2018 December 13 Thursday
പരിഹസിക്കപ്പെടുന്നത് അവഗണിക്കപ്പെടുന്നതിനേക്കാള്‍ നല്ലതാണ് – ഹാരോള്‍ഡ് മാക്മില്ലന്‍

ഉന്നത വിദ്യാഭ്യാസ രംഗത്തുനിന്ന് അവള്‍ പടിയിറങ്ങുന്നു

 

കോഴിക്കോട്: ഉന്നത വിദ്യാഭ്യാസ രംഗത്തുനിന്നു പെണ്‍കുട്ടികളുടെ കൊഴിഞ്ഞുപോക്ക് രൂക്ഷമാകുന്നു. അവരില്‍ ഏറ്റവും കൂടുതല്‍ മുസ്‌ലിം പെണ്‍കുട്ടികളാണ്. ജനസംഖ്യയില്‍ തന്നെ പെണ്‍കുട്ടികളുടെ എണ്ണം കുറയുന്നുണ്ട്. അതോടൊപ്പമാണ് പഠന വഴിയില്‍നിന്നു അവള്‍ ഓടിയൊളിക്കുന്നത്.
രാജ്യത്തെ 87 ശതമാനം പെണ്‍കുട്ടികളും ബിരുദത്തിനു ശേഷം പഠനം അവസാനിപ്പിക്കുകയാണ്. കൂടുതല്‍ പേര്‍ പഠനം തുടങ്ങിവയ്ക്കുന്നുണ്ട്. എന്നാല്‍ വിവാഹം, കുടുംബപ്രശ്‌നങ്ങള്‍ തുടങ്ങി ഒട്ടേറെ പ്രശ്‌നങ്ങളെ ചൊല്ലി പാതിവഴിയില്‍ പടിയിറങ്ങാന്‍ നിര്‍ബന്ധിതരാവുന്നു. പത്താം തരം പ്ലസ് ടു പരീക്ഷകളില്‍ ആണ്‍കുട്ടികളേക്കാള്‍ കൂടുതല്‍ പെണ്‍കുട്ടികളാണ് ഉന്നത വിജയം നേടുന്നത്. എന്നാല്‍ ഉന്നത പഠനരംഗത്ത് ഇതുനേരെ തിരിച്ചാകുന്നു. തൊഴില്‍ രംഗത്തും സ്ത്രീകളുടെ എണ്ണം കുറയുന്നുണ്ട്.
2014ല്‍ ഉന്നതവിദ്യാഭ്യാസം നേടാനെത്തുന്ന പെണ്‍കുട്ടികളുടെ എണ്ണം 46 ശതമാനമായിരുന്നു. എന്നാല്‍ കോഴിക്കോട്ടെ ഒരു സ്വാശ്രയ സ്ഥാപനത്തില്‍നിന്ന് കഴിഞ്ഞ വര്‍ഷം മാത്രം ഡിഗ്രി പഠനം അവസാനിപ്പിച്ചത് 46 മുസ്‌ലിം പെണ്‍കുട്ടികളാണ്. ഇതുമൂലം പ്രവേശന സമയത്തുതന്നെ മുഴുവന്‍ ഫീസും അടക്കുന്നവര്‍ക്കേ പ്രവേശനം നല്‍കുകയുള്ളൂ എന്നാണ് മാനേജ്‌മെന്റ് തീരുമാനിച്ചിരിക്കുന്നത്.
ഏതാണ്ട് 12 ദശലക്ഷം പെണ്‍കുട്ടികളാണ് ഇന്ത്യയില്‍ അണ്ടര്‍ ഗ്രാജ്വേറ്റ് കോഴ്‌സുകള്‍ക്ക് 2013ല്‍ ചേര്‍ന്നത്. പക്ഷേ കുറച്ചുപേര്‍ മാത്രമാണ് പ്രൊഫഷനല്‍ കോഴ്‌സുകളില്‍ തുടര്‍ന്നത്.
2013ല്‍ ആറുലക്ഷം പെണ്‍കുട്ടികള്‍ ഡിപ്ലോമ കോഴ്‌സുകള്‍ക്ക് ചേര്‍ന്നു. എന്നാല്‍ പി.എച്ച്.ഡിക്ക് ചേരാന്‍ കുറച്ചു പെണ്‍കുട്ടികളേ ഉണ്ടായുള്ളൂ. പി.എച്ച്.ഡി. അപേക്ഷകരില്‍ 40 ശതമാനം മാത്രമാണ് സ്ത്രീകള്‍. അവരില്‍ മുസ്‌ലിം കുട്ടികള്‍ വിരലിലെണ്ണാവുന്നത്.
പെണ്‍കുട്ടികളുടെ ശരാശരി വിവാഹപ്രായത്തില്‍ വര്‍ധന കാണിക്കുന്നുണ്ടെങ്കിലും പ്രായം കുറവായിത്തന്നെ തുടരുന്നുണ്ട്. ഉന്നതവിദ്യാഭ്യാസത്തിന് ചേരുന്നവരുടെ ആകെ എണ്ണം 33.3 ദശലക്ഷം ആണ്. അതില്‍ 17.9 ദശലക്ഷം ആണ്‍കുട്ടികളും 15.4 ദശലക്ഷം പെണ്‍കുട്ടികളുമാണ്. ബിരുദത്തിന് ശേഷം ആണ്‍കുട്ടികളുടെ എണ്ണം കൂടുന്നുണ്ട്. അതേ സമയം പെണ്‍കുട്ടികളുടെ എണ്ണം ഭീമമായി കുറയുകയാണ്.

 


കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.