2019 April 20 Saturday
കാലത്തില്‍നിന്ന് നിനക്കു നഷ്ടപ്പെട്ടതിന് ഇനി പകരമില്ല. അതില്‍നിന്ന് നേടിയെടുത്തതാകട്ടെ വിലമതിക്കപ്പെടുകയുമില്ല. -അത്വാഉല്ലാ സിക്കന്തറി

ഈ ഓടക്കുഴല്‍ പാടില്ല, പക്ഷെ നിങ്ങളുടെ ചുമ കുറയ്ക്കും

റസാഖ് എം അബ്ദുല്ല

ചുമ. പിന്നെയും ചുമ. നിര്‍ത്താതെയുള്ള ചുമ അലോസരപ്പെടുത്തുമ്പോള്‍ നമ്മള്‍ ‘കുര’ എന്ന വാക്ക് ഉപയോഗിക്കാന്‍ തുടങ്ങും. ചുമയ്ക്ക് മുമ്പില്‍ നമ്മുടെ ക്ഷമ അത്രയും ഇല്ലാതായിട്ടുണ്ടാവും. അങ്ങനെയുള്ളവരെ ഒരുപക്ഷേ, ഈ ഓടക്കുഴല്‍ ഉപകരണം സഹായിച്ചേക്കും.

പഴക്കം ചെന്ന ശ്വാസകോശ രോഗങ്ങള്‍ക്കു വരെ ശമനം നല്‍കാന്‍ ചതുരാകൃതിയിലുള്ള ‘ശ്വാസകോശ ഓടക്കുഴലിന്’ ആവുമെന്നാണ് ഇതിന്റെ നിര്‍മാതാക്കള്‍ പറയുന്നത്.

ഈ ഓടക്കുഴലിലൂടെ ആയാസരഹിതമായി ഊതിയാല്‍ മതി. അതിനും മാത്രം എന്തു മാജിക്കാണ് ഇതില്‍ ഒളിപ്പിച്ചുവച്ചിരിക്കുന്നതെന്നു സംശയിക്കേണ്ട. ഓടക്കുഴലിന്റെ ഓടയില്‍ ചെറിയ പ്ലാസ്റ്റിക്ക് പ്ലേറ്റുകള്‍ ഘടിപ്പിച്ചിട്ടുണ്ട്. നമ്മള്‍ ഊതുമ്പോള്‍ ഈ പ്ലേറ്റുകള്‍ നെഞ്ചില്‍ കമ്പനമുണ്ടാക്കും. ഏതാണ്ട് 16 ഹെട്‌സ് ശബ്ദതരംഗത്തിന് തുല്യമായിരിക്കും ഈ കമ്പനം. ഇത് കഫക്കെട്ടിനെ ഇളക്കുകയും പുറന്തള്ളാന്‍ സഹായിക്കുകയും ചെയ്യും.

നിരവധി രാജ്യങ്ങളില്‍ ലബോറട്ടറികളില്‍ കഫം പരിശോധിക്കാനായി ഇപ്പോള്‍ ഈ ഉപകരണം ഉപയോഗിച്ചുവരുന്നുണ്ട്. ജപ്പാനില്‍ ശ്വാസകോശ ക്ലിനിക്കുകളില്‍ ഇതുപയോഗിക്കുന്നുണ്ട്. യൂറോപ്പിലും കാനഡയിലും കാന്‍സര്‍ രോഗികളുടെ കഫം തുപ്പിക്കാന്‍വേണ്ടി ഈ ഉപകരണം വ്യാപകമായി ഉപയോഗിക്കുന്നുണ്ടെന്നാണ് റിപ്പോര്‍ട്ടുകള്‍.

വൈകാതെ ഈ ഉപകരണം ഡോക്ടറുടെ നിര്‍ദേശപ്രകാരം നിങ്ങളുടെ വീട്ടിലും എത്തിയേക്കാം. ഉപകരണത്തിന് യു.എസ് എഫ്.ഡി.എയുടെ അംഗീകാരവുമുണ്ട്. യു.എസില്‍ ഇതിന്റെ വില 40 (ഏകദേശം 2600 രൂപ) ഡോളറാണ്.


ഏറ്റവും പുതിയ വാർത്തകൾക്കും വീഡിയോകൾക്കും സബ്‌സ്ക്രൈബ് ചെയ്യുക

കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.