2018 November 17 Saturday
ജീവിച്ചതല്ല ജീവിതം, നാം ഓര്‍മയില്‍ വയ്ക്കുന്നതാണ്, പറഞ്ഞു കേള്‍പ്പിക്കാന്‍ വേണ്ടി നാം ഓര്‍മ്മയില്‍ വയ്ക്കുന്നതാണു ജീവിതം

കുട്ടനാട്ടില്‍ വീടുകളുടെ ശുചീകരണം പൂര്‍ത്തിയാകുന്നു

 

ചങ്ങനാശേരി: കുട്ടനാട്ടിലെ ജലനിരപ്പ് താഴ്ന്നു. വീടുകളുടെ ശുചീകരണം പൂര്‍ത്തിയാകുന്നു. എന്നാല്‍ പരിസരങ്ങള്‍ ചെളിക്കുഴിയായി തുടരുകയാണ്. ശുദ്ധജലക്ഷാമം രൂക്ഷമായി.
ഭൂരിപക്ഷം സ്ഥലങ്ങളിലും വൈദ്യുതി ബന്ധം പുന:സ്ഥാപിച്ചിട്ടില്ല. ചങ്ങനാശേരി താലൂക്കിലെ വിവിധ ദുരിതാശ്വാസ കേന്ദ്രങ്ങളില്‍ കഴിഞ്ഞിരുന്ന തൊണ്ണൂറുശതമാനം ആളുകളും വീടുകളില്‍ മടങ്ങിയെത്തിയെങ്കിലും പ്രളയം താണ്ഡവമാടിയ കുട്ടനാട്ടില്‍ ദുരിതം അവസാനിക്കുന്നില്ല.
കുട്ടനാട് വെള്ളത്താല്‍ ചുറ്റപ്പെട്ട നലിയിലാണെങ്കിലും കുടിക്കാന്‍ ശുദ്ധജലം കിട്ടാനില്ലെന്നത് വലിയ പ്രതിസന്ധിയാണ്. ദുരിതാശ്വാസ ക്യാമ്പുകളില്‍ നിന്നും ലഭിച്ച കുപ്പിവെള്ളം മാത്രമാണ് കുട്ടനാട്ടുകാരുടെ കൈവശമുള്ളത്.
കുടിക്കാനും ആഹാരം പാകം ചെയ്യാനും ഈ വെള്ളമാണ് ഏക ആശ്രയം. പ്രദേശവാസികള്‍, ചങ്ങനാശേരിയിലോ ആലപ്പുഴയിലോ എത്തിയാണ് കുപ്പിവെള്ളം ശേഖരിക്കുന്നത്. മുട്ടാര്‍, വേഴപ്ര നിവാസികള്‍ എടത്വായിലെത്തിയാണ് കുപ്പിവെള്ളം വാങ്ങിയത്.
രാമങ്കരി, കിടങ്ങറ, നെടുമുടി പ്രദേശങ്ങളില്‍ കടകള്‍ തുറന്നു പ്രവര്‍ത്തിച്ചത് വെള്ളവും പലവൃഞ്ജന സാധനങ്ങളും പച്ചക്കറികളും വാങ്ങാന്‍ ആളുകള്‍ക്ക് സഹായകമായി. കാവാലം, കൃഷ്ണപുരം, വാലടി പ്രദേശങ്ങളിലും വ്യാപാര സ്ഥാപനങ്ങള്‍ തുറന്നു പ്രവര്‍ത്തിച്ചത് ജനങ്ങള്‍ക്ക് ആശ്വാസമായി. വീടുകളിലേയും വ്യാപാരസ്ഥാപനങ്ങളിലേയും സാധനസാമഗ്രഹികളും വസ്ത്രങ്ങളും വെയിലത്തുണങ്ങുന്നത് കുട്ടനാട്ടിലെ പ്രധാന ദൃശ്യങ്ങളിലൊന്നാണ്.
എ.സി റോഡരികിലെ ചില പ്രദേശങ്ങളില്‍ മാത്രമാണ് വൈദ്യുതി ബന്ധം പുന:സ്ഥാപിച്ചിരിക്കുന്നത്. വെളിയനാട്, മാമ്പുഴക്കരി, മിത്രക്കരി, ചേന്നങ്കരി, മുട്ടാര്‍, കൈനകരി, ചമ്പക്കുളം, കാവാലം, പുളിങ്കുന്ന്, കണ്ണാടി പ്രദേശങ്ങളിലൊന്നും വൈദ്യുതി എത്തിയിട്ടില്ല.
വൈദ്യുതി വകുപ്പിലെ നിരവധി ഉദ്യോഗസ്ഥര്‍ ജോലികളുമായി രംഗത്തുണ്ടെങ്കിലും ട്രാന്‍സ്‌ഫോര്‍മറുകള്‍ക്കും പോസ്റ്റുകള്‍ക്കും ലൈനുകള്‍ക്കുമുണ്ടായ തകര്‍ച്ച വൈദ്യുതി ബന്ധം പുന:സ്ഥാപിക്കുന്നതിന് വലിയ തടസമായിരിക്കുകയാണ്.

 


കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.