2018 November 18 Sunday
ജീവിച്ചതല്ല ജീവിതം, നാം ഓര്‍മയില്‍ വയ്ക്കുന്നതാണ്, പറഞ്ഞു കേള്‍പ്പിക്കാന്‍ വേണ്ടി നാം ഓര്‍മ്മയില്‍ വയ്ക്കുന്നതാണു ജീവിതം

ഒരുതവണ പൗരത്വം ലഭിച്ചാല്‍ പിന്നീടത് തെളിയിക്കണോ?

 

ന്യൂഡല്‍ഹി: വ്യക്തിക്ക് ഒരു തവണ പൗരത്വം ലഭിച്ചുകഴിഞ്ഞാല്‍ കേന്ദ്ര, സംസ്ഥാന സര്‍ക്കാരുകള്‍ ആവശ്യപ്പെടുമ്പോഴെല്ലാം വീണ്ടും അത് തെളിയിക്കേണ്ടതുണ്ടോ?. അസമിലെ പൗരത്വപട്ടിക (എന്‍.ആര്‍.സി) പ്രസിദ്ധീകരിച്ചതിനെത്തുടര്‍ന്ന് ഉയര്‍ന്നുവന്ന ഈ വിഷയം സുപ്രിംകോടതി പരിശോധിക്കുന്നു.
ഒരുവ്യക്തിക്ക് ഇന്ത്യന്‍ പൗരത്വം ലഭിക്കുകയോ അല്ലെങ്കില്‍ ഒരുവ്യക്തിയെ ഫോറിന്‍ ട്രിബ്യൂനല്‍ നിയമവിരുദ്ധ കുടിയേറ്റക്കാരനായി പ്രഖ്യാപിക്കുകയോ ചെയ്താല്‍ സര്‍ക്കാര്‍ ആവശ്യപ്പെടുന്ന മുറക്ക് വീണ്ടും പൗരത്വം തെളിയിക്കുന്നതിനുള്ള നടപടിക്രമങ്ങള്‍ സ്വീകരിക്കേണ്ടതുണ്ടോയെന്നാവും കോടതി പരിശോധിക്കുക.
ഇതുസംബന്ധിച്ച് ഗുവാഹത്തി ഹൈക്കോടതി ഉത്തരവ് ചോദ്യംചെയ്ത് സപന്‍ ദത്ത എന്നയാള്‍ നല്‍കിയ ഹരജിയാണ് ചീഫ്ജസ്റ്റിസ് രഞ്ജന്‍ ഗൊഗോയ് അധ്യക്ഷനായ സുപ്രിംകോടതി ബെഞ്ച് മുന്‍പാകെയുള്ളത്. ഇക്കാര്യത്തില്‍ കേന്ദ്രസര്‍ക്കാരിനും അസം സര്‍ക്കാരിനും സുപ്രിംകോടതി നോട്ടിസ് അയച്ചിട്ടുണ്ട്.
വിഷയത്തില്‍ രണ്ടുഘടകങ്ങളാണുള്ളത്. ഒന്ന്, നിയമവിരുദ്ധ കുടിയേറ്റക്കാരനായ വ്യക്തിയുടെ അവകാശം. രണ്ട്, നിയമവിരുദ്ധ കുടിയേറ്റത്തെ ഇല്ലാതാക്കാനുള്ള സര്‍ക്കാരിന്റെ കടുത്ത നടപടി.
ഏതാണ് ഭരണഘടനയുടെ കാഴ്ചപ്പാടില്‍ പ്രാധാന്യമെന്നും കോടതി പരിശോധിക്കും. ഫോറിന്‍ ട്രിബൂനലിന്റേത് ഒരു അഭിപ്രായം മാത്രമാണെന്നും വിധിയല്ലെന്നുമായിരുന്നു ഗുവാഹത്തി ഹൈക്കോടതിയുടെ ഉത്തരവ്. അതിനാല്‍ ഫോറിന്‍ട്രിബൂനല്‍ ഒരുവ്യക്തിക്ക് പൗരത്വം നല്‍കുകയോ നിയമവിരുദ്ധ കുടിയേറ്റക്കാരനെന്നു കണ്ടെത്തുകയോ ചെയ്താലും സര്‍ക്കാരിന് വീണ്ടും അത് സ്ഥിരീകരിക്കാമെന്നും ഹൈക്കോടതി വ്യക്തമാക്കിയിരുന്നു.

 


കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.