2018 September 20 Thursday
പതിനായിരം ബന്ധുക്കള്‍ക്ക് പകരം നില്‍ക്കാന്‍ ഒരേയൊരു ആത്മാര്‍ഥ സുഹൃത്ത് മതി.
യൂറിപ്പിഡിസ്

ഇടുക്കി ഡാമിന്റെ ഷട്ടറുകള്‍ അടച്ചു; പെരിയാര്‍ മെലിഞ്ഞു

ചെറുതോണി: ഇടുക്കി അണക്കെട്ടിന്റെ എല്ലാ ഷട്ടറുകളും അടച്ചതോടെ പെരിയാറില്‍ നീരൊഴുക്ക് നിലച്ചു. കഴിഞ്ഞ 29 ദിവസം കുലംകുത്തിയൊഴുകിയ നദി ഇപ്പോള്‍ നീര്‍ച്ചാലായി മാറി. കനത്ത മഴയും നീരൊഴുക്കുംമൂലം തെക്കുപടിഞ്ഞാറന്‍ മണ്‍സൂണ്‍ കാലയളവില്‍ ജലനിരപ്പ് ഉയര്‍ന്നതിനെ തുടര്‍ന്ന് ഓഗസ്റ്റ് ഒന്‍പതിന് തുറന്ന ചെറുതോണി ഡാമിന്റെ എല്ലാ ഷട്ടറുകളും ഇന്നലെ ഉച്ചക്ക് ഒരു മണിക്ക് അടച്ചു.
ഓഗസ്റ്റ് ഒന്‍പതിന് ഉച്ചക്ക് 12.30ന് ഡാമിന്റെ നടുവിലെ ഒരു ഷട്ടര്‍ 50 സെന്റീമീറ്റര്‍ ഉയര്‍ത്തിക്കൊണ്ടാണ് 26 വര്‍ഷത്തെ കാലയളവില്‍ ആദ്യഷട്ടര്‍ തുറന്നത്. നാലു മണിക്കൂര്‍ പരീക്ഷണാടിസ്ഥാനത്തില്‍ തുറക്കാനാണ് നിശ്ചയിച്ചിരുന്നതെങ്കിലും കനത്ത മഴയും നീരൊഴുക്കും കാലാവസ്ഥാ മുന്നറിയിപ്പുകളും കണക്കിലെടുത്ത് ഒരു ഷട്ടറിലൂടെ വെള്ളം തുറന്നുവിടുന്നത് പിറ്റേന്ന് രാവിലെ വരെ തുടരുകയായിരുന്നു. ഒന്‍പതിന് രാവിലെ ഏഴ് മണിമുതല്‍ 100 ക്യുമെക്‌സായി വര്‍ധിപ്പിച്ചു.
അന്നുതന്നെ രാവിലെ 11.30ന് 300 ക്യുമെക്‌സായി വര്‍ദ്ധിപ്പിച്ചു. 10ന് ഉച്ചക്ക് 1.30ഓടെ 600 ക്യുമെക്‌സായും വൈകിട്ട് നാലുമണിയോടെ 700 ക്യുമെക്‌സായും 5.30ഓടെ 750 ക്യുമെക്‌സായും വെള്ളം തുറന്ന് വിടുന്നതു വര്‍ധിപ്പിച്ചു.
ശക്തമായ കാലാവസ്ഥ മുന്നറിയിപ്പ് ലഭിച്ചതിനെ തുടര്‍ന്ന് 15ന് ഉച്ചക്ക് ഒരുമണിയോടെ 1000 ക്യുമെക്‌സായും രണ്ട് മണിയോടെ 1200 ആയും മൂന്നുമണിയോടെ 1300 ക്യുമെക്‌സായും വൈകിട്ട് നാലുമണിയോടെ 1400 ക്യുമെക്‌സായും അഞ്ച് മണിയോടെ 1500 ക്യുമെക്‌സായും വര്‍ധിപ്പിച്ചു.
17ന് രാവിലെ 11.35 മുതല്‍ 12.10 വരെ 1600 ക്യുമെക്‌സായി വെള്ളത്തിന്റെ അളവ് വര്‍ദ്ധിപ്പിച്ചു. മഴ ശക്തമായി തുടങ്ങിയതോടെ ക്രമാനുഗതമായി കുറച്ചുകൊണ്ടുവന്നാണ് ഇന്നലെ ഉച്ചക്ക് ഒരുമണിയോടെ ഡാമിന്റെ ഷട്ടറുകള്‍ പൂര്‍ണ്ണമായും അടച്ചപ്പോള്‍ വെള്ളത്തിന്റെ അളവ് 2390.98 അടിയായിരുന്നു.


കമന്റ് ബോക്‌സിലെ അഭിപ്രായങ്ങള്‍ സുപ്രഭാതത്തിന്റേതല്ല. വായനക്കാരുടേതു മാത്രമാണ്. അശ്ലീലവും അപകീര്‍ത്തികരവും ജാതി, മത, സമുദായ സ്പര്‍ധവളര്‍ത്തുന്നതുമായ അഭിപ്രായങ്ങള്‍ പോസ്റ്റ് ചെയ്യരുത്. ഇത്തരം അഭിപ്രായങ്ങള്‍ രേഖപ്പെടുത്തുന്നത് കേന്ദ്രസര്‍ക്കാറിന്റെ ഐടി നയപ്രകാരം ശിക്ഷാര്‍ഹമാണ്.