2019 July 22 Monday
നിങ്ങളുടെ അമ്മയോട് സംസാരത്തില്‍ മൂര്‍ച്ചയുള്ള വാക്കുകള്‍ ഉപയോഗിക്കരുത്. നിങ്ങളെ സംസാരിക്കാന്‍ പഠിപ്പിച്ചത് ആ അമ്മയാണെന്ന് മറക്കരുത്.

ഇ- ബേര്‍ഡില്‍ ഇന്ത്യയില്‍ നിന്നുള്ള പക്ഷികള്‍ ഒരുകോടി കവിഞ്ഞു

പൊന്നാനി:പക്ഷികളെക്കുറിച്ചുള്ള വിവരങ്ങള്‍ ശേഖരിച്ച് സൂക്ഷിക്കാനുള്ള ഡിജിറ്റല്‍ വിവരസാങ്കേതികാ ഇടമായ ഇ- ബേര്‍ഡില്‍ ഇന്ത്യയില്‍ നിന്ന് മാത്രമായി ഒരു കോടിയോളം പക്ഷികളെക്കുറിച്ചുള്ള വിവരങ്ങള്‍ ശേഖരിച്ചു.
2010 ജനുവരിയിലാണ് ഇ- ബേര്‍ഡിന് തുടക്കമായത്.2014 ആയതോടെ മഹാഭൂരിപക്ഷം പക്ഷിനിരീക്ഷകരും വിവരങ്ങള്‍ സൂക്ഷിക്കുവാന്‍ ഇ- ബേര്‍ഡിനെ ആശ്രയിക്കാന്‍ തുടങ്ങി.കഴിഞ്ഞ നാലര വര്‍ഷത്തിനിടയില്‍ 12,000 പക്ഷിനിരീക്ഷകര്‍ ഇതുപയോഗിക്കുന്നുണ്ടെന്നാണ് കണക്ക്. രണ്ട് ലക്ഷം പക്ഷികളുടെ ഫോട്ടോകളും ശബ്ദരേഖകളും ഇ- ബേര്‍ഡില്‍ ഇതിനകം ചേര്‍ക്കപ്പെട്ടുകഴിഞ്ഞു.2017 ല്‍ 50 ലക്ഷം പക്ഷികളെക്കുറിച്ചുള്ള വിവരങ്ങളാണ് ഇ- ബേര്‍ഡില്‍ ചേര്‍ത്തിരുന്നതെങ്കില്‍ 2018 മെയ് ആകുമ്പോഴേക്കുമത് ഒരു കോടിയായി ഉയര്‍ന്നു.
ഇ- ബേര്‍ഡ് കൃത്യമായി ഉപയോഗിക്കുന്ന 3,000ത്തോളം പക്ഷിനിരീക്ഷകരാണ് കേരളത്തിലുള്ളത്. ലോകത്താകമാനം 4.04 ലക്ഷം പക്ഷിനിരീക്ഷകര്‍ ഇതുപയോഗിക്കുന്നുണ്ട്.പക്ഷിനിരീക്ഷകരുടെ എണ്ണത്തില്‍ ലോകത്തില്‍ മൂന്നാം സ്ഥാനമാണ് ഇന്ത്യക്ക്.കേരളത്തില്‍ മാത്രം പക്ഷിനിരീക്ഷകരുടെ 50 ഓളം കൂട്ടായ്മകളുണ്ട്. ഇന്ത്യയില്‍ നിന്ന് ഇ- ബേര്‍ഡില്‍ ശേഖരിച്ച പക്ഷിനിരീക്ഷണ വിവരങ്ങളില്‍ പകുതിയിലധികവും കേരളത്തില്‍ നിന്നാണ്. പക്ഷികളുടെ ദേശാടന കാലയളവിലാണ് കൂടുതല്‍ വിവരങ്ങള്‍ ഇ- ബേര്‍ഡില്‍ ചേര്‍ക്കുന്നത്. ഇ- ബേര്‍ഡ് ആപ്ലിക്കേഷന്‍ സജീവമായതോടെ ലോകത്തുള്ള എല്ലാ പക്ഷിനിരീക്ഷകര്‍ക്കും തങ്ങള്‍ കണ്ടെത്തിയ വിവരങ്ങളും ചിത്രങ്ങളും പരസ്പരം പങ്കുവയ്ക്കാന്‍ ഇതുവഴി സാധ്യമായി. 1,200 പക്ഷിവര്‍ഗങ്ങളുടെ രണ്ടുലക്ഷത്തിലധികം ചിത്രങ്ങളും 6,000 ശബ്ദ റെക്കോര്‍ഡുകളും ഇതിനകം ഇ- ബേര്‍ഡില്‍ ശേഖരിച്ചിട്ടുണ്ട്.ബേര്‍ഡ് കൗണ്ട് ഇന്ത്യയുടെ നേതൃത്വത്തില്‍ നൂറോളം പക്ഷിനിരീക്ഷണ സംഘടനകളുടെ കൂട്ടായ്മയാണ് ഇന്ത്യയിലെ ഇ- ബേര്‍ഡ് പ്രവര്‍ത്തനങ്ങള്‍ ഏകോപിപ്പിക്കുന്നത്.
അമേരിക്കയിലെ കോര്‍ണല്‍ യൂണിവേഴ്‌സിറ്റിയാണ് ഇ-ബേര്‍ഡ് സോഫ്റ്റ് വെയര്‍ പരിപാലിക്കുന്നത്. അതേസമയം ഇ-ബേര്‍ഡിനെതിരേ ഒരു കൂട്ടം പക്ഷി നിരീക്ഷകര്‍ എതിര്‍പ്പുമായി രംഗത്തുവന്നിട്ടുണ്ട്. വിവരങ്ങള്‍ ദുരുപയോഗം ചെയ്യപ്പെട്ടേക്കാം എന്ന് ചൂണ്ടിക്കാട്ടിയാണ് ഇവര്‍ എതിര്‍പ്പ് ഉയര്‍ത്തുന്നത്. മാസങ്ങള്‍ക്കുമുന്‍പ് നടത്തിയ പക്ഷിസര്‍വേ വിവരങ്ങള്‍ ഇ-ബേര്‍ഡില്‍ ചേര്‍ക്കുന്നത് വിവാദത്തെ തുടര്‍ന്ന് തടഞ്ഞിരുന്നു.

 


ഏറ്റവും പുതിയ വാർത്തകൾക്കും വീഡിയോകൾക്കും സബ്‌സ്ക്രൈബ് ചെയ്യുക

കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.