2018 June 11 Monday
സംശയം ജനിക്കുമ്പോള്‍ സത്യം പറയുക.
-മാര്‍ക് ടൈ്വന്‍

കരയാംപാടത്തെ കര്‍ഷകര്‍ വിളയിച്ചത് നൂറുമേനി

വരന്തരപ്പിള്ളി : ഒരു തുണ്ട് ഭൂമി പോലും തരിശിടാന്‍ മടിക്കാണിക്കുന്ന കരയാംപാടത്തെ കര്‍ഷകരുടെ രാപകല്‍ ഇല്ലാത്ത അദ്ധ്വാനത്തിന്റെ ഫലമാണ് പച്ചക്കറി കൃഷിയിലെ നൂറുമേനി വിളവ്. വരന്തരപ്പിള്ളി പഞ്ചായത്തിന്റെ നെല്ലറയായി അറിയപ്പെടുന്ന പാടശേഖരത്തില്‍ വിരിപ്പൂ കൃഷിയും മുണ്ടകനും കൊയ്‌തെടുത്താണ് മൂന്നാം വിളയായി കര്‍ഷകര്‍ പച്ചക്കറികൃഷി നടത്തുന്നത്. 

വിശ്രമം പോലും ഇല്ലാതെ മുഴുവന്‍ സമയവും കൃഷിയെ സംരക്ഷിക്കുന്ന കരയാംപാടത്തെ കര്‍ഷകരുടെ ലാഭകണക്കും കാര്‍ഷിക മേഖലക്ക് പുത്തനുണര്‍വ് പകരുന്നതാണ്.75 ഏക്കര്‍ വരുന്ന പാടശേഖരത്തില്‍ അറുപതിലേറെ കര്‍ഷകരാണ് മൂന്നാം വിളയായി പച്ചക്കറി കൃഷി നടത്തുന്നത്.രാസകീടനാശിനിയുടെ അമിത ഉപയോഗം നിയന്ത്രിച്ച് സമ്മിശ്ര കൃഷിയാണ് കരയാംപാടത്ത് നടത്തുന്നത്.പയറും,വെണ്ടയും, കുമ്പളവും,മത്തനും തുടങ്ങി പത്തിലേറെ ഇനങ്ങളാണ് കൃഷി ചെയ്തിരിക്കുന്നത്.വെണ്ടക്ക് ഇടവിളയായി വെള്ളരി വിളഞ്ഞു നില്‍ക്കുന്നതും,പാടം കൈയ്യടക്കി തണ്ണിമത്തന്‍ നിറഞ്ഞു നില്‍ക്കുന്നതും കരയാംപാടം പാടശേഖരത്തിന് മാത്രം സ്വന്തമാകുകയാണ്.രണ്ട് പൂ നെല്‍കൃഷിയും പിന്നീട് പച്ചക്കറിയും കൃഷി ചെയ്യുന്ന ജില്ലയിലെ അപൂര്‍വം പാടശേഖരങ്ങളില്‍ ഒന്നാണ് കരയാംപാടം.
വിളവെടുത്ത ഉല്‍പ്പന്നങ്ങള്‍ പാടശേഖര സമിതിയുടെ വിപണന കേന്ദ്രത്തിലൂടെയാണ് വില്‍പന നടത്തുന്നത്.കൂടുതലുള്ള ഉല്‍പന്നങ്ങള്‍ തൃശൂര്‍ മാര്‍ക്കറ്റിലെത്തിച്ചുമാണ് വിറ്റഴിക്കുന്നത്.ത്രിതല പഞ്ചായത്തിന്റെയും വരന്തരപ്പിള്ളി കൃഷി ഭവന്റെയും സഹായവും പിന്തുണയുമാണ് കര്‍ഷകര്‍ക്ക് പ്രചോദനമാകുന്നത്.ഹരിതാഭമായ പാടശേഖരത്തിലെ കൃഷിരീതികള്‍ പുതുതലമുറക്ക് പകര്‍ന്നു നല്‍കുന്നതോടൊപ്പം ഭൂമാഫിയകളുടെ കണ്ണുപെടാതെ പാടശേഖരത്തിന് സംരക്ഷണം ഒരുക്കാനുമുള്ള ശ്രമത്തിലാണ് കര്‍ഷകര്‍.
പാടശേഖര സമിതിയുടെ നേതൃത്വത്തില്‍ നടന്ന വിളവെടുപ്പ് വരന്തരപ്പിള്ളി പഞ്ചായത്ത് പ്രസിഡന്റ് ഇ.എം.ഉമ്മര്‍ ഉദ്ഘാടനം ചെയ്തു.പാടശേഖര സമിതി പ്രസിഡന്റ് രാവുണ്ണി മുഴേടത്ത് അധ്യക്ഷനായി. ജില്ലാ പഞ്ചായത്തംഗം ജയന്തി സുരേന്ദ്രന്‍, ബ്ലോക്ക് പഞ്ചായത്തംഗം കലാപ്രിയ സുരേഷ്, കൃഷി ഓഫീസര്‍ ഡോ.എസ്.സ്വപ്ന,പുഷ്പാംങ്കതന്‍, പരമേശ്വരന്‍ വെട്ടിയാട്ടില്‍ എന്നിവര്‍ സംസാരിച്ചു.


കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.