയുക. കേരളത്തിനായി ജലജ് സക്‌സേന, സഞ്ജു സാംസണ്‍, സച്ചിന്‍ ബേബി, ബേസില്‍ തമ്പി, സിജോ മോന്‍, വിനൂപ്, സന്ദീപ് തുടങ്ങിയവര്‍ കളത്തിലിറങ്ങുമ്പോള്‍ ഇന്ത്യന്‍ താരങ്ങളായ പാര്‍ഥീവ് പട്ടേല്‍, അക്ഷര്‍ പട്ടേല്‍, പിയൂഷ് ചൗള, പ്രിഥ്യൂഷ് ചൗള എന്നിവരുടെ പിന്‍ബലത്തിലാണ് ഗുജറാത്ത് പോരാടാനെത്തുന്നത്.


ഏറ്റവും പുതിയ വാർത്തകൾക്കും വീഡിയോകൾക്കും സബ്‌സ്ക്രൈബ് ചെയ്യുക

കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.