2018 November 15 Thursday
ഒരു കടമ നിര്‍വഹിച്ചുകഴിഞ്ഞാലുള്ള പ്രതിഫലം മറ്റൊന്ന് നിറവേറ്റാനുള്ള ശക്തിയാണ്.

ഏഷ്യാ കപ്പ് ക്രിക്കറ്റ്: ഇന്ത്യന്‍ ടീമിനെ പ്രഖ്യാപിച്ചു

 

  • വിരാട് കോഹ്‌ലിക്ക് വിശ്രമം അനുവദിച്ചു. പകരം രോഹിത് ശര്‍മ ക്യാപ്റ്റന്‍

 

മുംബൈ: ഈ മാസം യു.എ.ഇയില്‍ നടക്കുന്ന ഏഷ്യാ കപ്പ് ക്രിക്കറ്റ് ടൂര്‍ണമെന്റിനുള്ള 16 അംഗ ഇന്ത്യന്‍ ടീമിനെ പ്രഖ്യാപിച്ചു.
വിരാട് കോഹ്‌ലിക്കു വിശ്രമം അനുവദിച്ച് രോഹിത് ശര്‍മയെയാണ് ഇന്ത്യ ക്യാപ്റ്റനായി തിരഞ്ഞെടുത്തത്. ബാറ്റിങില്‍ രോഹിത്തിന്റെ ഓപ്പണിങ് പങ്കാളി കൂടിയായ ശിഖര്‍ ധവാനാണ് ടീമിന്റെ വൈസ് ക്യാപ്റ്റന്‍. മനീഷ് പാണ്ഡെയും അമ്പാട്ടി റായുഡുവും ടീമില്‍ തിരിച്ചെത്തിയപ്പോള്‍ യുവ വിക്കറ്റ് കീപ്പര്‍ റിഷഭ് പന്തിനെ പരിഗണിച്ചില്ല.
2017 ഡിസംബറിനു ശേഷം ഇതാദ്യമായാണ് പാണ്ഡെ ഇന്ത്യന്‍ ഏകദിന ടീമിലെത്തുന്നത്. സമീപകാലത്തെ മികച്ച പ്രകടനമാണ് താരത്തിന്റെ തിരിച്ചുവരവിനു വഴിയൊരുക്കിയത്. അടുത്തിടെ നടന്ന ചതുര്‍രാഷ്ട്ര പരമ്പരയില്‍ ഇന്ത്യ ബി ടീമിനെ കിരീടത്തിലേക്കു നയിച്ചത് പാണ്ഡെയായിരുന്നു. ടീമിന്റെ ക്യാപ്റ്റന്‍ കൂടിയായ അദ്ദേഹം ഒരു സെഞ്ച്വറിയും രണ്ടു അര്‍ധസെഞ്ച്വറികളുമടക്കം 306 റണ്‍സ് നേടിയിരുന്നു. ഈ വര്‍ഷം ഫിറ്റ്‌നസ് പരിശോധനയില്‍ പരാജയപ്പെട്ടതിനെ തുടര്‍ന്ന് ഇംഗ്ലണ്ട് പര്യടനത്തില്‍ നിന്ന് ഒഴിവാക്കപ്പെട്ട റായിഡു 2016നു ശേഷം ആദ്യമായി ഇന്ത്യക്കായി ഏകദിനത്തില്‍ കളിക്കാനൊരുങ്ങുകയാണ്. രാജസ്ഥാനില്‍ നിന്നുള്ള പേസര്‍ ഖലീല്‍ അഹമ്മദാണ് ടീമിലെ ഏക പുതുമുഖം. ഇന്ത്യക്കു വേണ്ടി അണ്ടര്‍ 19 ലോകകപ്പില്‍ കളിച്ചിട്ടുള്ള താരം കഴിഞ്ഞ സീസണിലെ ഐ.പി.എല്ലില്‍ സണ്‍റൈസേഴ്‌സ് ഹൈദരാബാദ് ടീമംഗമായിരുന്നു. എം.എസ് ധോണിയും ദിനേഷ് കാര്‍ത്തികുമാണ് ഏഷ്യാ കപ്പ് ടീമിലെ വിക്കറ്റ് കീപ്പര്‍മാര്‍. പരുക്കുമൂലം ഇംഗ്ലണ്ട് പര്യടനത്തില്‍ പുറത്തിരുന്ന പേസര്‍ ഭുവനേശ്വര്‍ കുമാര്‍ തിരിച്ചെത്തി.
ഇന്ത്യന്‍ ടീം: രോഹിത് ശര്‍മ (ക്യാപ്റ്റന്‍), ശിഖര്‍ ധവാന്‍ (വൈസ് ക്യാപ്റ്റന്‍), ലോകേഷ് രാഹുല്‍, അമ്പാട്ടി റായുഡു, മനീഷ് പാണ്ഡെ, കേദാര്‍ യാദവ്, എം.എസ് ധോണി, ദിനേഷ് കാര്‍ത്തിക്, ഹര്‍ദിക് പാണ്ഡ്യ, കുല്‍ദീപ് യാദവ്, യുസ്‌വേന്ദ്ര ചഹല്‍, അക്ഷര്‍ പട്ടേല്‍, ഭുവനേശ്വര്‍ കുമാര്‍, ജസ്പ്രീത് ബുംറ, ശര്‍ദ്ദുല്‍ താക്കൂര്‍, ഖലീല്‍ അഹമ്മദ്.

 


കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.